Zacarías 10 - DIOSPA QHELQACHISQ

Tata Dios ayllunta yanapananta nin

¹ Tata Diosmanta mañakuychej ñawpaj parata, lliuj lliujkunata ruwaj Tata Diostaj ashkhata parachimusonqachej. Campopipis tukuypaj qhorakunata wiñachipusonqachej.

² Lantikunaj nisqankoqa llullamin, yatirikunaj watusqankupis qhasillamin. Imatachus mosqoypi jina nisqankupis qhasilla, sonqochakoj jina parlasqankupis yanqhalla. Chayraykumin aylloyqa chinkasqa oveja tropa jina thamaykachashanku, michejmanta jina ñak'arispa.

³ Chayrayku Tata Dios nin: Aylluyta michejkunapajmin phiñakuyniy astawan k'ajarin, noqataj aylluyta kamachejkunata jasut'isaj, nispa. Kunantaj Tukuy Atiyniyoj Tata Dios Judáj mirayninta tropanta jina waqaychanqa, aylluntataj yanapanqa, maqanakupaj wakichisqa caballo jina kallpayoj kanankupaj.

⁴ Judá ayllumanta rikhurenqa cimiento esquinaman churana rumi, toldota sayachinapaj estaca, flechanapaj arco ima. Chaymanta tukuy kamachejkunapis jatarillanqankutaj.

⁵ Wapu soldadokuna jina, t'uru patapipis maqanakonqanku. Tata Dios paykunawan kasqanrayku, caballopi purej soldadokunawan maqanakuspapis, paykunata atipanqanku.

⁶ Tata Dios nillantaj: Noqaqa Judáj mirayninta kallpachasaj, jinallataj Joséj miraynintapis kacharichisaj. Paykunamanta khuyarikusqayrayku, watej paykunata llajtankuman kutichisaj. Manapis ni jayk'aj paykunata qhesachaymanchu karqa, ajina kanqa. Noqa, Tata Diosninku kani, mañakuwasqankutataj uyarisaj.

⁷ Efrainqa wapu soldado jina kanqa. Sonqon kusikonqa, imaynatachus runakuna vinota ujyaspa kusikunku, ajinata. Chayta rikuspataj, churinkunapis kusirikullanqankutaj. Arí, Tata Diosrayku sonqonku mayta kusikonqa.

⁸ Noqa Tata Dios wajyaspa, paykunata tantaykakapusaj. Chantá preciota pagaspa paykunata awqankumanta kacharichejtiy, unay tiempopi jina ujtawan may chhikaman miranqanku.

⁹ Noqa paykunata waj suyukunaman ch'eqeracherqani. Chaywanpis may jina karupi kashaspapis, noqamanta yuyarikuwanqanku. Chantá pikunawanchus tiyakusharqanku, chay wawankukunawan khuska kutimponqanku.

¹⁰ Noqa paykunata Egiptomanta kutirichimusaj, Asiriamantapis pusakampusaj. Chantá paykunata Galaadman, Libanomanpis pusasaj. Jinapis ashkha kasqankurayku jallp'a mana paykunapaj wakenqachu.

¹¹ Paykuna Egiptoj mama qochanta chimpanqanku, noqataj yaku oqharikojtapis sayachisaj. Nilo mayutapis ukhukama ch'akichisaj. Jinallataj Asiriaj may runaykachasqanta pampata ruwasaj, Egiptoj atiynintapis chinkachisaj.

¹² Aylluytarí noqa kallpachasaj, paykunataj sutiypi ñawpajllamanpuni renqanku. Noqa Tata Diosmin ajinata nini.