Héberew 9 - Fayam Midhab Yiesu Kiristoká He Hol Af Iđiny Kaanaká

He hol af iđiny erkobká henaasanlé

¹ He hol af iđiny erkob-, Waag ubaa gál Yisirayel hí hol af iđiekáka, Waag visan hé hátle ˈgayye, héétí hé ˈbíllé Waag visan lesalloká ˈgayye.

² Aalé ˈBíl ˈbaaro Waag visan kinaallá ger hí naama. ˈBíl geer erkobká hé hí gaa ijeká he hé gaalí nyátáá ˈdú iđimieká ubaa kára, tá balasha gaalí Waag met gaa iđimie-, gaalí kára kinaal ˈdú iđimieká. ˈBíl geer erkob kinaallá Ál ˈDúwa-, Kiatoká gaalí yegie.

³ Đafar ˈbíl toom gaa tielká sugle he ˈbíl geer ki naamaká. ˈBíl geer ki naama kinaallá Ál Súm ˈDúwa-, Kiatoká gaalí yegie.

⁴ ˈBíl geer kinaallá hélle he kúb gaalí hórkí ˈdug ki saale-, gaalí éru ˈdug gaa ˈdunmayká ubaa sanˈdug he hol af iđiny-, gaalí úba hórkí ˈdug ki saaleká. Sanˈdug kinaallá hé hí gaa ijeká he óngʼólích gaalí hórkí tág gaa nie-, mánna hí gaa iđeká ubaa Ááron gasarlé gurf ˈgileebká ˈgayyeká, tá waar Waag hí hemuumurit he hol af iđinyká gaa veeˈdeká.

⁵ Sanˈdúg met ˈdinnam hullaalle kérub taata hí ˈdug ˈdú ˈgiiyye. Kérub toomle he Waag állé súm ˈdúwaká. Kérub kinaallá kuolle sanˈdúg ˈdugo he gaach ˈdú koyye. Ál kinaallá he ál máá méte suoryoká hí aany suoryoká fásle ki ˈdarame-, ađaabano gálaat Waag hí egeyyeká. Hééllá lulle káánaka, hé ál ke ki ˈdaakayyoká mán.

⁶ ˈBíl ˈbaaro Waaˈgietallá shokodaamlééllá gaalí hatallá hol tág ki koyka, in gál suoryoká aadh lulle ˈbíl geer erkobká higile, hújíchlé Waag met ki ˈdeˈdemeká nannie.

⁷ ˈBíl geer ki naamaká, máá méte suoryoká tákáma hí higile. Mu wár tikiˈdeká ˈbíl geer kinaallá kulich tikiˈd tákáma gaa higile. Mu ali higileká ađaable ˈdugaka suor he Waag ki ˈgaleká fásle ubaa ađaabano gálaat hí hile-, gaalí moonnoyká ˈdugaka suor he ˈgaleká fásle he ali ki higile, giri Waag Állé Súm ˈDúwa kinaal fás ki ˈdaraanká.

⁸ Henaasanééllá ˈdaalleka Hím Naasan Waaˈgiet hé gáál ka geđichoká he giri bár ˈBíl ˈbaaro Waaˈgietallá he les gaa ijeká Waag hé Ál Súm ˈDúwa-, Kiato-, uratiká ˈgíérích gálaat hí ki higiloká hátle gálaat ma kí edhesînyká.

⁹ ˈBíl ˈbaaro Waaˈgietallá ubaa henaasanlééllá hé hé muun gáál bárallá gaa oonisuoká ˈguo. He onisiny kinaallá he hé shiicho gaalí Waag shigieká ubaa suoryam gaalí Waag ki ˈgaˈgaleká hát fargogint gáál kasle ˈduuwasicheká mánká.

¹⁰ Henaasanééllá taalle hé koonyiet, ubaa hé imi, tá bie gim naan met hí hol ká eiyyeká ˈdaallé he ki taalla. Atimééllá in gálaat hí el gaa igire, ˈjíig Waag gáál ˈgíérích kaanallóóllá yé kí ˈdeeyche.

Suor Kiristo suoryam lulle ˈdú ˈdúwa

¹¹ Aalé káánaka, Kirísto hé Máá méte suoryo-, he lullé ˈdabaan-, yé ka ˈdíéllá máállé hí mé ki yaalká yie. Mu hé ˈBíl ˈbaaro-, ˈdúwa-, urati-, gálaat hí ma ˈdísiny-, lés Waag hí ka kuonnééllá ma ˈdú yaalinyká hile.

¹² Mu hé Ál Súm ˈDúwa-, Kiato kinaallá ˈdaa fás aiyiet ubaa fás aar rúóreká ma ki híliny, mu fásle ˈdaallé he ali ki hile. Mu ál kinaallá a tikiˈde he ki hile, in muun gáál rúbách luolmit biiyoká ˈgayyoká shie.

