Róóma 5 - Fayam Midhab Yiesu Kiristoká He Hol Af Iđiny Kaanaká

Kúfách Kiristo in muun ubaa Waag gáál hol hilsie

¹ Aaléka, ˈdaa giri ke Yíésu iiy yie-, Waag innumleka muun gáál gál ˈdúwaká chíélláka, muun káána hé ke Waag hol naanná ki ijo. Naanna kinaallá Máá kúnnaa Guđo Yiesu Kirísto ˈdaallé he ká naate.

² Iiy yeen ki Kirísto iiy yíéllá ˈdaalle ˈdugaka, hé ke ˈgíérích ki ˈdúˈjím Waaˈgiet ki aargiroká arge, in káána ke ˈdúˈjím kinaal gaa ija. Héétí Guch Waaˈgiet hélle lulle hát ke higiloká hé ki óg, hé kinaallá hé tág gáál geer gaa meey.

³ Hé ke hé kinaallá tákámle ma gaa geyyiminy, manyjanykúnno úba ha ki gaa geyyime, ˈdaa giri manyjany hat mé ki chirsan yé ˈdú ˈdeˈdeennoká ki ógká.

⁴ Héétí mé ki chirsan húgúm Waag hí feˈdoká he yé ˈdú ˈdeˈdeenne, tá húgúm Waag hí feˈdo kinaal íín hé yé ˈdú ˈdeˈdeenká he he ony giri hé Waag hí gáál af iđicheká hát he ˈduuwawká ke ógká.

⁵ ˈDaa giri Waag múún gáál Hím Naasanle ká shiiche-, gáál gielmitle koch ki hoychééllá, he af iđiny Waaˈgietallá met esiny ubaa onyle hé gáál af hódho ma hođiny.

⁶ Af giri hátle ke hát mannayká, in Kirísto múúni giri ke ˈgierim Waag hí ma fedinyká gaa sesemeká gáál ˈdú kufe. Kúfách Kirísto hí gáál ˈdú kufe kinaal aleđuđugullé Waag hí muˈdeká ali kí ˈdie.

⁷ Urgúaka máádhat hé máá ˈdúwaká ma ˈdú kufuminy, tá kálmaréélka, máádhat máá geerka guurá ˈguoká haí ˈdú kufuma.

⁸ Tá Waag gielmitlé gáál gielká hátlé gáál ka argisicheká hééllá: Af giri hátle ki ađaabano ubaa nyuogimkúnno gaa ijeká in Kirísto gáál ˈdú kufe.

⁹ Aalé káána, Kirísto fásle ˈdaalle ˈdugaka, Waag múún gáál gál ˈdúwaká hoyche. ˈDaa giri ke hé kinaal ógká, Kirísto hát muun gáál Waag idholle ubaa he il ká argisinyle gáál gaa ririanká hé úba ke óg.

¹⁰ Har káána úba ke Waag hol ka kídh onnoyka, Waag kúfách Inylééllá hé muun ubaa Waag gáál hol hilsie. Aalé káána ke Waag hol ka kídh muuninyallá, hát gon ke rubach aargiroká hé ke óg. Waag Inylé luolallá in muun gáál luolmit biiyoká shigia.

¹¹ Héétí, ˈdaa Máá kúnnaa Guđo Yiesu Kirísto giri múún ubaa Waag gáál hol hilsíélláka in muun káána úba ke Waag gaa geyyime.

Kufach ˈdaa Aˈdamo ká nadhe, luolmít íín ˈdaa Kiristo he ká naate

¹² Aaléka, ađááb mú tikiˈde ˈdaallé he ká naate, les ká hille, tá kufach íín ađaab kinaallá he yé gáá ˈdie. Yaalmitééllá in gálaat lulle kúfach mé ki koyye, ˈdaa giri gálaat lulle ađaabano hileká.

¹³ Hemuumurít hátle Waag hí gál Yuuˈdi má ká shiiny, ađaabano ubaa nyuogim hé les gaa ije. Bár kinaallá ˈdaa hé ˈdeđew-, gaalí eekemeykáka Waag hé kieye, Gaal hemuumuríti he ˈdeeđeney, ma chéen, ˈdaa giri les hátle hemuumurit Waaˈgiet mannayyeká.

¹⁴ Tá bár giri Aˈdam-, ˈjíig bár Moshe đigká gál bár kinaal ali ijeká hé lúl kúfách gim gaa ije. Gaal har úba ađaab Áˈdam hí hile-, máálle hemurít ˈdeeneyká ma ˈdeenenyka, lulle hé kufe. Áˈdam Máá bár kinaal hátle ma ka yímenká yaalmitlé ke ki ekemeye.

¹⁵ Áˈdam ađaable ubaa hé shiicho Waag hí gáál hállééllá ka shiichééllá hol ká eiyye. Áˈdam ađaablééllá in gálaat lulle kúfach mé ki koyye. Tá Waag hé shiicho gáál ka shiichééllá ebá guđáan! Hé shiichóóllá he Yiesu Kirísto, giri muí gálaat lulle ká shie-, gáál muí ˈdú ˈjeˈjeenká.

¹⁶ Ađaab mú tikiˈd hí hilééllá héllé hí yé gáá ˈdieká ubaa hé shiicho Waaˈgietallá héllé hí yé gáá ˈdieká hol ká eiyye. Áˈdam hemurít ˈdeenenyle in gálaat lulle Waag hí gál ađaabano ubaa nyuogim ˈguoká chie. Tá hé shiicho Waag hí gáál ka shiiche-, ke ˈgúóllá in muun gáál gál ˈdúwaká chegedhe. Hé kinaal har úba káána ke ađaabano ubaa nyuogim burnayká hileka.

¹⁷ Máá tikiˈde Áˈdamlééllá in ađaable gálaat lulle kúfach gim gaa iđiche. Tá Waag ˈdúˈjímle ubaa héllé shiicho-, innumleka gálaat ki ˈduuwaychóóllá ebá ˈdúwa! Ameeny gál hé shiichóóllá iiy yeget-, aargiroká in Waag hí kúfach gim gáá egeyye, gaal kúfach ká aađadhdha, luolmit biiyoká gaa yíéđima. Hééllá lúl mú tikiˈde ˈdaallé he ká nadhe, máá kinaallá he Yiesu Kirísto.

¹⁸ Iiy-hí, he ˈdeeneny tikiˈde Aˈdamallá ˈdaalleka in gálaat lúl Waag hí ˈdeensete. Tá he ekeny tikiˈde Kiristo ˈdúwáállá ˈdaalleka in Waag gálaat lúl kár gáál ki ˈduuwaycho-, gaal hí rubach ki aargiroká shigicha.

¹⁹ ˈDaa giri máá tikiˈde Áˈdamlééllá Waag af đuˈduseká in gálaat lulle ađaabano hile. Héétí, ˈdaa giri máá tikiˈde Kirísto lééllá Waag af ˈduuwayká in gál gúúđo Waag hí gál ˈdúwaká hođicha.

²⁰ Waag hemuumuritle af giri les ká hileká, in gálaat ađaabanolle ubaa nyuogimle ilshandhe. Tá ađaabano ubaa nyuogim ilshandheká, in Waag ˈdúˈjímle úba súm ilshante.

²¹ Gálaat lulle érléká ađaabano ubaa nyuogimmo he gim gaa ije. Tá káána, gál Máá kúnnaa Guđo Yiesu Kirísto iiy yegetká, in Waag hí gál ˈdúwaká chegedhe, Waag hí ˈdúˈjímle gim gaa iđimicha, gaal luolmit biiyoká aargira.