Kí Edhesiny 14 - Fayam Midhab Yiesu Kiristoká He Hol Af Iđiny Kaanaká

Élíny ubaa gál shíí kúˈd tikiˈde-, tómón eiy afur a afurká

¹ Aalé yú fuˈjieká Eliny Gúm Siyon ˈdú yaal. Eliny gál shíí kúˈd tikiˈde-, tómón eiy afur a afurká hol ˈgaa. Gál kinaallá Élíny meenyle ubaa Élíny meeny ˈJaallé veeritle met bala ká ˈgaa.

² Aalé yú hé hát hele guđo-, ka fameká yúkúrle ubaa ˈgeˈget yaarít hí guđoká ki égká úr gaa maale. Hé yú maale kinaallá shímle úba hát shím hé gaalí áár ki ˈdaraanká.

³ Gál giri Élíny gúm álle hol af ˈgie kinaal ár kaanaká kara guchi Waaˈgietká ubaa hé giri luogol-, afurká, tá gál giri káruká metle gaa ˈdarama. Ár kinaallá hé máá níínní hí oonootká mán. Gál giri shíí kúˈd tikiˈde-, tómón eiy afur a afur-, Waag hí lésallá gáá yiateká tákáma hí og.

⁴ Gálallá he gál hé Waag hí ma fedinyká hol ká ridhdhe-, Waag bala ˈdú nie-, Élíny el gaa igiro-, Eliny állé seseenká mé nannuo-, Waag hí yiate-, Waag hí gál lesietká gáá shuunate-, giri Waag ubaa Élíny saanollé erkobká yegetká.

⁵ Gáál agerle hé hodho níínní gaalí gaa maaleká mán. Gaal hé ˈdeensen mán.

Gál ˈgasso-, urru-, seđeká

⁶ Aalé yú máá éíy taaka-, ˈgasso-, urru-, úr gaa seseen-, Fayam Midhab-, biiyoká gál les ˈdug ˈdú ijoká ki ˈdiyeenká arge. Máá kinaallá fayám kidhano ubaa émeeto tá gáláát afano hí hol ká eiyyeká lulle ki ˈdiiyime.

⁷ Mu af ˈdérká ˈdéé ki hodhe, kieye, ˈDaa giri Waag aadh ˈgas gálaat ˈdéé ki iđimichoká ali kí ˈdiiyyééllá, Waag kiikiadhíe, ˈdúúw shiigía. Máá úr, les, ubaa bás tá biet haˈdamká ka kuonnééllá met les kurram gaa ˈdannáa, meemeyyíe, yie.

⁸ Aalé máá ˈgasso-, urru-, éíy taaka-, ki naama-, máá ˈgasso-, urru kinaallá he el gaa igire, kieye, Bábilon Guđoká hé el hí ˈgidhe! Hé el hí ˈgidhe! Hééllá he ˈdaa giri Bábilon baltlé gaa nyakaridheká ˈduunyle kidh lulle mé ki tiiyye-, kidh hí igianká, muí yie.

⁹ Aalé máá ˈgasso-, urru-, éíy taaka-, ki seđeká gál ˈgasso-, urru-, naama kinaallá el gaa igire, af ˈdérká ˈdéé ki hodhe, kieye, Máá bíních kach ˈgúóllá ubaa binich yaalmitle metle les kurram gaa ˈdaraan-, héétí bíníchallá gúíyle iiy yeget-, gaalí mé bala, muuninyka, gíl guguoká,

¹⁰ máá kinaallá Waag idholle ˈduunylé kamadhe-, Waag kulullé idhoká gaa ijoká hai igima. Máá kinaallá Waag gállé ˈgasso-, urruká ubaa Élíny metle ˈjiet ubaa waar ˈjiet hí gaa boloonká haí maanyjasia.

¹¹ Gál bíních kach ˈgúóllá ubaa binich yaalmitlé metle les kurram gaa ˈdaraan-, memeyo-, tá binich meenyle gúíyle gaalí guguoká iiy yegetká hé kulich ubaa chúúrélle héf ma ˈgiˈgisan, ˈjietlé hí manyjasichoká érle taalle bííyyo hai kekeme, muí yie.

¹² Hééllá ˈdugaka gál Waag hemuumuritle ubaa iiy yeen Yíésu iiy yieká ki ˈgieká hí mé ki chirsat.

¹³ Aalé yú ˈdéé hót úr gaa maale, ˈdéé hót kieye, Hééllá warˈgát gaa véer: Káána ubaa biiy met ki suoyyééllá gál iiy yeenlé ˈdaa Máá Guđo Kirísto ka ˈguoká ˈdaalleka gaal hí yegeská ebá Waag hí ˈdú ˈjiiy! chie. Aalé Hím Naasan Waaˈgiet kieye, Iiy-hí! Gálallá laatlé lađaanallá hefle hai ˈgiita. Gálallá húgúmle ˈduuwle hai hogodho.

Les ˈguomle ubaa saanollé vinnaká muranlé

¹⁴ Aalé yú nyáˈdow édh-, máá hát iny máádhat ká yaal-, shóte horkiká mé ká ˈguo-, faaˈd órof-, allé-, gaalí ˈguom ki mumuratká gíl ka ˈguoká hí ˈdú ijoká arge.

¹⁵ Aalé máá éíy taaka-, ˈgasso-, urruká đo ˈBíl Waaˈgiet yé gáá ˈdie, máá nyáˈdow ˈdú ijoká af ˈdérká ki geey, kieye, ˈDaa giri les ˈguomle hát ˈdabaanká hite-, tá aadh ˈgas ˈguom me ˈdonyká ali kí ˈdiiyyeká, faaˈd kua ˈguom muranká éew, ˈguom mur, muí mú yie.

¹⁶ Aalé máá nyáˈdow ˈdú ijoká faaˈdlé ˈguom muranká les ˈdug gaa waanie, les ˈguomle đo muí mé ˈdoy.

¹⁷ Aalé máá éíy taaka-, ˈgasso-, urruká ˈBíl Waaˈgiet úr gaa yaalká yé gáá ˈdie. Mu íín úba faaˈd órof-, alléká gíl ká ˈgaa.

¹⁸ Aalé máá éíy taaka-, ˈgasso-, urru-, ˈjiet fargogintle ˈguoká kúb suoryoká álle yé gáá ˈdie. Máállá máá ˈgasso-, urru-, faaˈd órof-, alléká ˈguo kinaal hí af ˈdérká ki geey, kieye, Saano vinna lesietká hé hisse. Faaˈd kua allééllá éew, saano kinaal ˈgulamle hol ˈdú mur, yie.

¹⁹ Aalé máá ˈgasso-, urru kinaal faaˈdlé giriká les ˈdug gaa waanie, les saanollé vinnaká ˈgulamle hol ˈdú mure, ˈgulam kinaal Waag idholle állé gaa guđo-, gaalí gaa ˈduˈduoká ki laalame.

²⁰ Aalé saano vinna kinaal gaalí ˈjien sug Waag állé idhoká gaa ˈdue. Ál kinaal đo fas hí gaa fame. Fás gaa múúgantle ubaa farich ˈdermitle tikiˈde. Fas ˈdáb gaa fameká fagintle ki ˈgas ki sedheka sienyle ram hí tomon tikiˈde a afur.