Dhesaloníke Erká 2 - Fayam Midhab Yiesu Kiristoká He Hol Af Iđiny Kaanaká

Báulo hol ˈdéé ˈdú huogodhe

¹ Nyaaramkínyo, af ki ˈdím kínyaa ke hí af kí ˈdieká hát hé taalle halleelloká muuniny-, hé ˈdúwaká hí yé gáá ˈdieká it óg.

² Af giri hátle ke hí ma ˈdú gáá yímen-, nyí Filíbi gaa iđe-, gaal nyí hát ˈdeđewká ki sedhe-, nyí manyjayyeká it óg. Har káána úba he il hí nyí argiyyeka, Waag nyí nyaalím shiiche, Fayam Midhab Waaˈgietallá ke hí ki ˈdiiyime.

³ Churiny ke hí chureká, hé ˈdaa nyimisan ubaa hé tagle muuninyká muuniny. Héétí úba hé ˈdaa điđamo muuniny.

⁴ Hé kinaallá afle in nyiin hát gál Waag hí galayche-, Waag hí Fayam Midhaballá af kí haycheká nyí ˈdéé ká hogoto. Af giri nyí Waag ˈdeenyle ˈdiyeennoká he gálaato nyí ger gaa memesicha muuniny, Waag ííni hé kúnnaa ger geđiká ógallá nyí geer gaa memesicha.

⁵ Nyiin hát nyí kálta churiny tag ki ˈdimiká ke hí ma ki chúrinyká it óg. Waag he misikirkínyo, nyiin nyáá nyí ke hí hát điđamoká ma ki ˈdíiny, ke hí he ma gaa árginy.

⁶ Héétí nyáá nyí itín ubaa gál éíy taaka meeny hí nyí memeychoká ke hí ma ˈdu gáá ˈgéˈgen.

⁷ ˈDaa giri nyiin nyí gál alb fimi-, Kiristokáka, ke hí he ki mumureká nyáá nyí uˈde, kor it ke hí hát kinaallá ma ki síen, hát ˈjieyye urgúaka hí đalbááyalle nog ki seseennoká in úba ke hí nog ki sedhe.

⁸ ˈDaa giri ke hí gielká, in ke hí Fayam Midhab Waaˈgietallá tákámle ma ki ˈdiyíminy, ke hí úba hol ˈdú sillie. Hééllá he ˈdaa giri itín hí gál nyí súm gielká chieká.

⁹ Nyaaramkínyo, hújích fargogo-, laatle nyí lađaanneká it mé ká ˈgayya. Bár kinaallá ke hí Fayam Midhab Waaˈgietal ki ˈdiyimeká kulich ubaa chúúrélle nyí hujich nanniyye, giri ke hí ílsh ma ki yégenká.

¹⁰ Hééllá itín ubaa Waago hí ˈdúúw ˈdú ˈdiiyye, giri it hí Kirísto iiy chíéllá ke hí hát saas manti-, ubaa ˈduwanti-, tá ˈdeensen mantiká ke hí ki sesemeká.

¹¹ Nyiin hát urgúaka baabá hí umle ki seseenká úba ke hí ki sedheká, it óg.

¹² Hé ke hí chuchure, ke hí gogofsie, ke hí af tatie, giri hí innum Waaˈgiet hát ˈduwantiká gaa iđoká. Waag íínííllá hé hí guchle ubaa ˈduuwle kí viiyye.

¹³ Nyáá nyí aadh lulle Waag gielmít hol ˈdú nanniyya, ˈdaa giri ˈdeeny Waaˈgiet hí nyí gaa maalleká, hát gálaat yé ma gáá ˈdíiny-, Waag yé gáá ˈdieká hí iiy chieká. ˈDeenyééllá he ˈdeeny ˈdúwa-, Waaˈgiet-, it hí iiy chíéllá hí hujich gaa nannuoká.

¹⁴ Nyaaramkínyo, it gál léskícho hí manyjasie. Manyjasiny kíchia kinaallá in hí gál Waaˈgiet lés Yuuˈdia albano eiy eiy gaa ijo-, Kirísto iiy yieká manyjasinylé gállé Yuuˈdi hí manyjasieká ennianká hoyche.

¹⁵ Gál Yuuˈdííllá in ˈbaal gál Waag hí ˈdeem ká shigicheká ubaa Máá kúnnaa Guđo Yíésu yies. Héétí nyiin úba nyí manyjasie. Gálallá hé Waag geer ma gaa memeny, gaal gálaat lullé he met il gaa ˈgee.

¹⁶ Gaal nyiin nyí gál gál Yuuˈdi muuninyká ki ˈdiyeenne-, gaal rubach aargiroká hé nyí gáá momoyo. Gáál yaalmitlééllá in gáál ađaabanolle hol ˈdú fafiyya. Tá héél el gaa igíˈdelle Waag idholle hé gaal íín ka nyuoˈde.

Báulo fiiritlé gál Dhesalonike ka ˈgieká

¹⁷ Nyaaramkínyo, ˈdaa giri rám iraam mánká ke hol gaa ˈdabeká, hé tág ke hí fiirie, innumkícho úba nyí aargiˈdeká nyí feˈde. Har káána úba ke hol in eiy ka líítaka, hé ke hí táb ˈdoˈdoot.

¹⁸ Nyíín ke hí af kí ˈdeˈdemeká nyí feˈde. Yáá Báulo lééllá af burnayká kerka ká yiimie, kor yáá sieny kinaal ma híliny. Sátan nyí sieny kinaal ká riate.

¹⁹ Itín it tág hé nyí met egeteká ubaa geer gaa meen hí nyí shigiche. Hé kínyaa af giri Máá kúnnaa Guđo Yíésu ka ˈjieka nyí mú metle ˈdúúw ki aargiˈdoká he máre? Hé kinaal hé itín muunîny?

²⁰ Itín hí ˈduuwkínyo ubaa geer gaa meenkínyo.