Zacarías 11 - DIOSPA QHELQACHISQ

¹ Líbano, punkuykita kichariy, pino sach'aykikunata nina ruphaykunanpaj.

² Pino sach'a, waqay, imaraykuchus cedro sach'a urmanña, jatuchaj k'achitu sach'akuna urmachisqa kasqankurayku. Waqaychej, Basanpi encina sach'akuna, imaraykuchus k'iski sach'akuna urmachisqaña kanku.

³ Michejkunapis qhaparispa waqashanku, imaraykuchus sumaj pastoqa chinkachisqaña. Leonpa qhaparisqanpis uyarikullantaj, imaraykuchus Jordán mayu kantupi ch'umipis chinkachisqaña kashan.

Iskay michejkuna

⁴ Tata Diosniy kayta niwarqa: Ñak'anapaj kanku, chay ovejaykunata michiy.

⁵ Chaykunata rantikojkunaqa mana llakikuspa ñak'anku. Vendejkunataj ninku: Pachis Tata Diosman, imaraykuchus qhapajña kani, nispa. Ni michejninkupis paykunamanta khuyakunkuchu.

⁶ Ajinallatataj noqapis kay llajtapi tiyakojkunamanta manallataj khuyakusajchu. Manachayqa runa masinkoj makinman, jinataj kuraj kamachejninkoj makinman paykunata jaywaykusaj. Chaykunataj kay suyuta phirenqanku, nitaj pitapis makinkumanta kacharichisajchu, nispa. Ajinata Tata Dios nin.

⁷ Jinataj noqa Zacarías ñak'anapaj karqanku, chay ovejakunata micherqani, astawanqa tullu ovejakunata. Chantá iskay tojnuta oqharikuspa, ujninta suticharqani: “Khuyakuy”, nispa, chay ujnintataj “Ujchakuy”, nispa.

⁸ Uj killallapi kinsa mana allin michejkunata wijch'orqani. Chaywanpis ovejakunapis noqawan sayk'usqankurayku, chejnikuwarqanku.

⁹ Chantá ovejakunaman nerqani: Manaña qankunata michisqaykichejchu. Mayqenchus wañunan tiyan, chay wañuchun. Mayqentajchus chinkanan kashan, chay chinkachun. Qhepakojkunarí, ujkuna ujkuna mikhunakuchunkupis, nispa.

¹⁰ Chaymantá “Khuyakuy” nisqa tojnuta oqharispa, p'akirparerqani. Chay niyta munarqa Dios tukuy suyukunawan ruwasqa tratonta p'akisqanta.

¹¹ Chay p'unchaypacha chay trato p'akisqa karqa. Chay ñak'arichisqa ovejakunataj imatachus ruwasqayta rikuspa, repararqanku Tata Dios noqanejta parlashasqanta.

¹² Chantá paykunata nerqani: Sichus allin rijch'asunkichej chayqa, michisqaymanta pagapuwaychej, manachayqa saqellaychej, nispa. Jinamantataj kinsa chunka qolqeta pagapuwarqanku.

¹³ Chantá Tata Dios niwarqa: Ajinata yachayta qorqanku pisi valorniyoj kasqayta. Chayrayku noqarayku chay qolqe pagasqankuta Tata Diospa Temploj qolqe jallch'ananman wijch'uykamuy, nispa. Noqataj chay kinsa chunka qolqeta jap'iytawan, Temploj qolqe jallch'ananman churaykorqani.

¹⁴ Chaymantaqa “Ujchakuy” nisqa tojnutañataj p'akerqani. Ajinamanta yachayta qorqani Judawan, Israelwan wawqepura kawsakusqankoqa p'akisqa kasqanta.

¹⁵ Chantá Tata Dios niwarqa: Kunanqa qan mana yuyayniyoj michejman jina tukuy.

¹⁶ Noqataj kay suyupi chay jina michejta churasaj. Payqa chinkasqa ovejakunamanta mana watukonqachu, nitaj mask'aj renqachu, nillataj chakin p'akisqa ovejata jampenqachu. Manallataj tullu ovejatapis mikhuchenqachu, manachayqa wira ovejata mikhuykakaponqa, ni chaki sillullantapis puchuchenqachu.

¹⁷ Ay, imachus kanqa jaqay uywanta saqerpayaj qhella michejmantaqa. Espadawan makinta qholuchunku, paña ñawintapis t'ojsichunku. Makinpis ch'akipuchun, ñawinpis lerq'oyachun, nispa.