Lúka 14 - Fayam Midhab Yiesu Kiristoká He Hol Af Iđiny Kaanaká

Yíésu ˈbíl máá Farisaay gaa gololte

¹ Kúlích Hef ˈGisanká tikiˈd Yíésu ˈbíl máá guđo-, Farisaayká sedhe, giri ál kinaal gaa golmosotká. Aalé mu ˈbíllé he gaa ijeká gál ˈbíl kinaal gaa ijeká mú ˈdeey.

² Máá gon hí iigitayye mare úba hé ˈbíl kinaallá gaa ije.

³ Aalé Yíésu gál nyatalaamká ubaa gál Farisaayká yiete, kieye, Nyátálkúnnoka, máádhat ke Kúlích Hef ˈGisanká gaa biisuoká taglê? Ebá, hé tagle muuniny? muí gáál yie.

⁴ Gaal hé ˈdeeny mú hol ˈdú nieká mán. In aalé Yíésu máá giri iigitayká chiˈde, mu đo fayandhe, mú sí yie.

⁵ Aalé mu gáál yiete, kieye, Itín mááya inyle yíekaʼ, yérle yíekaʼ, Kúlích Hef ˈGisanká ˈguoˈd ki ˈjieka, ˈguoˈd ma gáá egeny? yie.

⁶ Gaal úba geđi ˈdeeny mú hol ˈdú nannuoká ˈdabe.

⁷ Aalé Yíésu gál máá Farisaay hí kiereká hát karm biiy meto-, gál ˈduuˈdúwaká hí ˈdú yíéđianká fedoká argeká, mu gáál hát hibietká geey, kieye,

⁸ Máádhat ko herginyle shienle kí kiereka, ha ál midhab-, gál ˈduuˈdúwaká hí yíéđianká yíéđîny. Mu kálmaréélka úba hé máá ko ˈdú ˈdúwaká kiere.

⁹ Ál ˈdúwa kinaallá yíéđiyye-, mu ííni giri hí kiereká ká yimie-, kuun ál gál ˈduuˈdúwa-, hí yíéđian kinaal iđoka, kálmaréél hai ko geđia, Állá gaa keʼ, ali máállá hí yíéđuo, hai ko yeedhe. Kúún đo kern hai ko ˈgidhe, ál éésh mán biiy ellóótíá ha yíéđiyye.

¹⁰ Gaal ko kiereka, sí, ál éésh mán-, biiy elloká yíéđig. Máá ko kiereká ká yimieka, hí ko geeyo, Sheelech, biiy el kinaallá gáá keʼ, biiy metééllá kí maˈd, hí ko yeet. Hát kinaallá in gál lúl gaalí kiereká innumle gaa ˈduuwaya.

¹¹ Máá hol máá ˈdúwaká ka dhaˈgasanká, Waag ˈdúúw haí rianna. Máá hol máá ˈdúwaká ma ka dhaˈgaminyká, Waag haí ˈduuwaycha, Yíésu hí gáál yie.

¹² Aalé Yíésu máá hí kiereká geey, kieye, Gólól kulichká yíekaʼ, gólól chuureká yíekaʼ, tág niiyyeka, ha sheelkú, nyaaramkú, gálaatkú, tá ol kua kaamúreká kíériny. Gál kinaallá kieˈdeka, gaal úba aadh ˈdaatika hai ko keere, êw đo af yíe hol ki ˈdiiyye.

¹³ Gólol tág niiyyeka, gál he maamanká, gál ˈgas ˈdeđewká, gál alb hí gáá okoˈdeká, héétí gál in maamanká úba kíer.

¹⁴ Hát kinaallá in Waag ko ˈdú ˈgunuanna, ˈdaa giri gálallá hé níínní ˈguo-, ko êw kí hidho-, mánká. Af giri Waag gállé hí iiy yie-, ˈdúwaká uushim yiem gáá ˈdeđichoká hé midhab ekeyche kinaallá ewle hai ko kí higita, Yíésu hí mú yie.

Gólól guđoká hiblé

¹⁵ Gál Yíésu hol ˈgar golmoteká mú tikiˈd ˈdeenyéél maaleká Yíésu geey, kieye, Máá Guch Waaˈgiet gólólle gololsotká ebá Waag hí ˈdú ˈjiiy! yie.

¹⁶ Aalé Yíésu mú hát hibietká ˈdéé hol ˈdú nie, kieye, Mú tikiˈd gólól guđoká he tág kokoy. Aalé mu gál ilishká kiere.

