Zacarías 6 - DIOSPA QHELQACHISQ

Tawa carretata mosqoypi jina rikun

¹ Chaymanta mosqoypi jina rikullarqanitaj tawa carretakunata, chaykunataj broncemanta iskay orqokunaj chawpinmanta llojsimusharqa.

² Ñawpaj kaj carretata puka caballokuna aysasharqanku, iskay kaj carretatataj yana caballokuna.

³ Kinsa kaj carretata yuraj caballokuna aysasharqanku, tawa kajtataj yuraj q'ellu caballokuna.

⁴ Chantá pichus parlashawarqa, chay angelta taporqani: Wiraqochíy, imatataj kay niyta munanri? nispa.

⁵ Angeltaj kutichiwarqa: Chaykunaqa janaj pachaj tawantin wayrankuna kanku, mayqenchus Tukuyta Kamachej Diospa ñawpaqenmanta tukuy kay pachaman llojsimunku, chaykuna.

⁶ Yana caballokunaj aysasqan carretaqa wichaynejman rishan, yuraj caballokunaj aysasqan carretataj inti yaykuynejman, yuraj q'ellu caballokunaj aysasqan carretataj uraynejman, nispa.

⁷ Jinapi chay kallpasapa caballokunaqa tukuy kay pachata muyoj rinankupaj imata jina llojsimorqanku. Jinallamanta angelqa paykunata nerqa: Tukuy kay pachata purimuychej, nispa. Paykunataj nisqanman jina kachaykukorqanku.

⁸ Chay qhepatataj ángel qhaparimuwarqa: Wichaynej suyuman rejkunaqa chay suyupi Tata Diospa phiñakuyninta thasnonqanku, nispa.

Josueta pilluchanku

⁹ Chaymantataj Tata Dios parlaspa, niwarqa:

¹⁰ Pikunachus Babiloniaman apasqa karqanku, chay kutimojkunamanta Jelday, Tobías, Jedaías ima ofrendata apamushanku. Chayrayku kunanpacha Sofoniaspa churin Josiaspa wasinman rispa, chay ofrendata jap'iy.

¹¹ Chantá qolqe metalta, qorita ima jap'isqaykiwan pillukunata ruway. Jinaytawantaj, ujninta Josadacpa churin kuraj kaj sacerdote Josuéj umanman churaykuy.

¹² Chantá payta ninki: Tukuy Atiyniyoj Tata Dios nin Ijimuy Kaj nisqa qhari kikin saphinmanta wiñamunanta, chantataj Tata Diospa Templonta jatarichinanta.

¹³ Temployta jatarichejtinñataj, pay kuraj kamachej jina jatunchasqa kanqa. Chantá kamachinan tiyanaman tiyaykonqa, chay tiyananpa ladonpitaj sacerdote tiyanqa, iskayninkutaj allin kawsaypi kamachenqanku.

¹⁴ Chay pillukuna Tata Diospa Templonpi qhepakonqa, chaynejta runakuna Jeldaymanta, Tobiasmanta, Jedaiasmanta, chantá Sofoniaspa churin Josiasmanta ima sapa kuti yuyarikunankupaj.

¹⁵ Chantá runakuna karumanta jamonqanku Tata Diospa Templonta ruwayta yanapanankupaj. Jinamanta yachankichej Tukuy Atiyniyoj Tata Dios qankunaman kachamuwasqanta. Chay tukuy imataj kanqa, maypachachus qankuna Tata Diosniykichejpa nisqanta uyarinkichej, kasunkichejtaj, chaypacha.