Zacarías 3 - DIOSPA QHELQACHISQ

Zacarías mosqoypi jina kuraj kaj sacerdote Josueta rikun

¹ Chaymantataj Tata Diosqa mosqoypi jina, kuraj kaj sacerdote Josueta rikuchillawarqataj, Tata Diospa angelninpa ñawpaqenpi sayashajta. Chaywanpis ch'ataykoj angelpis Josuéj pañannejpi kasharqa payta ch'ataykunanpaj.

² Jinapi Tata Diospa angelnin chay ch'ataykoj angelta nerqa: Noqa Tata Dios qanta k'amiyki. Imaynatachus Jerusalenta noqapaj t'aqakorqani, ajinallatataj Josuetapis nina brasa chawpimanta orqhomusqa jina noqapaj t'aqakuni. Chayrayku noqa Tata Dios qanta k'amiyki, nispa.

³ Josueqa Tata Diospa angelninpa ñawpaqenpi ch'ichi p'achawan p'achallisqa sayasharqa.

⁴ Chayrayku chay ángel yanapajninkunata kamacherqa: Josuéj ch'ichi p'achanta lluch'uychej, nispa. Chantá Josueman kutirispa, chay ángel nerqa: Qhawariy, chay niyta munan juchayki pampachasqaña kasqanta. Kunantaj kamachisaj llimphu mosoj p'achawanñataj p'achallichisunankuta, nispa.

⁵ Chantá ángel nillarqataj: Umanman sacerdotepaj llimphu ch'ulutapis churallaychejtaj, nispa. Ajinaqa Josuéj umanman mosoj ch'uluta churaykorqanku, mosoj p'achawantaj payta p'achalliykucherqanku. Chaykamataj Tata Diospa angelnin chaypi sayashallarqapuni.

⁶ Chantá Tata Diospa angelnenqa Josueta yuyaychaspa, tukuy sonqo nerqa:

⁷ Tukuy Atiyniyoj Tata Dios kay jinata nisunki: Sichus kamachisqayta kasuspa purinki, tukuy kamachisusqaytataj ruwaspa junt'anki chayqa, kay Temploypi kamachinki, jinataj pationkunatapis qhawanki. Chantá kamachisqayta junt'aj angelkunawan khuska churasqayki.

⁸ Allinta uyariway, kuraj kaj sacerdote Josué, jinallataj qanwan kashaj, chay sacerdotekunapis uyarillachunkutaj. Qankuna señal jina churasqa kankichej imachus aswan qhepaman kananmanta. Noqa kamachiyta kachasaj, Ijimuy Kaj nisqata.

⁹ Noqaqa Josuéj ñawpaqenman qanchis uyayoj rumita churani, chaymantaj uj qhelqata qhelqaykusaj. Chantá uj p'unchayllapi kay suyumanta tukuy juchata chinkachisaj. Noqa Tukuy Atiyniyoj Tata Diosmin chayta nini.

¹⁰ Chay p'unchay chayamojtintaj, ujkuna ujkuna wajyarinakunkichej, chantá uva sach'aj llanthunpi, jinataj higo sach'aj llanthun urapi mikhuspa samarikunkichej. Noqa Tukuy Atiyniyoj Tata Diosmin chayta nini.