¹⁷ Gólol afléká mu gál he kiereká gédéchle ali ˈdú kaay. Gedech gál muí kiereká ˈgiedhe, kieye, Ka yimedhíe, golol lulle hé hol ˈdú đue, gáál yie.

¹⁸ Aalé gál gaalí kiereká lulle héllé hí ki ˈgeeˈgerneyká máá giri gedechká geey. Máá erkobká mú geey, kieye, Yú lesso hidhdhe, káána lés chia kinaallá af kí ˈdeeme. Ha geer mare ˈgíiny, mú yie.

¹⁹ Mú tikiˈd kieye, Yú hiit tomonno hidhdhe, káána ha seeme, hiit kinaallá les gúsáchle aargira. Yáá ma ká yiimen. Ha geer mare ˈgíiny, mú yie.

²⁰ Mú tikiˈd úba kieye, Yú káánallá eedhdhe, yáá ál kí yimetká man, mú yie.

²¹ Aalé máá giri gedechká hol nadhe, máállé guđoká fayaméél lúl shie. Aalé máá guđo kinaal hát idhoká gédéchle geey, kieye, Káána ˈjóballá keʼ, ˈgierim ubaa é totom gaa sí, gál he maamanká, gál ˈgas ˈdeđewká, gál alb hí gáá okoˈdeká, héétí gál in maamanká úba ka éew, mú yie.

²² Aalé máá giri gedechká geđi hol nadheká, máállé guđoká geey, kieye, Máá guđo, hé ye geeycheká yáá mé đig yie, kor ˈbil hátle kar ˈgaa, yie.

²³ Máá giri guđoká geđi gédéchle geey, kieye, Sí, ˈjien yé gaa ˈdé, ˈgierim ubaa ˈgierim aˈdinam gaa seesémo, gálaat hol ˈdú gáá shúun, gálaat hí hol ˈdu gáá yimet, ˈbil hí koch yeet, mú yie.

²⁴ Aaléka, yú hí geeye, ameeny gál yú kiere-, điidheká hé máá níínní gólólchú gaa yíéđianká mán, Yíésu hí gáál yie.

Gál lali Yiesu yegetká fedoká

²⁵ Nyésébích guđoká Yíésu hol eedhdhe. Aalé Yíésu nyesebich bala ˈdú nie, kieye,

²⁶ Máádhat ye ˈdu gáá yimet-, kor íín ˈjaalle, ˈjielle, minle, umle, nyaaramlé yaabká ubaa ˈdietká, tá sídhle dhúrle biiy met kuo-, yú ye biiy el kí maduoká, máá kinaallá hé máá lalichú ma yegen.

²⁷ Máá ˈgórlé đarám yaalká ma ká een-, ye el ma gáá veerinyká, hé máá lalichú ma yegen.

²⁸ Itín mááya, ˈbíl ˈdérká ˈdiˈdisatká fedoka, er les ma yíéđiminy, ˈbíl shokodaamlé ki ˈdiˈdisoká ˈdaable ma tooson, shokodaam ˈdáb ˈbíl đuusuoká ma aargiriny?

²⁹ Tá máá kinaallá shokodaam ˈdaable ma tooson, kor ˈbíl ˈdísáchle mé gáá kodhdhe-, tá ˈbíl ˈdisach hí ma đunyka, mú gál hí argoká haí eesheye,

³⁰ Máállá kerka ˈbíllo he ˈdiˈdite, kor ˈbíl ˈdísach hí ká adhate, ha gaalí yeedhe.

³¹ Héétí máá kánsích máre máá éíy kansichká hol yegeska, er les ma yíéđiminy-, ma taawuny-, yuoylé shíí tomonká har kánsíchatí yuoylé shíí tomon naamáátí ká aađaatoka ma kiimisan?

³² Har mu oos ma urinyka, gálatí hátlé ma ka rûnyká, mu hé gáál ali ma fafîny? Gaal shimít ˈdeenyle hol ma geđîny?

³³ Hát tikiˈde kinaallá, itín máádhat ˈdaachúka les ma yíéđiny-, hol ˈdéé mé ma gaa een-, héllé lulle ˈguoká ye ma ˈdú hanyka, hé máá lalichú ma yegen.

³⁴ Shúgút hé midhab. Tá shúgút gaalí hé éíy taaka hol warase-, ˈjám ˈdabiyyeka háteeye midhab?

³⁵ Shúgút kinaallá hé ˈdúúw mán, hé úba máá hí lesam ubaa laagam fafaatká mán, ha gaalí okodmia. Máá nee ˈguoká hí hééllá maalo, Yíésu hí gáál yie.