Kí Edhesiny 17 - Fayam Midhab Yiesu Kiristoká He Hol Af Iđiny Kaanaká

Máá ˈdíét bíních búr-, kach ˈguoká ˈdú ijoká

¹ Aalé gál giri tiiya-, ˈgasso-, urru-, kedm tiiyaká ˈguoká mú tikiˈd ye ˈdú gáá yimie, ye geey, kieye, Káde, min guđo-, babasidhe-, biet burnayká ˈdug ˈdú iđóóllá ˈdeeny Waag hí ki iđimichóóllá yú ko ká argisia.

² Minnééllá he min les gállé kaansúoká hí baltle ˈguo-, hí bala ˈdú nie-, gaal Waag gíl sug ki hayká. Min kamurlé gáál ˈdú lalaatoká ˈduunyle gál les ˈdú ijoká hí ˈjie, gáál fame, muí ye yie.

³ Aalé Hím Naasan Waaˈgiet hátlé kaschú hol gaa sisiteká máá ˈgasso-, urru kinaal ye ˈbakat ˈdú eedhdhe, min bíních kach ˈguo-, búr-, meet Waag chaarim burnayká hí gon kuˈd-, tá met tiiya ubaa gaas tomon ˈguoká ˈdú iđoká yú arge.

⁴ Min kinaallá đafaraam faateká bísle korbich ubaa búr, shokodaam ki bukusateká he hórkí ubaa waar ˈdabaanká tá bier ˈduuˈdúwaká. Min gílle kulu hórkíká ká ˈgayye. Kulu kinaal hé gaa nyakarichká ubaa min kamurlé gáál ˈdú lalaatoká saasle hí koch yie.

⁵ Tá min mé balalle he veerít ká ˈgayye. He veerit kinaallá he meeny héllé gálaat hí muog-, kieye, bábilon guđoká, gál bábaská ubaa les héllé gaa nyakarichká ˈjiellé chieká.

⁶ Aalé yú min fás gál Waaˈgiet ubaa fás gál iiy yeenlé Kirísto iiy yieká ˈdaalle ˈdugaka gaalí yieská iyye-, fas hí fameká arge. Yú min argeká súm he af ˈdabe.

⁷ Aalé máá giri ˈgasso-, urruká ye heete, kieye, Háteka hééllá aˈdabiyyéel? Yú min ubaa bíních kach ˈguo-, met tiiya ubaa gaas tomon ˈguo-, min hí ˈdú iđo-, min hol gaa sisidhóóllá héllé gálaat hí muogká ha ko ká geđia.

⁸ Bíních kuuní argiyyééllá hé kis ali ije, kor káána hé mán, tá bár ˈdaatika ˈguoˈd gaa ˈdér-, el mé mánká yé hai gáá ˈdeeme, állé he il hí gaa aargiˈdoká mé hai nannaa. Aalé gál les ˈdú ijo-, Waag hátlé les ma ka kúóninyká meetle Waag hí warˈgat luolmitiká ma gaa véérinyká bíních kach ˈguo-, kis ali ije-, tá kufe-, geđi yé ka ˈdeˈdeenká argeka he af hai ˈdaaba.

⁹ Hééllá kas ˈdaalimoká hegete. Binich metlé tiiyáállá he gumano tiiya-, min hí ˈdú iđoká.

¹⁰ Met tiiyáállá úba he gál tiiya-, kaansúoká. Gál tiiya-, kaansúóllá gáál chen kansimle el hí ˈgidhe, mú tikiˈd hátle kansich, máátí hé hátle kansich ma yíen, tá mu bár yé ka ˈdeenká mú kansimle hé mé gáá gaaw.

¹¹ Bíních giri kach ˈguo-, kis ali ije-, tá káána mánnallá he kánsích ki síet-, kansim giri tiiyaká máállé-, állé he il hí gaa aargiˈdoká mé nannuoká.

¹² Gaas tomon argiyyééllá he gál tomon-, hátle kansím ma árginy-, kor kansím argeka, kansimlé kinaal mé gáá gaaw-, ubaa bíních kach ˈguo kinaal les he gaa mumuroká.

¹³ Gál kaansúo-, síetallá lúl kas hí tikiˈde, gaal kansimle ubaa hemuumuritle bíních kach ˈgúóllá hai shigia.

¹⁴ Gaal Élíny hai ˈdú ruuma, kor Eliny ˈdaa giri he Kánsích kansím lulle mé ki yaalká gáál hai ká aađadhdha. Tá gál Élíny hol ˈguoká he gál Waag hí viiyye-, Waag hí gálle hosote-, Waag af ˈduwasieká, muí ye yie.

¹⁵ Aalé máá giri ˈgasso-, urru kinaal geđi ye geey, kieye, Biet kuuní argiyye-, min babasidheká hí ˈdug ˈdú iđééllá he gálaat ubaa nyesebim, tá kidh af hí hol ká eiy eiyyeká.

¹⁶ Tá gaas tomon kuuní argiyyééllá ubaa bíních giri kach ˈguoká min babasidhééllá hai neebeedhe, mú he met lulle hai gaa ugunma, mú búr hai iđimia, mú af hai ki shugunna, mú ˈjiet hai gaa verene.

¹⁷ Tá ˈdaab Waag ˈdeenyle ma đusînyká, in gálallá hééllá lulle hát he feˈdoká ger fiiyye, giri gaal Waag hát feˈdo kinaal ekemeyo-, gáál kas hí tikiˈd cheget-, gáál kansimle hemuumuritle gaalí bíních giri kach ˈguoká ˈdú haađuoká.

¹⁸ Tá min kuuní argiyyééllá he ˈjien guđo-, gál kaansúo-, les gaa ijoká lúl he gaa mumuˈdoká.