Zacarías 4 - DIOSPA QHELQACHISQ

Qorimanta candelerota, iskay olivo sach'atawan mosqoypi jina rikun

¹ Chantá noqawan parlasharqa, chay ángel kutirimuspa, rijch'arichiwarqa, imaynatachus puñukushaj runata rijch'arichinchej, ajinata. Chantá tapuwarqa:

² Imatataj rikunki? nispa. Noqataj kuticherqani: Noqa qorimanta uj candelerota rikuni, patanpi aceite churanayojta. Aceite churanaj muyuyninpitaj qanchis lamparakuna tiyan, sapa lamparamantaj uj tubonejta aceite yaykushan.

³ Candelero qayllapitaj iskay olivo sach'akuna tiyan, ujqa pañannejpi, ujtaj lloq'ennejpi, nispa.

⁴ Chantá noqawan parlasharqa chay angelta tapurerqani: Wiraqochíy, imatataj kay niyta munanri? nispa.

⁵ Angeltaj kutichiwarqa: Manachu yachanki? nispa. Noqataj nerqani: Mana, wiraqochíy, nispa.

⁶ Chantá chay ángel willawarqa: Kayqa Tata Diosmanta uj willay Zorobabelpaj: Atipanaykipaj noqa mana soldadokunawanchu, nitaj runaj kallpawanchu yanapasqayki. Manachayqa Espirituywanmin atipachisqayki, nispa nin Tukuy Atiyniyoj Tata Dios.

⁷ Chhika jatun orqo, imataj qan kankiri? Zorobabelpa ñawpaqenpi pampachasqa kanki. Temploj cimientonpaj sumaj kaj rumita orqhoshajtin, runakuna qhaparenqanku: Chayqa manchay k'achitu, may k'achitupuni, nispa.

⁸ Chantá Tata Dios ujtawan nillawarqataj:

⁹ Zorobabel Temploj cimienton rumikunata churarqa, kunantaj payllataj ruwayta tukonqa, nispa. Jinamanta yachankichej noqa Tukuy Atiyniyoj Tata Dios kachamuwasqanta.

¹⁰ Wasi perqay qallariypi pisillata ruwasqata rikuspa, pikunachus pisipaj chayta qhawarqanku, chaykuna Zorobabelpa tukuychasqanta rikuspa, kusikonqanku, nispa. Chantá ángel nillawarqataj: Kay qanchis lamparakunaqa Tata Diospa ñawinkuna kanku, pichus tukuy kay pachata qhawashan, chaypata, nispa.

¹¹ Chantá taporqani: Ima niytataj munan chay iskay olivo sach'a, candeleroj puraj ladonkunapi kashanku, chaykunari? nispa.

¹² Tapullarqanitaj: Ima niytataj munan chay iskay olivoj thansanri, mayqenchus lamparaman aceite yaykunanpaj qori tubokunawan khuska kashanku, chaykunari? nispa.

¹³ Chantá ángel kutichiwarqa: Manachu yachanki ima niytachus munasqanta? nispa. Noqataj nerqani: Mana, wiraqochíy, nispa.

¹⁴ Paytaj kutichiwarqa: Chaykunaqa Zorobabelwan, Josuewan ima ninakunku. Kay pachaj Dueñon Tata Diosmin paykunata t'aqarqa paypaj uj ruwanata ruwanankupaj, nispa.