TAKIYKUNA 7 - DIOSPA QHELQACHISQ

Munakoj qharej takisqan

¹ 1 (2) Qoya, chakiykeqa manchay k'achitupuni juk'utaykipi rikukun. Chakaykeqa lliphipishaj rumi jina k'achitu sumaj yachayniyojpa ruwasqan.

² 2 (3) Pupituykeqa muyu vaso jina, maypichus sumaj vino kallanpuni. Wijsaykeqa trigo qotu jina, lirio t'ikawan muyuykuchisqa.

³ 3 (4) Iskaynin ñuñituykeqa iskay taruka uñaman rijch'akunku, awachupis kankuman jina.

⁴ 4 (5) Kunkaykeqa marfilmanta ruwasqa torre jina, ñawisituykitaj Jesbón llajtapi Bat Rabín punkupi yaku qocha jina. Senqaykeqa Líbano torre jina, Damasco llajtaman qhawarisqa.

⁵ 5 (6) Umaykeqa Carmelo orqoman rijch'akun. Chujchitaykeqa yana kulliraw q'aytu jina, chay chujchitaykitaj kuraj kamachejpa sonqonta suwan.

⁶ 6 (7) Munasqetáy, munarikunapaj jina kanki, alajita, may k'achitapuni kanki.

⁷ 7 (8) Sayayniykeqa palma sach'a jina jatun. Ñuñituykeqa palmaj poqoynin chhullchu jina.

⁸ 8 (9) Noqa nerqani: Palma sach'aman wicharisaj poqoynintataj pallakamusaj, nispa. Ñuñituykeqa uva chhullchu jina kachun. Samayniykej q'apayninpis manzanaj q'apaynin jina kachun.

⁹ 9 (10) Simisituykeqa sumaj vino jina. Chay vinoqa simiykinejta, kiruykinejtapis llamp'ulla yaykurin.

Munasqa warmej takisqan

¹⁰ 10 (11) Noqaqa munakuwajniypata kani, paytaj noqawan misk'irichikun.

¹¹ 11 (12) Jamuy ari, munasqáy, campopi puriykacharimunachej, ch'isintaj alheña t'ika chawpipi puñukusun.

¹² 12 (13) Uva huertaman sut'iyayta risunchej. Ijishanñachus t'ikashanñachus, chayta qhawarimusunchej, granadakunapis t'ikashanñachus chaytapis. Chaypitaj munakamusqayki.

¹³ 13 (14) Mandragorapis k'achituta q'aparishanku. Wasinchej punkupeqa imaymana poqoykuna tiyan. Kunallanraj pallasqa kajta, jinallataj k'isasqaña kajta, munasqáy, qanpaj jallch'aporqayki.