TAKIYKUNA 8 - DIOSPA QHELQACHISQ

¹ Sichus qan turay kawaj, mamaypa ñuñunwan uywasqa kawaj chayqa, mayllapipis qanta tariytawan, much'aykuykiman. Nitaj pipis qhawakuwanmanchu.

² Noqa mamaypa wasinman pusaykuykiman, chaypitaj qan yachachiwankiman imaynatachus munakunata. Noqataj sumaj vinota ujyachiykiman, granadaymanta ch'irwasqatapis jaywariykiman.

³ Lloq'e makiykita kunkay uraman churay, paña makiykiwantaj ojllaykuway.

Munakoj qharej takisqan

⁴ Jerusalenmanta sipaskuna, tiluwaychej, munasqetayta ama rijch'arichipuwaychejchu. Puñukojta saqepullawaychej payllamanta rijch'arinankama.

Kawsaqekunaj takisqanku

⁵ Pitaj jaqay warmi ch'innejmanta jamushanri, munasqanpa lijranman atiykukuspari? Manzana sach'a urapi rijch'aricherqayki, maypichus mamayki nanaywan jap'ichikorqa, maynejpichus qanta paqarichikusorqa, chaypi.

Munakoj qharej takisqan Munasqa warmej takisqan

⁶ Sonqoykipi sellowan jina churaykuway, makiykipi anillota jina. Munakoyqa wañuy jina atiyniyojmin, wañuy jina mana kutimuyniyoj. Munakoyqa nina jina k'ajarin, sinch'i nina lawray jina.

⁷ Ashkha yakupis munakuytaqa mana thasnunmanchu, nillataj mayupi yakupis chinkachinmanchu. Sichus uj runa tukuy kapuyninwan munakuyta rantiyta munanman chayqa, chay runata asipayankuman.

Kawsaqekunaj takisqanku

⁸ Sullk'a panitayku manaraj chuchituyoj tiyapuwayku. Payta mañaqaj jamojtinku, ima nisqaykutajri?

⁹ Sichus pay perqa kanman chayqa, perqa patapi qolqe metalmanta torrekunata sayarichisunman. Sichus pay punku kanman chayqa, pino tablawan tablaykusunman.

Munasqa warmej takisqan

¹⁰ Noqaqa jatun perqa jina kani, ñuñuypis iskay torre jina. Chayrayku munasqaypa qayllanpi ni imamanta manchachikunichu.

¹¹ Salomonpata uva huertan Baal Gamonpi karqa. Chaytataj qhawajkunaman saqerqa. Paykuna poqochisqankumanta waranqa qolqeta apamunanku karqa.

¹² Salomón, waranqa qolqe qanpaj kachun, iskay pachajtaj uva huertata qhawajkunapaj. Uva huertaytatajrí noqalla qhawakusaj.

Munakoj qharej takisqan

¹³ Urpilitáy, huerta chawpipi tiyakoj, kawsaqeykuna parlasqaykita uyariyta munanku. Noqamanpis parlarisqaykita uyarichiway ari.

Munasqa warmej takisqan

¹⁴ Usqhayta t'ijuy ari, munasqáy. Taruka jina phinkiriy, chayrí uña taruka jina k'achituta q'aparishaj lomakunata phinkiriy.