Zacarías 12 - DIOSPA QHELQACHISQ

Jerusalén kacharichisqa kanqa

¹ Tata Dios kayta sut'incharqa imachus Israelwan kananmanta. Qallariypeqa paymin janajta toldota jina mast'arqa, kay pachatapis sayacherqa, runamanpis kawsayta qorqa. Kunantaj pay nin:

² Jerusalenta ruwasaj uma muyuchej vinoyoj vaso jina kananpaj, ajinamanta qayllanpi kaj tukuy suyukunata machachinanpaj. Maypachachus Jerusalenta jap'inankupaj muyuykonqanku chaypacha, Judamanta waj llajtakunatapis muyuykullanqankutaj.

³ Chay p'unchaypi Jerusalenta mana oqhariy atina llasa rumiman tukuchisaj. Mayqen suyupis chay rumita oqhariyta munajtin, wasan ch'utanqa. Chaypachaqa tukuy suyukuna Jerusalenpa contranpi tantaykukonqanku.

⁴ Noqatajrí caballonkukunata manchariykuchisaj, caballopi rejkunaj umankuta muyuchisaj, chay suyukunaj caballonkukunatapis ñawsayachisaj. Judá ayllumanta kajkunatatajrí waqaychasaj.

⁵ Chayta rikuspataj, Judapi kurajkuna sonqonkupi nenqanku: Jerusalenpi tiyakojkuna kallpata jap'ishanku Tukuy Atiyniyoj Tata Diosninkumanta, nispa.

⁶ Chay p'unchaypi Judamanta kurajkunata ruwasaj llant'a ukhupi nina k'ajarishaj jina kanankupaj, trigo marq'a ukhupitaj uj lawrashaj nina jina kanankupaj. Qayllapi kaj suyukunata, lloq'enpi kajta, pañanpi kajtapis phirenqanku. Chantá runakuna watej Jerusalenpi tiyakonqanku.

⁷ Ñawpajta noqa Tata Diosqa Judá ayllumanta kajkunataraj kacharichisaj, Davidpa miraynin, jinataj Jerusalenpi tiyakojkunapis ama yuyanankupaj Judá ayllumanta nisqaqa aswan sumaj kasqankuta.

⁸ Chaymantataj noqa Tata Diosqa Jerusalenpi tiyakojkunatañataj waqaychasaj. Chaypi pisi kallpayojkuna David jina kallpasapaman tukonqanku, Davidpa ayllunmanta kajkunataj Dios jina kanqanku, paykunaj ñawpaqenkuta rej Diospa angelnin jinataj.

⁹ Chay p'unchayllapitaj mayqen suyukunachus Jerusalenwan maqanakoj sayaykonqanku, chay tukuyninta chinkarparichisaj.

¹⁰ Chantá Davidpa mirayninman, jinataj Jerusalenpi tiyakojkunaman sumaj sonqota qosaj, noqa Diosmanta mañakuyta munana sonqotawan. Noqata qhawariwanqanku, pitachus t'ojserqanku, chayta. Chaymantataj may jinata waqanqanku, imaynatachus runakuna waqanku k'ata wawanku chayrí kuraj kaj churinku wañojtin, ajinata.

¹¹ Chay p'unchaypeqa Jerusalenpi manchayta waqanqanku, imaynatachus Meguido pampapi Hadad Rimón diosmanta waqasqanku, ajina.

¹² Kay suyupi sapa ayllu waqanqa: Davidpa ayllunmanta kajkuna, warminkunawan, Natanpa ayllunmantapis warminkuna ima.

¹³ Jinallataj Leví ayllumanta kajkuna warmintin, jinataj Simey ayllumanta kajkunapis warmintin waqanqanku.

¹⁴ Ajinallatataj tukuy waj ayllukunapis warmintillantaj, sapa ayllu waqanqanku.