Héberew 8 - Fayam Midhab Yiesu Kiristoká He Hol Af Iđiny Kaanaká

He hol af iđiny kaanaká máállé méte suoryoká

¹ Hé nyí huogotééllá ˈdeenyle hééllá: Múún hé ke Máá méte suoryo-, Waag ˈdúwaká karallé guchi-, uratiká ˈdaa naaniet yíéđieká ˈguo.

² Máá kúnnaa méte suoryóóllá ˈBíl ˈbaaro-, ˈdúwa-, urati-, gálaat hí ma ˈdísiny-, Waag hí ˈditeká geerle állé súm ˈdúwa-, kiatoká he hujich gaa nannaa.

³ Ameeny gál méte suoryo-, Waag hí hujich mé ki koyyééllá, he giri gaal hé shiicho ubaa suoryam Waag shiguoká. ˈDaa kinaallá ˈdugaka in Máá kúnnaa méte suoryóóllá úba héllé shiichoká Waag shie.

⁴ Mu hátle lésallá ˈdú iđînyka hé máá suoryo muuniny. Hééllá he ˈdaa giri gál suoryoká les gaa ijo-, ˈdaa hemuumurit Moshekáka hé shiicho Waag shiguoká.

⁵ Gál suoryóóllá ˈbíl he hujich gaa nannuoká ubaa hújíchlé nannuoká hé úr gaa ijoká he hol ki ekenyle ubaa yaalmitlé he ká yaalla. ˈDaa kinaallá ˈdugaka in af giri Móshe ˈBíl ˈbaaro Waaˈgietká ˈdiˈdiseká Waag hí geeyche, kieye, ˈBíl chia ye kí ˈdiˈditóóllá yaalmit lulle yú ko gúm álle kí edhesieká tákámle kí ˈdis, chie.

⁶ Tá Máá kúnnaa méte suoryóóllá hújíchlé Waag hí mé ki koyyeká hé gál suoryóóllá hújíchle súm ˈdú ˈdúwa. Mu íín he Máá he hol af iđiny kaana-, Waag ubaa gálaat hol higilsuo-, he hol af iđiny kissoká ˈdú ˈdúwaká. Hééllá he ˈdaa giri he hol af iđiny kaana-, Waag hí yé ká ˈdeeychééllá héllé Waag hí gálaat af iđicheká hé kissoká ˈdú ˈdúwaká.

⁷ He hol af iđiny kissóóllá har ˈdeensen mannânyka, he hol af iđiny kaanallóóllá hé onnônyka Waag hí yé ma ka ˈdeđîny.

⁸ Waag ˈdaa giri gál heleká ˈdéént gaa argiyyeká kieye, Bar ali hai kí ˈdeenne, giri he hol af iđiny kaanaká yú yé ká ˈdeđuoká. He hol af iđiny kinaallá yú ubaa gál Yisirayel tá gál Yuuˈda nyí hol af iđimicha.

⁹ He hol af iđiny kinaallá hé hát he hol af iđiny yú ubaa gáál eshim eshimle nyí héle hol af iđicheká muuniny. Bár hele kinaallá yú gáál gil gaa chiˈde, gáál lés Misirayam yé gáá ˈdeey. Tá gaal ˈdaa giri he hol af iđiny kisso kinaal ma ˈduwânyká in yú gáál gíl sug ki hay.

¹⁰ He hol af iđiny kaana-, ka chiimeto-, yú ubaa gál Yisirayel nyí hol af iđimichaká hééllá: Hemuumuritchú gáál kasle ha yú gaa iđimia, gáál gerle ha yú gaa kakaa. Yú gáál Waagle ha yeedhe, gaal íín gálchú hai yeedhe.

¹¹ Gaal af kinaallá hé gállé Yisirayel yíekaʼ, gállé hol léká yíekaʼ he a tatuo-, kieye, Máá Guđo Waag ónob, yegetká mán. Hééllá he ˈdaa giri gálaat lulle-, máá guđoká yíekaʼ, máá ninniká yíekaʼ, ye onodheká.

¹² Gaal héllé ˈdeeđeneyká ha yú haađia, gáál ađaabanolle ubaa nyuogimle hé geđ ye táb ma ká ˈjeeminy, he chie.

¹³ Waag he hol af iđinyééllá he hol af iđiny kaanaká chíéllá, he ˈdaa giri he hol af iđiny erkobká muí hé hujich hí beeyká hoyká. Ameeny hé hujich hí beeyká ál ˈjóbo gaalí gaa gaadha.