¹³ Yaalmit kissoká fás aiyiet ubaa fás aar rúóreká, tá maaˈd gaalí ˈdunayká egle gál suoryoká hí gál saas ˈgieká ki ˈdarame, giri gáál gónle saas gaa dhidhiˈdoká.

¹⁴ Ebá fás Kiristo hát hééllá lulle súm ˈdú ˈdúwaká dhaayyíe! Máá Kirísto lééllá ˈdaa Hím Naasan bííyyo ali iđokáka in hol sillie, hol suor hoy, suorlé saas mánnallá Waag shie. Mú fásle hé muun gáál dhiire, tawunykúnno hol gáá lay, giri ke henaasan fargogínt mánnallá haađuo-, ke Waag bííyyo ali iđóóllá vivisat-, ke hújíchle nannuoká.

¹⁵ Hééllá ˈdaalle ˈdugaka in Kirísto he af iđiny kaanáállá máállé Waag ubaa gálaat hol higilsuoká yie, giri gál Waag hí ká viiyyeká luolmit biiyo-, Waag hí af iđicheká aargiroká. Kirísto kúfáchlé he kufééllá, he giri gaal hé ˈdeđew-, he af iđiny erkobká gaa hileká ađaabanolle ubaa nyuogimlé kinaal gáál gaa egewká.

¹⁶ Af giri máádhat kamurle hátlé gaalí eiy mumuratká warˈgatle verenoká, mú kamurlé kinaallá ˈdaab mu ma kúfinyká hé máá hí eiy mumuratká mán.

¹⁷ Máádhat he kufeka, yaalmit muí warˈgát gaa veere kinaallá in gálaat hí el gaa verene. Mu hátlé les ˈdú ijoká gálaat hé gáál ma haađiny, gaal hé muí warˈgát gaa veere kinaallá eiy ma mumuran.

¹⁸ Yaalmit tikiˈdééllá, he hol af iđiny erkobká suor mannânyka, hé fargogínt mannayye.

¹⁹ Af giri Móshe hemuumurit Waag hí shiicheká ˈdeemle lulle gál Yisirayel geeyká, in mu wala búrká dhúrle ubaa hísob ráshle shuunne, fás aar rúóreká ubaa fás aiyiet bie hol ˈgieká ki tie, warˈgat hemuumuriti kinaal ubaa gaal íín lulle ki ˈdoy,

²⁰ kieye, Hééllá he fás he hol af iđiny-, hemuumuritle Waag hí itín ki muˈdeká, muí gáál yie.

²¹ Hát tikiˈde kinaallá ˈBíl ˈbaaro Waaˈgietká ubaa shokodaamlé he naasanká muí fás ki ˈdoy.

²² Aalé hemuumurít ˈdaalleka, he lulle gúch fásso hí dhidhira, tá suor fásle ma okodoonka, Waag hé gálaat ađaabanolle ubaa nyuogimle ma haađiny.

²³ ˈDaa kinaallá ˈdugaka, ˈBíl ˈbaaro Waaˈgiet les ˈdú ije-, ubaa héllé hí gaa ije-, hé uratiká ka yaalallá suoryam fásle hí dhidhireká he hegete. Tá ˈBíl ˈdúwa-, Waaˈgiet uratiká suor suoryam aanyiet far ˈdú gogiyyoká he hegete.

²⁴ Kirísto hé Ál ˈDúwa-, Kiato-, gaalí ˈdisseká ma híliny. Ál ˈDúwa-, Kiato-, gálaat hí gílle ki ˈdissééllá he taalle ál uratíítíá yaalmitlé. Aalé Kirísto hé ál uratíítíá hile, in káána ˈdaakúnnoka Waag met gaa yaalla.

²⁵ Mu úratíá hilééllá, geđi suoryó hol ká hođia muuniny. Mu hé hát máá méte suoryo-, fás fásle muuninyká egeet-, Ál Súm ˈDúwa-, Kiato-, lesalloká wár tikiˈdeká a tikiˈd ki higiloká muuniny.

²⁶ Kirísto hát gál méte suoryóótíá onnônyka, af kinaalka biiy mé gáá koonle tá ˈjíig káána đigallá af burnayká he ki maanyjay, ki kufume. Aalé káána-, biiy el ˈdaalka mu ká yimie, hol a tikiˈd suor ki hoy, giri gálaat ađaabano ubaa nyuogim gaa egewká.

²⁷ Aaléka, máádhat a tikiˈd tákáma he ki kufuma, tá hé kinaal el ˈdaalka hé ˈdéé ki iđiny hí egeto.

²⁸ Hát tikiˈdééllá in Kirísto a tikiˈd hol suor ki hoy, giri gálaat ađaabano ubaa nyuogim gaa egewká. Mu hollo hol ká naadha, tá mú hol ka naanlééllá hé ađaabano ubaa nyuogim gálaat ˈdaalle ˈdugaka muuniny, he gál mú met egesoká muí luolmit biiyoká ˈdú gáá siidhoká.