Zacarías 7 - DIOSPA QHELQACHISQ

Diospa mana munasqan ayuno

¹ Kuraj kamachej Darío tawa watataña Babiloniapi kamachishajtin, Quisleu nisqa jisq'on kaj killamanta tawa kaj p'unchayninpi, Tata Diosqa sut'inchaj Zacariasman parlarqa.

² Chaypacha Betel llajtayojkunaqa Sarezerta, Reguen Melecta yanapajninkukunata ima kachasqanku, Tata Dios yanapananta mañakunankupaj.

³ Jinapi, Tukuy Atiyniyoj Tata Diospa Templonpi kaj sut'inchajkunata, jinataj sacerdotekunata tapoj rispa, nerqanku: Sapa wata phishqa kaj killapi noqayku qhashqa p'achawan p'achallikuspa, ayunallasqaykupunichu, imaynatachus kunankama ayunayta yachayku, jinata? nispa.

⁴ Chantá Tukuy Atiyniyoj Tata Dios niwarqa:

⁵ Kayta niy tukuy aylluyman, jinataj sacerdotekunamanpis: Qankuna phishqa kaj killapi, qanchis kaj killapipis, qanchis chunka watataña qhashqa p'achata churakuspa, ayunaj kankichej. Chaywanpis mana noqata jatunchanawaykichejpajchu chayta ruwarqankichej. Jinallatataj qankuna raymikunapi mikhuspa, ujyaspapis, chaytapis qankunallapaj ruwankichej.

⁶ Manachayqa qankuna raymipi mikhuspa, ujyaspapis, manachu qankunallapi yuyaspa ruwankichej?

⁷ Manachu Tata Dios ñawpa sut'inchajkunaman kikillantataj nerqa, maypachachus Jerusalén ashkha runayoj llajta karqa, manataj ni ima ch'ajwapis karqachu Judea jap'iypi kaj llajtakunapi, Neguevpi, chantá Sefela pampakunapipis, chaypacha? nispa.

Mana kasukoj kasqankurayku wijch'usqa karqanku

⁸ Tata Diosqa sut'inchaj Zacariasman parlaspa, nillarqataj:

⁹ Kaytamin noqa kamachini: Cheqan justiciata ruwaychej, jinataj ujkuna ujkunapaj khuyakuyniyoj, allin k'achataj kaychej.

¹⁰ Ama ñak'arichiychejchu warmisapakunata nitaj wajcha wawakunatapis, nitaj waj llajtayojkunata, nillataj pisi tiyapuyniyojtapis. Amallataj yuyallaychejpischu runa masiykichejpa contranpi mana allinta ruwayta, nispa.

¹¹ Ñawpa tataykichejkunatajrí mana kasuta ruwawarqankuchu. Tukuyninku wasanchawarqanku, mana uyarejtaj tukorqanku.

¹² Sonqonkuta chuki rumita jina rumiyacherqanku, chantá Tukuy Atiyniyoj Tata Diospa kamachisqanta, yachachisqantapis mana kasorqankuchu, mayqentachus ñawpa sut'inchajkunaman Espiritunnejta willarqa, chayta. Chayraykumin Tukuy Atiyniyoj Tata Dios manchaytapuni phiñakuspa, nerqa:

¹³ Paykunata wajyashajtiy, mana uyariwayta munarqankuchu. Ajinallatataj qhaparikamuwajtinku, noqapis mana paykunata uyarisajchu.

¹⁴ Chayrayku muyoj wayra jina paykunata ch'eqeracherqani mana rejsisqa karu suyukunaman, chay qhepatataj llajtanku ni pejpa tiyakunan ch'inman tukorqa. Paykunamin chay jina k'acha suyuta ch'inman tukucherqanku, nispa.