Tímote Erká 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo. ˈDaa hemurit Waag kúnnaa gáál rubach shigichóóllá ubaa Yiesu Kirísto ke luolmit biiyo-, ke met egesóóllá gaa argééllá ˈdaalleka, yú he máá ali gaa kaany-, Yiesu Kiristoká.

² Warˈgatééllá kó Tímote lé-, ˈdaa iiy yeen ke Yiesu Kirísto ka ˈgúólláka, iny chia ˈdúwáállá yú ko ˈdu gáá verene. ˈJaa kúnnaa Waag ubaa Máá kúnnaa Guđo Yiesu Kirísto hí ko ˈdú ˈjeeˈjeen, hí ko geer guurá aargisuo, hí ko naanná shiiguo.

Gaal hai gáál hé onisiny ˈdaa Waaˈgiet ma ki taalinyká oonisîny

³ Af giri yú Makeˈdónia sesemeká yáá ko gil ki efe, giri Eféso gaa yíéđianno-, gál he onisiny tagle muuninyallá gálaat oonisúóllá af tatiyyo-, gaal gáál he onisiny kinaal ma oonisiny-,

⁴ héétí gaal hibano gaalí hol af tág ki koyallá ubaa gáál meet eshim eshimlé túóylé el met ma gáá ˈgiˈginallá ma gaa iđinyká. Hé hatallóóllá in hol ki fálaam iilshanaya, hé he fedit Waaˈgiet-, giri gálaat Kirísto iiy yegetká ˈdaalle ma ki taaliny.

⁵ Atim kuuní gáál af tatiyyóóllá héllé gálaat yé ˈdú ˈdeđichoká he gielmit giri hodhin saas mánká yé gáá ˈdeˈdeennoká, ubaa hé ˈdúwa-, gaalí ógká ekenylé, tá iiy yeen ˈdúwa-, nyimisan mánká.

⁶ Gáál ˈbáál ˈdaa giri hé midhab hatallóóllá ˈboiy gaa ˈdieká, hé ˈdeemano nyag mánnallá bala ˈdú nie.

⁷ Gaal gál hemuumurit Waag hí Móshe shiicheká gálaat oonisuoká yegetká he fede, kor hé héllé hogodhóóllá ubaa héllé kerka óg-, gálaat oonisúóllá eiy ma nannasan.

⁸ Hemuumurít hát he midhabká hé ke óg, har máádhat hí hát tagléká eiy nannasatka.

⁹ Hé ke ógká kieye, hemuumurít máá hí gál hé ˈdúwaká ekemeyoká ˈdaalle tág ki koyká mán, he ˈdaa gál hé ˈdeđewká ekemeyo-, gálaat met ma gaa kekeminyká, ubaa ˈdaa gál Waag ma kikian-, ađaabano higiloká, tá ˈdaa gál Waag eesheyo-, hé lesietká el gaa igiroká, héétí ˈdaa gál idhaamle ubaa eelle tá gál éíy taaka yegeská in ˈdaalle gaalí hemuumurít tág ki koy.

¹⁰ Héétí hemuumurít he ˈdaa gál herginy gálle hol ma shúúnanká gaa seseenká, ubaa ˈdaa gál herginy gályaab hí hol hergisanká gaa seseenká, tá ˈdaa gál gálaat ugunan-, gáál mamarsatká, héétí ˈdaa gál hođomléká, tá gál gálaat hé hódhoká af kakawká, héétí he ˈdaa hé éíy taaka lulle-, he onisiny tagléká ma ki yaalinyká gaalí tág ki koy.

¹¹ He onisiny taglééllá Fayam Midhab-, ˈdúwa-, Waag ke memeyóóllá hí ye gíl geer gáá kayyééllá ˈdaallé he ki taalla.

Báulo Yiesu Kirísto gielmít hol ˈdú nie

¹² Yáá Máá kúnnaa Guđo Yiesu Kirísto ye farguogoyóóllá gielmít hol ˈdú nannuo, ˈdaa giri mu ye máá hí af ˈduwasuoká ká dhaay-, ye hújíchle mé ki koyallá.

¹³ Har káána úba kíssóótí yú mú chachare-, gál mú iiy yieká úba egeshey-, gáál maanyjasieka, mu hé ye geer guurá argisie. Mu ye geer guurá argisíéllá, he ˈdaa giri hééllá yú ekemeyká yú mú moonnoy-, mú iiy ma yéenká.

¹⁴ Tá Máá kúnnaa Guđo Waag hé ye ˈdúˈjímle hát ˈdabaanká ˈdú ookoˈdmie, ˈdaa Yiesu Kiristoka ye iiy yeen ubaa gielmít ká shie.

¹⁵ ˈDéé hót ˈdúwa-, ke lulkúnno hát ˈdabaanká iiy yegetká hééllá: Yiesu Kirísto lésallá ka yimíéllá, gál ađaabano ˈguoká he ririma. Tá gál ađaabano ˈgúóllá yaa súm hí ađááb ˈdú ˈgaa.

¹⁶ Hééllá ˈdugaka in Yiesu Kirísto ye geer guurá argisie, giri geer gaa guchlé yáá gálaat súm ađááb ˈdú ˈgúóllá ye argisíéllá ˈdaalleka, gál hí iiy yegetká hát geer gaa guchle gaal íín úba aargisuoká gaalí ki kiimisat-, gaal luolmit biiyoká higiloká.

¹⁷ Aaléka, Kánsích taalle bííyyo ali ijo-, ki il ma ki argiriny-, íín tákámle Waagallá, taalle bííyyo gaalí meemeyo, gaalí ˈdúúw shiiguo. Iiy-hí, he hí hát kinaallá yeet.

Iiy yeen kua Kirísto ka ˈgayyoká tág chíro

¹⁸ Kó iny chia Tímote lééllo, atim yú ko af kí haađúóllá, he atim ˈdaa gál Waag hí ˈdeem ká shigicheká ˈdeenylé kis ˈdaakúka hodheká ki taalká, giri ˈdeenylé kinaal ko yiir gaa chiirat-, oos ke hol yegesallá kuun hí hát ˈdabaanká hol cheeseká.

¹⁹ Iiy yeen Kirísto ka ˈgayyóóllá tág chíro, hé kuuní óg-, ˈduuˈdúwaká eekémesh. ˈDaa giri gáál ˈbáál héél gil sug ki hayká, in iiy yeenle eiy fufue.

²⁰ Gál hatallóóllá ˈbaal he mú Heméneyas ubaa Alekesánda giri yú Sátan ˈdú hay-, Sátan gáál he il ká argisicho-, gaal hé ˈdaa Waaˈgietka hódhóóllá haađuoká.