Tito 2 - DIOSPA QHELQACHISQ

Cheqan kajtapuni yachachina

¹ Qanrí Tito, yachachishaspaqa, cheqan kajman jinapuni yachachinayki tiyan.

² Kuraj runakunaqa allinta qhawarikuspa purejkuna kachunku, jatun respetowan qhawasqa kanankupaj jina. Jinallataj kachunku sonqonkoj munasqanwan mana atipachikojkuna. Kallachunkutaj Diosllapi sinch'ita atinikojkuna, runa masinta munakojkuna, chantá pacienciayoj ima.

³ Jinallataj paya warmikunapis Diosta qhatikojkuna jina purichunku. Ama cuento q'epi nitaj machakojkuna kachunkuchu, manachayqa allin kajta yachachejkuna kachunku.

⁴ Paya warmikunaqa sipas warmikunata yachachichunku qosankuta, wawankukunatawan munakuyta.

⁵ Yachachillachunkutaj allinta qhawarikuspa purinankuta, llimphu puriyniyoj ima kanankuta. Yachachillachunkutaj wasinkupi imachus ruwana kajta ruwanankuta, k'acha kanankuta, chantá qosankuwan kasukuy sonqo kanankuta ima. Ajinata sipas warmikuna purejtinku, mana pipis Diospa nisqanmanta mana allinta parlanqachu.

⁶ Ajinallatataj waynakunatapis yuyaychay allinta qhawarikuspa purinankupaj.

⁷ Qanrí tukuy imata allinta ruwaspa purisqaykita paykunaman rikuchiy, qan jina puriyta yachanankupaj. Tukuy imatachus ruwasqaykeqa yachayta qochun, yachachisqayki cheqan sonqowan, chantá mana pujllakuspa jinallachu kasqanta.

⁸ Parlaspaqa, cheqan kajtapuni parlay, mana pipis imatapis parlananpaj jina. Ajinata ruwajtiykeqa, contraykipi sayaykojkuna p'enqakonqanku, imaraykuchus noqanchejmanta mana ima mana allintapis niyta atenqankuchu.

⁹ Qanqa wata runakunatapis yachachillaytaj patronninkuta kasunankuta, chantá imatapis ruwanankuta paykunaj sonqonkuta kusichinankupaj jina. Chantá paykuna amallataj kutichikuchunkuchu,

¹⁰ nitaj imatapis suwakuchunkuchu, manachayqa tukuy imachus ruwanankuta junt'aspa, k'acha kachunku. Wata runakuna ajinata ruwaspa, tukuy imapi qhespichiwajninchej Diospa yachachisqan may sumaj kasqanta rikuchenqanku.

¹¹ Diosqa qhasilla k'acha yanapayninta rikucherqa, chayta mana jap'ikunanchejpaj jina kashajtinchejpis, tukuy qhespichisqa kananchejpaj.

¹² Diospa qhasilla k'acha yanapayninrí yachachiwanchej millayta ruwaspa puriyta qhesachananchejta, chantapis Diosman mana kutirikojkuna imatachus munasqankuta mana munapayananchejta ima. Yachachillawanchejtaj kay pachapi allinta qhawarikuspa purinata, cheqanta ruwaspa kawsanata, chantá Diosta may jatun respetowan qhawaspa kawsanata ima.

¹³ Ajinata kawsananchej tiyan, suyakushanchej, chay kusiy p'unchay chayamunankama. Chaypacha may jina atiyniyoj Dios Qhespichiwajninchej Jesucristo jatun kayninpa lliphipiyninwan rikhurimonqa.

¹⁴ Paymin noqanchejrayku wañunanpaj jaywaykukorqa, tukuy imaymana juchamanta kacharichinawanchejpaj, chantá llimphuchanawanchejpaj ima. Ajinata ruwarqa, paypa ayllun kananchejpaj, chantá allin kajta tukuy sonqo ruwayta munananchejpaj ima.

¹⁵ Chaykunata qan yachachinayki tiyan. Uyarisojkunata cheqan ñanman churay, kasusunankupaj jina k'amispa. Amallataj runa pisipaj qhawasunankupaj jina imatapis ruwaychu.