Kí Edhesiny 5 - Fayam Midhab Yiesu Kiristoká He Hol Af Iđiny Kaanaká

Warˈgat gaalí kat tiiyaká ki ˈdaneká ubaa Élíny

¹ Aalé Máá kara guchiká ˈdú ijoká warˈgat gaalí mareká gíl ˈdaa naaniet ká ˈgaa yú arge. Warˈgat kinaallá ˈdug ubaa geer he veerít ká ˈgayye, héétí kát tiiya-, gaalí ki ˈdaneká úba ˈgayye.

² Héétí máá ˈgasso-, urru-, fargogo-, af gaa guđoká ki ˈdiyeenká yú arge. Hé muí hogodheká kieye, Mááya ˈdúwa, warˈgát katléél babaa, warˈgát af fuura? yie.

³ Tá biiy hé máá níínní úr yíekaʼ, les ˈdug yíekaʼ, héétí les gim yíekaʼ hí gaa ijo-, warˈgát af fuuro-, warˈgát tooyoká mán.

⁴ Aalé ˈdaa giri warˈgát máá níínní ˈdúúw ˈguo, hí af fuuro-, hí tooyoká mánká in yú súm buoy.

⁵ Aalé đo gál káruká mú tikiˈd ye geey, kieye, Ha búony. Bá dháash, Lóch é meeny Yuuˈda-, gaalí Hídh ˈbíl íl ˈDawuˈd yegetká hé he lulle ká adhdhe. Mu warˈgát katlé tiiyaká hai babaa, warˈgát afo fuura, ye yie.

⁶ Aalé kara guchiká ubaa hé luogol-, afurká tá gál káruká toomle Eliny hí gaa yaal yú arge. Élíny kinaallá hát élíny gaalí yieská ká yaalla, gaas hí tiiya, in úba hí tiiya. Hééllá he hím naasan tiiya-, Waaˈgiet-, Waag hí les geer lulle ali ˈdú fiiyyeká.

⁷ Aaléka, Eliny sedhe, warˈgat kinaal Máá kara guchiká ˈdú ijoká gíllé ˈdaa naanietká gaa eedhdhe.

⁸ Aalé mu warˈgát eedhdheká, hé giri luogol-, afurká ubaa karu giri tomonaam naama a afurká Élíny ˈgas met abuunam les gaa ˈdane. Hé luogol kinaal ubaa gaal íín lúl hé áár ki ˈdaraanká ubaa kedm horki-, eruká gil ká ˈgaa. Eru kedm yé gáá ˈdeˈdeenallá he Waag visan gál Kirísto iiy yieká.

⁹ Aaléka hé luogol kinaal ubaa káru ár kaanaká ˈdoy, aar kieye, Kuun kó ˈdúúw ˈgayyo, giri warˈgát egeet-, warˈgát kát gaa babiyyoká. Kuun gálaat hé ko yies. Kó fáskú okodiche. Hát kinaallá in gálaat ká yiate. Gál kuuní Waag kí yiatééllá he gál kidh lulle ubaa afano lulle tá émeet lulle, héétí gálaat lulle yé gáá ˈdeˈdeenká.

¹⁰ Tá kó gálallá gál guchkú léká ubaa gál Waag hujich ki nannuoká hoyche. Gálallá lesso he gaa mumura, aar hí yie.

¹¹ Aalé yú đo gál ˈgasso-, urru-, burnay-, kara guchiká ubaa hé giri luogolká tá karu giriká ki madeká arge. Héétí gaal áár ˈdarameká yú maale. Gál ˈgasso-, urru kinaal túóyle he shíí shíí burnayye-, túoy mánká.

¹² Gaal árle af gaa guđoká ki ˈdoy, kieye, Élíny gaalí yieská hé ˈdúúw ˈguo. Mú guchlé, kamurlé, ˈdaalimlé, ubaa fargogintle ˈdugaka kí ˈdúúw shiiguo, kí meemeyo, kí gielmít hol ˈdú naannuo, yie.

¹³ Hééllá el ˈdaal he lullé Waag hí ka kuonne-, úr yíekaʼ, les ˈdug yíekaʼ, les gim yíekaʼ, bassam yíekaʼ hí gaa ijoká afle yú maale, kieye, Máá kara guchiká ˈdú ijoká ubaa Élíny ˈduuwlé, guchlé, ubaa fargogintle ˈdugaka, taalle bííyyo kí meemeyo, gaalí yie.

¹⁴ Aalé hé giri luogol-, afurká kieye, Iiy-hí, he hí hát kinaallá yeet! yie. Gál giri káruká đo abuunam les ˈdane, Waag ubaa Élíny meey.