Tito 3 - DIOSPA QHELQACHISQ

Jesucristota qhatejkuna imaynatachus kawsana

¹ Wawqe panakunata yuyarichiy kamachejkunawan, kamachejta yanapajkunatawan ima kasuy sonqo kanankuta. Paykunata kasuchunku, chantá tukuy imachus allinta kajtataj usqhayllata ruwayta munachunku.

² Amataj pimantapis mana allintaqa parlachunkuchu, nitaj phiñanakuta mask'achunkuchu. Ajina kanankutaqa k'acha kachunku, jinataj llamp'u sonqo kasqankuta tukuyman rejsichispa kawsakuchunku.

³ Noqanchejpis ñawpajtaqa mana yuyayniyoj wampu karqanchej, mana kasukojkuna, chinkasqa ima. Kallarqanchejtaj tukuy imaymana mana allin kajta ruwayta munajkuna, sonqonchejpa munasqanta ruwaspa kusiririkuyta munajkuna ima. Chaykunamantataj mana kacharichikuyta aterqanchejchu. Jinallataj noqanchej millay ch'ichi kajta ruwaspa, envidiakuspa, chejnispa, chantá ujkuna ujkuna chejninakuspa ima kawsarqanchej.

⁴ Chaywanpis maypachachus Qhespichiwajninchej Dios k'acha kayninta, chantá munakuyninta ima rejsicherqa chaypacha, pay qhespichiwarqanchej.

⁵ Pay qhespichiwarqanchej mana noqanchej ima allinta ruwasqanchejraykuchu, astawanqa khuyakuwasqanchejraykulla. Chantá Santo Espiritunejta juchanchejmanta mayllawarqanchej, watej paqarichispataj, mosoj kawsayta qowarqanchej.

⁶ Jinallataj Diosqa Qhespichiwajninchej Jesucristonejta mana mich'akuspa Santo Espiritutapis qollawanchejtaj.

⁷ Ajinata Dios ruwarqa noqanchej qhasilla k'acha yanapayninnejta cheqan runapaj qhawasqa kaspa, wiñay kawsayta chayaqeta jina jap'iyta suyakunanchejpaj.

⁸ Kay nisqayqa cheqapuni, munanitaj mana sayk'uspa chaymanta parlanaykita. Noqanchej Diosta qhatikojkuna imachus allin kajta ruwanapi yuyaspa kananchej tiyan. Chaykunata ruwanaqa may sumajmin, allintaj runapaj.

⁹ Qanrí manakajta siminakunaman ama sat'ikuychu. Jinallataj ñawpa tatakunamanta parlanata, chantá Moisespa kamachisqan jawa siminakuspa churanakuyta ima amallataj kasuychu. Chaykunamanta siminakuspa tinkunaqa yanqhalla, nitaj pitapis imapipis yanapanchu.

¹⁰ Iglesiapi t'aqanakuta sayarichejtaqa iskay kutikamapis k'amiy. Mana kasukojtintaj, iglesiamanta payta wijch'uy.

¹¹ Qan yachanayki tiyan, chay runaqa cheqan ñanmanta karunchakusqanta, kikin juchallantaj payta juchachasqanta.

Pabloqa Titota imatachus ruwananta nin

¹² Artemasta, chayrí Tiquicota kachamusojtiy, qan Nicopolisman jamuypacha, imaraykuchus chaypi chiri tiempopi qheparikuyta munani.

¹³ Jinallataj abogado Zenasta, Apolostawan ima atisqaykita yanapaykuy puriyninkupi ama imapis pisinanpaj.

¹⁴ Diosta qhatej masinchejkuna allin kajta ruwayta yachachunku, imamantapis pisichikojkunata yanapaspa. Ajinata ruwaspa, mana jinalla kakojkunachu kanqanku.

Pabloqa wawqe panakunata napaykun

¹⁵ Noqawan tukuy kajkuna napaykamusunku, jinallataj qanpis munakuwajninchej Jesucristota qhatikojkunata napaykapuwayku. Diospa qhasilla k'acha yanapaynin tukuy qankunawan kachun.