Zacarías 8 - DIOSPA QHELQACHISQ

Tata Diospa nisqan

¹ Chantá Tukuy Atiyniyoj Tata Dios kayta niwarqa:

² Noqa Tukuy Atiyniyoj Tata Dios ajinata nini: Sionmanta anchatapuni celosakuni, payta munakusqayrayku.

³ Chayrayku Sionman kutisaj, Jerusalenpitaj tiyakapusaj. Chaypacha Jerusalenqa Cheqanta Purej Llajta nisqa kanqa. Tukuy Atiyniyoj Tata Diospa orqontaj Diospaj T'aqasqa Orqo nisqa kanqa, nispa.

⁴ Noqa Tukuy Atiyniyoj Tata Dios nillanitaj: Watej Jerusalenpa plazankunapi unay watayoj qharikuna jinataj paya warmikunapis tiyarikonqanku, unayniyoj kasqankurayku tojnunkuman atiykukuspa.

⁵ Qhari wawakuna chantá warmi wawakunapis calle junt'ata pujllarikonqanku.

⁶ Chay p'unchay chayamojtin, aylluymanta puchojkunapaj t'ukunapaj jina kanqa. Noqatajrí mana chaymanta t'ukusajchu, nispa nin Tukuy Atiyniyoj Tata Dios.

⁷ Tukuy Atiyniyoj Tata Dios nillantaj: Noqamin aylluyta kacharichisaj inti llojsimuynejpi suyoj atiyninmanta, jinataj inti yaykuynejpi suyumantapis.

⁸ Chaymantataj paykunata Jerusalenman pusasaj chaypi tiyakunankupaj. Chaypacha paykuna aylluy kanqanku, noqataj Diosninku kasaj, nisqayta junt'aspa, justiciata ruwaspataj, nispa.

⁹ Noqa Tukuy Atiyniyoj Tata Dios nillanitaj: Temployta watej ruwanapaj cimientonta churasqaykichejmantapacha kunankama qankuna sut'inchajkunanejta imatachus noqaj nisqayta uyarishankichej. Chayrayku kallpachakuychej.

¹⁰ Kunankama mink'asqa ruwajkunapaj mana pago karqachu nitaj uywakunapajpis mikhuna karqachu. Chaypi tiyakojkunapaj awqankurayku manallataj allin kawsay karqachu, imaraykuchus noqapuni ujkuna ujkunatawan contranpi churarqani.

¹¹ Kunantajrí kutimoj israelitakunawan manaña ñawpajta jinachu kasaj, nispa noqa Tukuy Atiyniyoj Tata Dios nini.

¹² Paykuna ukhupi allinpi kawsakuy tarpusqa kanqa. Uva sach'akunapis poqonqanku, chajrata tarpusqankupis ima munayta poqorenqa. Parapis paramullanqapuni. Noqataj kutimoj israelitakunaman kay tukuy imata paykunajta kananpaj qosaj.

¹³ Imaynatachus qankuna Judamanta, jinataj Israelmanta kajkunapis waj suyukunapi maldicisqa jina karqankichej, ajinallatataj kunanqa noqa kacharichisqaykichej, jinamanta waj suyukunaj kusikuyninku kanaykichejpaj. Chayrayku, amapuni manchachikuychejchu, manachayqa kallpachakuychej, nispa.

¹⁴ Tukuy Atiyniyoj Tata Dios kaytapis nillantaj: Ñawpa tataykichejkuna phiñachiwajtinku, noqa nej kani paykunata jasut'inayta, jinataj paykunata jasut'erqani.

¹⁵ Kunanrí Jerusalenpaj, Judapajwan tukuy allin kajta ruwanayta nini. Chayrayku ama manchachikuychejchu.

¹⁶ Qankunaqa kayta ruwanallaykichejpuni tiyan: Ama ujkuna ujkuna llullanakuychejchu. Chantá justicia ruwana wasipi cheqan justiciata ruwaychej, allinpi kawsakuytataj mask'aychej.

¹⁷ Ama mana allin kajta qankunapura ruwanakuychejchu, amataj llullakuspa tiluychejchu, imajtinchus noqa chay tukuyta millachikuni. Ajinata noqa Tata Dios nini.

¹⁸ Tukuy Atiyniyoj Tata Dios kaytawan niwarqa:

¹⁹ Judajpa miraynin tawa kaj killapi, phishqa kajpi, qanchis kajpi, jinataj chunka kaj killapi ayunasqankoqa paykunapaj kusiyman tukonqa, uj raymi jinataj kanqa. Chayrayku munakuychej ari cheqan kajta, allinpi kawsakuytapis, nispa.

²⁰ Kayta nin Tukuy Atiyniyoj Tata Dios: Waj suyukunapi, waj llajtakunapi ima tiyakojkuna Jerusalenman jamonqanku.

²¹ Paykunataj llajtamanta llajta purispa, nenqanku: Jakuchej, Tukuy Atiyniyoj Tata Dios saminchanawanchejta mañakoj, jinataj payta yupaychaj ima, nispa. Wajkunataj kutichenqanku: Noqaykupis risqayku, nispa.

²² Ajinamanta Jerusalenman runakuna jamonqanku atiyniyoj suyukunamanta jinataj ashkha llajtakunamanta ima Tukuy Atiyniyoj Tata Diosta mask'aj, yanapananta mañakunankupaj.

²³ Chay p'unchaypi waj llajtakunamanta chunka runakuna uj judíoj p'achanmanta jap'iykukuspa, nenqanku: Qankunawan riyta munayku, imaraykuchus uyariyku qankunawan Dios kasqanta, nispa.