Zacarías 9 - DIOSPA QHELQACHISQ

Israelpa awqankuna jasut'isqa kanqanku

¹ Kayta Tata Dios Jadrac suyupaj, jinataj Damasco llajtaj contranpi nerqa, imaraykuchus Israelpa tukuy ayllunkuna, chantá tukuy runakuna ima Tata Diospatamin kanku.

² Pay nin: Noqaqa Jamat llajtata chinkarparichisaj. Jinataj qayllanpi kaj Tiro llajtatawan, Sidón llajtatawan chinkarparichillasajtaj paykuna yachayniyojpaj qhawasqa kanku chaypis.

³ Tiro llajtayojkunaqa jatuchaj sumaj jark'achasqa wasikunata jataricherqanku, chaymantaj qorita, qolqeta ima t'uruta jina tantaykorqanku.

⁴ Tukuyta Kamachej Diostajrí chay tukuyta qhechuspa, mama qochaman wijch'uykonqa, chay llajtatataj ninawan ruphaykuchenqa.

⁵ Ascalón llajtayojkuna chayta rikuspa, mayta mancharikonqanku. Gazapi tiyakojkunapis sinch'ita ñak'arillanqankutaj. Ecronpi tiyakojkuna yanapata suyakusqankupis qhasi manakajlla kanqa. Gaza llajta mana kuraj kamachejniyoj qhepakonqa, Ascalonpi tiyakojkunamantataj mana pipis puchonqachu.

⁶ Asdodpeqa tukuy imaymana waj llajtayoj runakuna tiyakonqanku, noqataj filisteokunaj runaykachasqankuta k'umuykuchisaj.

⁷ Yawarniyoj aychata mikhusqankuta siminkumanta qhechusaj, jinallataj mana mikhuna kajtapis. Chaywanpis, chaykunamanta wakinkuna noqapaj qhepakonqankuraj. Chantá paykunaqa Judá aylluwan ujlla kanqanku, Ecronmanta kajkunataj jebuseokuna jina kanqanku.

⁸ Noqataj aylluypa muyuyninpi sayaykuspa, paykunata waqaychasaj. Ñak'arichejqa manaña paykunata ñak'arichenqañachu, imaraykuchus kunan noqa paykunata qhawasaj.

Israelpa jamoj kuraj kamachejnin

⁹ Sión llajta, sinch'ita kusikuy. Jerusalén llajta, kusiymanta takiy. Kuraj kamachejniykeqa cheqan, atiyniyojtaj jamusonqa. Llamp'u sonqo kaspa, payqa burropi lloq'asqa jamusonqa, china burroj uñan, maltun burritopi.

¹⁰ Paymin Efrainpa carretankunata phirenqa, Jerusalenpa caballonkunatapis chinkachenqa, jinallataj flechana arconkutapis p'akirparenqa. Chantá tukuy suyukunaman allinpi kawsakuymanta willaranqa, kamachenqataj uj mama qochamanta ujnin mama qochakama, Éufrates mayumantapachataj kay pachaj tukukuyninkama.

¹¹ Tata Dios kayta nin: Jerusalén, yawarwan tratota ruwasqanchejrayku, pikunachus presochasqa kaspa mana yakuyoj ukhu t'oqoman wijch'uykusqa karqanku, chaykunata chaymanta orqhosaj.

¹² Pikunachus kacharichisqa kayta suyakojkuna, sumaj jark'achasqa wasiykichejman kutimuychej. Noqa niykichej, ñak'arisqaykichejmanta uj jinatawanraj kutichipusunaykichejta.

¹³ Judata flechana arcoyta jina mat'iniña, Efraintataj arcoyman flechata jina churaniña. Sión llajtaytapis espadaman tukuchillasajtaj. Mirayniykitataj Greciaj mirayninpa contranpi oqharichisaj.

¹⁴ Tata Diosqa maqanakuman ayllunpa ñawpaqenta renqa, jinaspataj, illapata jina flechankunatapis kacharenqa. Tukuyta Kamachej Tata Dios putututa waqachispa, muyoj wayra chawpipi urayninta renqa.

¹⁵ Tukuy Atiyniyoj Tata Diosqa paypata kajkunata waqaychanqa. Paykunataj warak'ajkunaj ruminkuta saronqanku, awqankutataj phirenqanku. Ujyanqanku machanankukama, vasonkuta yawarwan junt'achenqanku, imaynatachus altarman ch'ajchunapaj yawarta vasoman junt'achinku, ajinata.

¹⁶ Chay p'unchaypi Tata Diosqa ayllunta awqankumanta kacharichenqa oveja tropata jina, paykunataj kikin llajtankupi pillupi valorniyoj k'achitu rumi jina lliphipirenqanku.

¹⁷ Suyunkoqa may sumaj, may munaymin kanqa. May chhika trigowan, vinowan kasqanrayku, waynakuna, sipaskuna ima kallpasapa wiñanqanku.