Zacarías 5 - DIOSPA QHELQACHISQ

Mosqoypi jina k'uyusqa qhelqata rikun

¹ Ujtawan qhawarispa, rikullarqanitaj k'uyusqa qhelqata phawashajta.

² Chantá ángel tapuwarqa: Imatataj rikunkiri? nispa. Noqataj kuticherqani: K'uyusqa qhelqata phawashajta rikuni. Chay qhelqataj sayt'unman jisq'on metroyoj kanman, anchonmantaj tawa metro khuskanniyoj kanman, nispa.

³ Chantá ángel niwarqa: Chaypi, tukuy Israel suyupaj maldición kanamanta qhelqasqa kashan. Puraj ladonpi qhelqasqa kashan. Ujnin ladonpi nin pichus suwajqa chinkachisqa kananta, ujnin ladonpitaj nin qhasimanta tilojqa jasut'inamanta mana llusp'inanta.

⁴ Tukuy Atiyniyoj Tata Dios nin: Noqa chay maldicionta chayachimusaj, pikunachus suwanku, pikunatajchus qhasimanta sutiypi tilunku, chaykunaj wasinkuman yaykunanpaj. Kay maldiciontaj chayllapi qhepakonqa wasej kurkunkuna, jinataj ruminkunapis chinkarparichisqa kanankama, nispa.

Grano chimpuna ukhupi warmita rikun

⁵ Chantá noqawan parlasharqa, chay ángel nillawarqataj: Qhawariy imachus chaypi rikhurin, chayta, nispa.

⁶ Noqataj taporqani: Imataj chayri? nispa. Paytaj kutichiwarqa: Chayqa tukuy kay suyukunaj juchankuta chimpunapaj, nispa.

⁷ Chay chimpoqa titimanta kirpanayoj kasharqa. Kirpananta oqharejtinkutaj, chay ukhupi uj warmi tiyashaj rikhurerqa.

⁸ Chantá ángel niwarqa: Kay warmeqa millayta ruwanamin, nispa. Chantá chimpuna ukhuman chay warmita tanqaykuspa, titi kirpananwan kirpaykorqa.

⁹ Ujtawan qhawarishajtiy, lijrayoj iskay warmikunañataj rikhurimorqanku. Wayralla paykunata apaykachasharqa. Lijrankoqa pariwanaj lijran jina karqa, jinataj phawaspa, chimputa pataman oqharerqanku.

¹⁰ Chantá angelta taporqani: Maymantaj chay chimputa apashankuri? nispa.

¹¹ Paytaj kutichiwarqa: Babiloniapi uj templota sayachenqanku. Tukusqaña kajtintaj, chukuta ruwaspa, chayman chay chimputa churanqanku, nispa.