Zacarías 2 - DIOSPA QHELQACHISQ

Zacarías mosqoypi jina midinapaj lazota rikun

¹ 1 (5) Mosqoypi jina ujtawan rikullarqanitaj uj runata midinapaj lazota jap'ishajta.

² 2 (6) Chantá chay runata tapurerqani: Maymantaj rishankiri? nispa. Paytaj kutichiwarqa: Jerusalén llajtata midej rishani, yachanaypaj sayt'unman, anchonman ima mashkhachus kasqanta, nispa.

³ 3 (7) Chantá noqawan parlasharqa, chay ángel ripushajtin, waj angelñataj chay runata taripaj jamorqa.

⁴ 4 (8) Jinataj pay nerqa: Usqhayta chay waynaman nimuy: Aswan qhepaman may chhika runakuna watej Jerusalenpi tiyakonqanku, paykunataj may chhika uywayoj kanqanku. Chayrayku llajtapis manaña perqawan muyuchisqachu kanqa, nispa.

⁵ 5 (9) Tata Diosrí nin: Chaypacha noqa kikiy Jerusalenpa muyuyninpi nina perqa jina sayaykusaj, kikin llajta chawpipitaj jatun kayniypa lliphipiyniyta rikuchisaj, nispa. Noqa Tata Diosmin chayta nini.

Tata Dios Israel ayllunta kacharichenqa

⁶ 6 (10) Tata Dios nillantaj: Noqamin qankunata tukuynejman ch'eqeracherqaykichej. Kunantajrí niykichej: Wichaynej suyumanta usqhayta llojsimuychej.

⁷ 7 (11) Qankuna ñawpajta Sionpi tiyakojkuna, maymanchus apasqa karqankichej, chay Babiloniamanta ayqeychej. Noqa Tata Diosmin chayta niykichej, nispa.

⁸ 8 (12) Tukuy Atiyniyoj Tata Dios kayta willanaypaj kachamuwarqa, pikunachus tukuy imaykichejta ch'uskirasorqachej, chay suyukunaj contrankupi: Pillapis qankunata llankhaykojqa ñawi papaytapis llankhaykunman jina.

⁹ 9 (13) Chayrayku noqa kikiy contrankuta maqanakusaj, jinataj wata runallankutaj paykunata ch'uskiranqanku. Ajinamanta yachankichej Tukuy Atiyniyoj Tata Dios noqata kachamuwasqanta.

¹⁰ 10 (14) Tata Dios nin: Jerusalenpi tiyakojkuna, kusiywan takiychej, imaraykuchus noqapuni qankuna ukhupi tiyakoj jamusaj, nispa.

¹¹ 11 (15) Chaypacha ashkha runakuna Tata Diosman jamonqanku, paytaj nenqa: Kay runakunapis ayllullaytaj kanqanku. Noqataj qankunawan khuska kawsakusaj, nispa. Ajinamanta yachankichej Tukuy Atiyniyoj Tata Diosmin noqata qankunaman kachamuwasqanta.

¹² 12 (16) Tata Diosqa ujtawan paypaj t'aqasqa Judá suyuta chayaqenpaj jina jap'ikapullanqataj. Jerusalentapis ujtawan paypaj t'aqakonqa.

¹³ 13 (17) Tukuy kay pachapi runakuna Tata Diospa ñawpaqenpi ch'in kachunku, imaraykuchus payqa noqanchejman jamun may llimphupaj qhawasqa cheqamanta, maypichus tiyakun, chaymanta.