Zacarías 1 - DIOSPA QHELQACHISQ

Tata Diosqa Israel ayllun payman kutirikunanta munan

¹ Kuraj kamachej Darío iskay watataña Babiloniapi kamachishajtin, pusaj killanpi Tata Diosqa sut'inchaj Zacariasman kayta parlarqa, pichus Berequiaspa churin karqa, Iddoj allchhintaj, chayman:

² Noqa Tata Dios ñawpa tataykichejkunapaj sinch'ita phiñakorqani.

³ Chayrayku, kunan Israel aylluman kay jinata willay: Kutirikamuwaychej, noqapis qankunaman kutirikamusaj, nispa, nisunkichej Tukuy Atiyniyoj Tata Dios.

⁴ Ama ñawpa tataykichejkuna jina kaychejchu. Noqamanta ñawpa sut'inchajkunaqa paykunata sutiypi nerqanku: Millay kawsayta saqeychej, mana allin kajta ruwanamantataj t'aqakuychej, nispa. Paykunatajrí mana uyariwarqankuchu nitaj nisqayta kasuwarqankuchu. Noqa Tukuy Atiyniyoj Tata Diosmin chayta niykichej.

⁵ Kunanrí, maypitaj chay ñawpa tataykichej kashankuri? Sut'inchajkunapis kawsashankurajchu? Mana, icharí?

⁶ Chaywanpis, imatachus sut'inchajkunanejta ñawpa tataykichejpa contrankupi nerqani, kamacherqanitaj, chay tukuy junt'akorqa. Chayrayku paykuna kutirikamuwarqanku, nerqankutaj: Tukuy Atiyniyoj Tata Dios noqanchejwan ruwarqa purisqanchejman jina, ruwasqanchejman jinataj, nispa.

Zacarías mosqoypi jina caballokunata rikun

⁷ Noqa Zacarías Berequiaspa churin kani, Iddoj allchhintaj. Kuraj kamachej Darío iskay watataña Babiloniapi kamachishajtin, iskay chunka tawayoj kaj p'unchaypi, chunka ujniyoj kaj Sebat killapi Tata Dios parlawarqa.

⁸ Uj ch'isi mosqoypi jina rikorqani uj runata puka caballopi lloq'asqata, vallepi arrayán sach'akuna chawpipi sayashajta. Rikullarqanitaj qhepannejpi puka caballokunata, oqe caballokunata, chantá yuraj caballokunata ima.

⁹ Chantá tapurerqani: Wiraqochíy, pikunataj kanku chay caballokunapi lloq'asqa kajkunari? nispa. Pichus parlashawarqa, chay angeltaj kutichiwarqa: Noqa rikuchisqayki pikunachus kasqankuta, nispa.

¹⁰ Chantá arrayán sach'akuna chawpipi kaj kay jinata niwarqa: Kaykuna kanku, pikunatachus Tata Dios kacharqa tukuy kay pachantinpi purinankupaj, chaykuna, nispa.

¹¹ Chantá pikunachus arrayán sach'akuna chawpipi kasharqanku, chay caballopi lloq'asqa kajkuna Tata Diospa angelninta nerqanku: Tukuy kay pachataña purimuyku, manataj tarerqaykuchu ni ima llakiyta nitaj ima ch'ajwatapis, nispa.

¹² Chantá Tata Diospa angelnin nerqa: Tukuy Atiyniyoj Tata Dios, Jerusalenpaj chantá Judapi kaj llajtakunapajpis qanchis chunka watataña phiñasqa kanki. Mayk'ajkamataj paykunamanta mana khuyarikunkichuri? nispa.

¹³ Jinapi Tata Dios sonqocharqa, pichus noqawan parlasharqa, chay angelta.

¹⁴ Chaymanta Tata Diospa angelnin kamachiwarqa kayta willanayta: Tukuy Atiyniyoj Tata Dios kay jinata nin: Noqa Jerusalentawan, Sión orqotawan sinch'ita munakuni.

¹⁵ Chayrayku sinch'i phiñasqa kashani mana imamanta llakiyniyoj suyukunaj contrankupi. Maypachachus pisillataraj aylluypaj phiñakorqani chaypacha, paykuna Jerusalén llajtata may sinch'ita ñak'arichispa, astawan phiñachiwarqanku.

¹⁶ Chayrayku noqa Tata Dios nini: Noqaqa Jerusalenmanta watej khuyarikusaj. Temploypis watej sayarichisqa kanqa, nispa.

¹⁷ Chantá Tata Diospa angelnin niwarqa: Kaytawan niy: Tukuy Atiyniyoj Tata Dios nin: Watej llajtaykunata qhapajyachisaj, Siontataj sonqochasaj. Jinamanta tukuyman willarasaj Jerusalén ujtawan ajllasqa llajtay kasqanta, nispa.

Zacarias mosqoypi jina rikusqan

¹⁸ 18 (2.1) Ujtawan mosqoypi jina kay jinata rikullarqanitaj. Chaypacha tawa wajrakunata rikorqani.

¹⁹ 19 (2.2) Chantá noqawan parlasharqa, chay angelta tapurerqani chay wajrakuna ima niytachus munasqanta. Paytaj niwarqa: Kay wajrakuna ninakunku, pikunachus Judapi tiyakojkunata, Israelpi, chantá Jerusalenpi tiyakojkunata ima tukuynejman ch'eqeracherqanku, chay suyukunawan, nispa.

²⁰ 20 (2.3) Jinapi Tata Dios tawa herrerokunata rikuchillawarqataj.

²¹ 21 (2.4) Noqataj taporqani: Imamantaj kay herrerokuna jamunkuri? nispa. Paytaj kutichiwarqa: Chay wajrakunaqa Judapi tiyakojkunata ch'eqerachejkuna kanku. Chay ch'eqerasqa runakunataj ni umankutapis oqhariyta aterqankuchu. Kay herrerokunarí jamunku, pikunachus Judapi tiyakojkunata wajraspa, tukuynejman ch'eqeracherqanku, chay suyukunata kharkatitichej, wajrankutataj qholuraj ima, nispa.