Kí Edhesiny 16 - Fayam Midhab Yiesu Kiristoká He Hol Af Iđiny Kaanaká

Kedm tiiya-, idho Waaˈgiet hí gaa iđoká

¹ Aalé yú ˈdéé hót ˈdér-, ˈBíl Waaˈgiet yé gáá ˈdiiyye-, gál giri tiiya-, ˈgasso-, urruká geeycheká maale, ˈdéé hót kieye, Sedhíe, kedm giri tiiya-, idho Waaˈgiet hí gaa iđoká les ˈdú ookodmía, chie.

² Aalé máá ˈgasso-, urru-, erkobká sedhe, kedmitlé idho Waaˈgiet hí gaa iđeká les méle ki nie, gál giri bíních kach ˈguoká gúíyle ˈgie-, binich yaalmitlé gaalí tág nieká met les kurram gaa ˈdane-, memeyká đo lilo ˈdeđew-, kullaká hí yiem gáá ˈdie.

³ Aalé máá ˈgasso-, urru-, ki naamaká kedmitlé idho Waaˈgiet hí gaa iđeká bás méle ki nie, bas hol gaa suoy, bas hát fás máá kufeká yie, he lullé luogol-, hí gaa ijeká kufe.

⁴ Aalé máá ˈgasso-, urru-, ki seđeká kedmitlé idho Waaˈgiet hí gaa iđeká warram ubaa haˈdam méle ki nie, biet hol gaa suoy, fás yie.

⁵ Aalé yú máá ˈgasso-, urru-, biet mé ki yaalallá af maale, mu kieye, Kó ˈdúwa-, saas mán-, kis ali iđe-, tá bííyyo ali iđóóllo, yaalmit giri kuuní gálaat ˈdeem ki iđimichóóllá he yaalmit ˈdúwaká.

⁶ ˈDaa giri gaal gál kua ko iiy yieká ubaa gál kua ˈdeem ka shigiche-, ˈdeem ˈdiyimeká fásle okodieká, in kuun gáál fás ím mé ki tiiyye. Hé kinaallá hé gálle hí hol ki ˈgeˈgedheká, muí yie.

⁷ Aalé yú ˈdéé hót kúb suoryo-, álle yé gáá ˈdiiyyeká maale, ˈdéé hót kieye, Máá Guđo Waag fargogínt lulle ˈgúóllo, hé ˈduwa, yaalmit kuuní gálaat ˈdeem ki iđimichóóllá he yaalmit ˈdúwa-, tagléká, chie.

⁸ Aalé máá ˈgasso-, urru-, ki afurká kedmitlé idho Waaˈgiet hí gaa iđeká aadh méle ki nie, aadh Waag hí fargogint gálaat ˈjiet ki bodbodmisichoká shiiche.

⁹ Aalé gálaat kúlkúl súm ˈdeew kinaal hí bodbodsie. Gaal Waag hééllá lulle fargogintle ˈgayyóóllá chaachare, hé héllé ˈdeđewká ma hâny, Waag bala ma ˈdú níiny, Waag ˈdúúw ma shíiny.

¹⁰ Aalé máá ˈgasso-, urru-, ki chenká kedmitlé idho Waaˈgiet hí gaa iđeká bíních giri kach ˈguoká karallé guchiká ˈdug méle ˈdú nie, binich bííylé guchiká đo ongʼoroyye. ˈDaa giri gáál gon hí boloyyeká gaal hol erb koey.

¹¹ Gáál gon bólollééllá ubaa lilolle ˈdugaka in gaal Waag Úr Iđoká chaachare, gaal hé héllé ˈdeđewká ma hâny, Waag bala ma ˈdú níiny.

¹² Aalé máá ˈgasso-, urru-, ki leká kedmitlé idho Waaˈgiet hí gaa iđeká wár gaa guđo-, Yufiretiká méle ki nie, war đo goyye, giri gál kaansúo-, ˈdaa baryo gáá yiimetká ˈgíéríchle tág kokuoká.

¹³ Aalé yú aryaan gaa nyakaridhe-, seđe-, hát korkór ki ég-, áních giriká ubaa bíních giri kach ˈguoká tá bíních máá Waag hí ˈdeem ka shigichoká hol ka hoyká hí af yiem gáá ˈdieká arge.

¹⁴ Aryaan seđééllá he aryaan gál ˈgasso-, Satan-, hé gálaat hí af ˈdaˈdaboká ekemeycho-, les lulle gállé kaansúoká af gaa verenno-, giri gál kaansúo kinaal ali tikiˈd hol mé ˈdú egeyyo-, Waag hol yegeská. Oosééllá Waag fargogínt lulle ˈgayyoká kúlíchlé guđoká he ali kí ˈdeenne.

¹⁵ Yíésu kieye, Bá dhaayyíe, yú hát máá buraallé-, aadh ˈgas hí muogká gáá ˈjeˈjeenká ha gáá ˈjeeme, yie. Máá ˈdeyeen-, đafaraamle ˈguo-, giri gele mantle gálaat hí ma aargiriny-, kern hí ma ˈgiˈginká ebá Waag hí ˈdú ˈjiiy!

¹⁶ Aaléka, aryaan seđe kinaal đo les gállé kaansúoká ál af Heberewka gaalí Armagédon yeget mare álle hol mé ˈdú eeyye.

¹⁷ Aalé máá ˈgasso-, urru-, ki tiiyaká kedmitlé idho Waaˈgiet hí gaa iđeká úr gáá okodie. Aalé ˈBíl Waaˈgiet karallé guchi-, hí gaa ijeká ˈdéé hót ˈdérká hí yé gáá ˈdiiyye, kieye, He hé đue! chie.

¹⁸ Aalé ir biirgime, ˈgeˈget đo sheesheenne, yaaˈde, les mootoonne. Les motiny hat kinaallóóllá ameeny gálaat Waag hí les ka koyyeká hé kálta máá hí argeká mán, hé tág guđo, kor úba súm ˈdeew.

¹⁹ Aalé ˈjien giri guđo-, Bábilon léká eiy seđ ká ˈgiiˈgite, tá kidh éíy taakáátíá ˈjienle úba eiy ˈgiiˈgite. Af kinaal Waag Bábilon Guđóóllá ˈdeentle táb ˈdoote, he ˈdú moyche, giri Waag kulullé ˈduu idho-, guđoká Bábilon hí igianká.

²⁰ Aalé korm alble lulle gaa bame, gumano hé gumano níínní úba alb kí ˈgiteká mán.

²¹ Héétí ír waar guguđoká ˈguo-, tikiˈd ilshamle hát wár ilishkáka úr gáá okoˈde, gálaat ˈdú ˈdane. ˈDaa giri ír waar ˈguo-, kinaal súm ˈdeewká gálaat Waag chaachare.