Kí Edhesiny 20 - Fayam Midhab Yiesu Kiristoká He Hol Af Iđiny Kaanaká

Warram shíí tikiˈde

¹ Aalé yú máá urru-, ˈgasso-, úr gáá leledho-, ˈguoˈd gaa ˈdér-, el mé mánká kúlfílle ubaa nyárug guđoká gíl ka ˈguoká arge.

² Máá ˈgasso-, urru kinaal áních giriká ká ˈgiliˈgay, warram shíí tikiˈd gaa hiigidhe. Áníchallá he chár hele-, Waag kídhíchlé-, gaalí Sátan yegetká.

³ Mu úba Sátan ˈguoˈd gaa ˈdér-, el mé mánnallá ki lay, mú ˈguoˈd af ki koy, ˈguoˈd af saale, giri ˈdaab warram shíí tikiˈd ma béenyká Sátan geđ kidh ma nyiimisanká. Warram kinaal beeyka, Sátan rám mákárta-, iraam mánká Waag haí gaa fuuˈda.

⁴ Aalé yú karm guguchiká arge, karm gálaat hí ˈdú yíéđie, gaal hemuumurit gálle gálaat ˈdeem ki iđimuoká Waag hí shiiche. Héétí gál Yiesu Kirísto ˈduuwle hogodhe-, ˈdeeny Waaˈgiet ki ˈgie-, ˈdeeny kinaal ˈdugaka gaalí met gaa mumureká hodhinaamle yú arge. Gaal hátlé les ˈdug ˈdú ijeká hé bíních giri kach ˈguoká ubaa yaalmitlé giri gaalí tág nieká met les kurram ma gaa ˈdaráminy, ma memêny, héétí hé bíních kach ˈguo kinaal gúíyle iiy ma yéen-, met balalle ubaa gille ma gaa gúan. Aalé gaal geđi loogolnodhe, ubaa Kirísto warram shíí tikiˈd hol he ˈgar muumure.

⁵ Hééllá he uushim yé gáá ˈdím erkobká. Gál kuféétí íín ˈdaab warram shíí tikiˈd ma béenyká hé ma loolgonon.

⁶ Máá uushim yé gáá ˈdím erkoballá gaa ijoká ebá Waag hí ˈdú ˈjiiy! Mu he Waag máállé. Gálallá hé kúfách ki naamaká hí fargogintle mán, gaal Waag ubaa Kirísto gállé hí hujich ki nannuoká hai yeedhe, warram shíí tikiˈd Kirísto he ˈgarro hol mumura.

Sátan el mé ˈginlé

⁷ Aalé warram shíí tikiˈde kinaal beeyka, Sátan állé Waag hí ki hiigiteká Waag yé haí gáá ˈdeđicha.

⁸ Sátan yíé hai ká ˈdeenne, kidh les met ˈdinnam áfúrle gaa ijo-, gaalí Gôg ubaa Mágog yegetká hai nyiimisata, gáál hollo hol ˈdu gáá shugunna, gáál oos hai ˈdú egeyye, gáál túoyle hát yóch bas innoká.

⁹ Aalé gaal les gaa fue, ál Waag gálle hí gaa ije-, ˈjienle Waag hí gielká ki made. Aalé ˈjiet úr gáá leete, gál ˈjien ki made kinaal af ki shuunate.

¹⁰ Aalé Sátan gáál nyimisatééllá Waag hí bás ˈjiete-, waar ˈjiet hí gaa boloonká hí gaa ijo-, álle bíních giri kach ˈguoká ubaa bíních máá Waag hí ˈdeem ka shigicheká hol ka hoyká hí gaa ijoká ki layye. Aalé gaal kulich ubaa chúúrélle taalle bííyyo hai maanyjaa.

ˈDéé ki iđiny ubaa kúfách ki naamaká

¹¹ Aalé yú kara guchi-, guđo-, édhká ubaa Máá hí ˈdú ijoká arge, mú innumle les ubaa úr hí met kar gaa ˈdanne, kor les ubaa úr hé ál níínní yíéđuoká mán.

¹² In aalé yú gál ˈduuˈdúwaká ubaa gál aađa-, kis kufe-, kara guchi kinaal met gaa ˈgieká arge. Warˈgasam gaalí af fure. Warˈgat éíy taaka úba gaalí af fure, warˈgat kinaallá he warˈgat luolmitiká. Tá gál kufeká héllé eekemey-, gaalí warˈgasam gaa veereká ˈdugaka in Waag hí ˈdéé ki iiđimiche.

¹³ Bas gál hí ki kufeká urgano kí laalame. Gál kufe-, ál kufachietká gaa ijeká lulle úr mé nie. Aalé gálaat héllé eekemeyká ˈdugaka lulle Waag hí ˈdéé ki iiđimiche.

¹⁴ Aalé kufach ubaa ál kufachietká Waag hí bás ˈjieteká ki laalaanne. Bás ˈjietééllá he kúfách ki naamaká.

¹⁵ Aalé ameeny máá meenyle Waag hí warˈgat luolmitiká ma gaa véériny-, warˈgát gaa mánká bás ˈjieteká Waag hí ki layye.