Kí Edhesiny 13 - Fayam Midhab Yiesu Kiristoká He Hol Af Iđiny Kaanaká

Bíních kach ˈguo-, bás yé gáá ˈdieká

¹ Aalé yú bíních kach ˈguo-, gaas hí tomon-, gaas tomon kinaal shotam kansimoká eiy taat hí gaa ˈgie-, ubaa met hí tiiya-, met tiiya kinaal meet Waag chachareká eiy taat ka ˈguo-, bás yé gáá ˈdeˈdemeká arge.

² Bíních kach ˈguo-, yú argééllá hát múóro ká yaalla, kor ˈgas hí taaka, ˈgasle súm guguđáan, dhúr ˈdaláfaká he ká ˈgaa, afle hát af luoch. Aalé áních giriká bíních kach ˈgúóllá fargogínt ubaa kara guchiká tá kansim guđo-, he ki mumuroká ˈguoká úba shie.

³ Bíních kach ˈgúóllá metlé ˈguoká mé tikiˈd liil onnônyka hí chegieská he ká ˈgie, kor liil kinaal hí fayante. Aalé les gállé hí gaa ijoká lulle binich liilléél fayantle af ˈdabe, binich el gaa veere.

⁴ Aalé anich hemuumuritle bíních kach ˈgúóllá shie. Gálaat ˈdaa kinaal ˈdugaka áních kinaal met les kurram gaa ˈdane, meey. Gaal úba bíních kach ˈgúóllá met les kurram gaa ˈdane, meey, kieye, Mááya bíních kach ˈgúóllá ká yaalla? Bíníchallá hé máá níínní hol yegeská mán! yie.

⁵ Aalé binich anich hí ere ˈdeem hol meeny-, ubaa Waag chaarim hí yé gáá ˈdeˈdeenká shie. Anich binich ˈguiyam tomonaam afur a naam mé gaa fure, giri binich hát fedoká seseen-, fargogintle he ki ekemeyoká.

⁶ Binich Waag chaarim ˈdeđewká chaachare, Waag meenyle ubaa ˈbílle chaachare. ˈBíl Waaˈgiet kinaallá he Waag gállé úr gaa ijoká.

⁷ Aalé binich anich hí mé fure, giri binich Waag gállé les ˈdug ˈdú ijoká ˈdú ruruan-, gáál ká aađaat-, kidhano ubaa émeeto tá gáláát afano hí hol ká eiyyeká lulle úba he ki mumuroká.

⁸ Ameeny gál les ˈdug ˈdú ijo-, meetle Waag hátlé les ma ka kúóninyká Waag hí Élíny gaalí yieská warˈgatlé luolmitiká ma gaa véérinyká binich met les kurram hai gaa ˈdarama, binich hai meeye.

⁹ Máá nee ˈguoká hí hééllá maalo.

¹⁰ Máádhat har máá gaalí ugunanká kátaka, ha gaalí ugunma. Máádhat har máá gaalí faaˈd órofká ki yegeská kátaka, faaˈd órofká ha gaalí ki yeese. Yaalmitééllá ˈdugaka gál Waaˈgiet hí mé ki chiichirsat, hí iiy yeenlé Yíésu iiy yieká tág chirat.

Bíních les geer yé gáá ˈdieká

¹¹ Aalé yú bíních éíy taaka-, hát élínyka gaas hí naama-, ˈdéé huogonle hát ˈdéé huogon anich ki ég-, les geer yé gáá ˈdeˈdemeká arge.

¹² Bíníchallá kansim tikiˈde bíních erkobká hí ˈguoká he ˈgaa, hújíchle ki nannaa, gáláát les gaa ijoká geđia, giri gaal bíních erkob-, liil onnônyká hí chegieská hí fayanteká met les kurram gaa ˈdaraan-, memeyoká.

¹³ Bíníchallá hé gáál af ˈdaˈdabsuoká ekemeye, hát káána innum gálaatka ˈjiete he úr gáá lelesia, ˈjiet les ˈdú gáá okoˈdmooto.

¹⁴ Binich hé gáál af ˈdaˈdabsuo-, ekemeyo-, bíních erkobká gaa aargiróóllá ˈdaalleka in gáláát les ˈdug ˈdú ijoká ki nyiimita. Tá binich gáál he ki mure, giri gaal bíních faaˈd órofká hí muˈde-, liil onnônyká hí chegieská ˈgie-, kor bieká yaalmitle gaalí tág nannuoká.

¹⁵ Binich hé fargogínt ˈguo, giri bíních erkobká yaalmitlé gaalí tág nieká hím ki nannuo-, he loolnot-, he ˈdéé hogodhoká. Aalé bíních erkobká yaalmitlé gaalí tág níéllá ˈdéé mure, kieye, Ameeny gál ye met les kurram gaa ˈdaraan-, ye memeyoká điidhoká gon gaalí yies, yie.

¹⁶ Aalé bíníchallá gálaat lulle he ki mure, gál niginiká yíekaʼ, gál guguđoká yíekaʼ, gál kaamúreká yíekaʼ, gál he maamanká yíekaʼ, gál gédeká yíekaʼ, gál ađaaká yíekaʼ, gaalí gillé ˈdaa naanietká, muuninyka, met bala guguoká.

¹⁷ Máá gúíyallá mánká hé shokodaam ma higian, muuninyka, hol ma gaa mamadiny. Gúíyallá he bíních erkobká meenylé, muuninyka, meenyle túóyle gúíylé.

¹⁸ Hééllá ˈdaalímo hegete. Máá kás ˈguo-, he hol eiy gaa nannasatká hí bíníchallá túóyle hélle kimisat. Túóyallá he túóy máádhát, túoy he kúˈd le, tómón eiy le, tá a le.