Zacarías 14 - DIOSPA QHELQACHISQ

Tata Dios kay pachapi kamachenqa

¹ Jerusalén, Tata Diospa p'unchaynin chayamushanña, maypachachus tukuy imayki rak'irasqa kanqa, chaypacha.

² Chay p'unchaypi Tata Diosqa tukuy suyukunata tantanqa Jerusalenpa contranta maqanakunankupaj. Chaypacha paykuna Jerusalén llajtata jap'enqanku, chaypi tiyakojkunaj wasinkukunatapis ch'inyachenqanku. Chay runakunaj warminkutapis alqochanqanku, chaypi tiyakojkunamantataj khuskannin waj suyukunaman apasqa kanqanku. Chaykunamanta puchojkunalla llajtapi qhepakonqanku.

³ Chantá Tata Dios llojsispa, chay suyukunaj contrankupi maqanakonqa, imaynatachus soldadokuna maqanakunku, ajinata.

⁴ Chay p'unchaypitaj Tata Dios Olivos nisqa orqopi sayanqa, mayqenchus Jerusalén llajtaj inti llojsimuyninnejpi kashan, chaypi. Jinallataj Olivos nisqa orqoqa iskayman t'aqakonqa, inti llojsimuynejmanta inti yaykuynejkama, chawpinpitaj uj valle rikhurenqa. Khuskan orqoqa wichaynejman apasqa kanqa, khuskannintaj uraynejman.

⁵ Chantá chay valleqa Azalkama chayanqa, qankunataj chay vallenta orqoman ayqenkichej, imaynatachus ñawpa tataykichejpis ayqerqanku jallp'a ikhakusqanrayku kuraj kamachej Uzías Judapi kamachishajtin, ajinata. Chantá Tata Diosniy jamonqa tukuy angelninkunawan.

⁶ Chay p'unchay chayamojtin, mana k'anchay kanqachu, nillataj chiripis ni qhasapis.

⁷ Chay p'unchay mana waj p'unchaykuna jina kanqachu, imaynachus kananta Tata Dioslla yachan. Chay p'unchay nitaj sut'ichu nitaj laqhachu kanqa. Manachayqa ch'isiyaykuytapis k'anchayllapuni kanqa.

⁸ Chaypacha Jerusalenmanta ch'uwa jutoj yaku purirenqa, chay yakutaj q'oñi tiempopipis, chiri tiempopipis mana ch'akenqachu. Khuskannenqa Wañusqa Qocha nisqaman renqa, khuskannintaj mama qochaman.

⁹ Chay p'unchayqa Tata Dioslla tukuy kay pachata kamachenqa. Chaypacha uj k'ata Tata Dioslla kanqa, uj k'atallataj sutinpis kanqa.

¹⁰ Chantá Jerusalenmanta uraynejpi, Gebamanta Rimonkama tukuy kay suyu pampaman tukonqa. Jerusalén llajta may uyarisqa kanqa, chaynejpitaj runakuna Benjamín Punkumantapacha Esquina Punku nisqakama tiyakonqanku, maypichus ñawpa punku karqa, chaykama. Jinallataj tiyakonqanku Jananelpa Torrenmantapacha kuraj kamachejpata uva sarunan cheqakama.

¹¹ Arí, Jerusalenpi runakuna tiyakonqanku mana imata manchachikuspa, imaraykuchus paykunapaj manaña ima maldicionpis kanqachu.

¹² Chay suyukunarí, mayqenkunachus Jerusalenpa contranta maqanakorqanku, chaykunata Tata Dios jasut'enqa millay onqoywan. Kawsashajtillankuraj, aychanku laq'akonqa, ñawinkupis ñawi t'oqollankupi ismuykaponqa, qallunkupis siminku ukhullapi q'etayaykaponqa.

¹³ Chay p'unchaypi Tata Diosqa jatun manchachikuyta apachimonqa. Chantá sapa ujninku paykunapura wañuchinakonqanku.

¹⁴ Chantá Judapi tiyakojkunapis Jerusalenpi maqanakullanqankutaj. Chantá muyuyninkupi kaj suyukunamanta may chhika qolqeta, qorita, chantá p'achakunatapis qhechonqanku.

¹⁵ Chay suyukunapirí mana runallachu onqoykonqa. Runata jasut'erqa, chay onqoyllawantaj jasut'isqa kanqanku caballokuna, mulakuna, camellokuna, burrokuna, jinataj jarankupi tukuy uywakunapis.

¹⁶ Chay qhepatarí, pikunachus Jerusalenpa contranpi maqanakoj jamorqanku, chay suyukunamanta puchojkuna watan watanta renqanku Kuraj Kamachej Tukuy Atiyniyoj Tata Diosta yupaychaj. Jinallataj Ch'ujlla Ruwana raymitapis ruwallanqankutaj.

¹⁷ Sichus kay pachamanta mayqen suyupis Jerusalenman mana renqachu Kuraj Kamachej Tukuy Atiyniyoj Tata Diosta yupaychaj chayqa, chay suyunkuman mana paranqachu.

¹⁸ Sitajchus Egipto llajtayojkunapis mana Jerusalenman renqankuchu chayqa, llajtankupipis manallataj paranqachu. Kikillantataj Tata Dios jasut'enqa mayqen suyuchus Ch'ujlla Ruwana raymita mana ruwajkunatapis.

¹⁹ Ajinatamin Egipto suyuwan, jinallataj mayqen suyuchus Ch'ujlla Ruwana raymita ruwaj mana renqankuchu, chaykunawan ima jasut'isqa kanqanku.

²⁰ Chay p'unchayllapitaj caballokunaj campanillanpi kay jina qhelqasqa kanqa: “Tata Diospaj T'aqasqa”, nispa. Chantá Templopi mankakuna, altarpa ñawpaqenpi kashanku, chay vasokuna ima Tata Diospaj t'aqasqallataj kanqanku.

²¹ Judapi, jinataj Jerusalenpi tukuy mankakunaqa Tukuy Atiyniyoj Tata Diospaj t'aqasqa kanqanku. Pillapis uywa ñak'asqata jaywayta munajqa chay mankata oqharispa, uywaj aychanta chayachenqa. Chay p'unchayllapitaj Tukuy Atiyniyoj Tata Diospa Templopi manaña qhatojkuna kanqachu.