Zacarías 13 - DIOSPA QHELQACHISQ

¹ Chay p'unchaypi Davidpa ayllunpaj jinataj Jerusalenpi tiyakojkunapaj yaku juturi kicharisqa kanqa, chaypi millay juchankuta mayllanankupaj.

² Chay p'unchaypi tukuy kay suyumanta lantikunata chinkachisaj, jinamanta manaña pipis sutinkumanta yuyarikunanpaj. Jinallatataj llulla sut'inchajkunatapis chinkachisaj, jinallataj millayta ruway munanata ima. Noqa Tukuy Atiyniyoj Tata Diosmin chayta nini.

³ Chaypacha, sichus pipis payllamanta sut'inchayta munanqa chayqa, tatan, maman ima payta nenqanku: Qan wañunayki tiyan, imaraykuchus llullakuspa ninki Tata Diospa sutinpi sut'inchashasqaykita, nispa. Chantá tatan maman payta wañuchenqanku, payllamanta Diospa sut'inchajnin ruwakusqanrayku.

⁴ Chay p'unchaypi sut'inchajkunapis mosqoypi jina rikusqankuta sut'inchayta p'enqakonqanku. Ni pipis sut'inchajpa qara p'achanwan p'achallikuyta munanqachu wajkunata q'otiyananpaj.

⁵ Manachayqa sapa ujpis nenqa: Noqaqa mana Diosmanta sut'inchajchu kani, manachayqa llank'aj runalla. Wayna kasqaymantapacha chajrapi llank'aj kani, nispa.

⁶ Sichus pipis payta tapunkuman: Chantá ukhuykita imanakorqankitaj ajina k'irisqa kanaykipajri? nispa chayqa, pay kutichenqa: Kawsaqeykunaj wasinkupi kayta ruwawarqanku, nispa.

Tata Diosmin Diosneyqa

⁷ Tukuy Atiyniyoj Tata Dios nin: Yu espada, michejniypa contranpi oqharikuy, pichus yanapawajpa contranpitaj sayariy. Michejta wañuchiy, ovejaykunataj ch'eqerakonqanku. Noqapis corderokunaj contrallankupitaj oqharikusaj.

⁸ Kay suyupi tiyakojkunamanta kinsaman t'aqasqamanta iskay t'aqa wañonqanku. Ujnin t'aqalla kawsashaj qhepakonqa. Ajinata Tata Dios nin.

⁹ Chay qhepakojkunarí ninawan ch'uwanchasqa kanqanku. Imaynatachus runa qolqe metalta ninapi ch'uwanchan, chayrí qorita ch'uwanchan, ajinata noqapis paykunata llimphuchasaj. Chaypacha paykunaqa sutiyta oqharenqanku Diosninkupaj rejsikapuwasqankurayku, noqataj mañakuwasqankuta uyarisaj. Chantá paykunata nisaj: Qankuna aylluy kankichej, nispa. Paykunataj kutichiwanqanku: Tata Diosqa Diosninchej, nispa. Noqa Tata Diosmin chayta nini.