TAKIYKUNA 5 - DIOSPA QHELQACHISQ

Munakoj qharej takisqan

¹ Noqa huertayman yaykuniña, chunkitúy, munasqetáy. Noqaqa mirraytawan, sumaj k'acha q'apayniyoj jawinatapis pallaniña. Chantá abeja misk'itapis mikhuniña. Vinoytawan, lecheytawanpis ujyaniña. Munasqa kawsaqeykuna, mikhurikuychej, ujyarikuychej munanakuspa sajsanaykichejkama.

Kawsaqekunaj takisqanku Munasqa warmej takisqan

² Noqaqa puñusharqani. Chaywanpis sonqoyqa mana puñusharqachu. Noqaqa munasqay punkumanta wajyamuwajta uyarerqani: Kicharirimuway, chunkitúy, munasqetáy, urpilitáy. Umayqa chhullawan joq'opachaña. Ch'isin chhullamusqanwan chujchaymanta yaku sut'urashan, nispa.

³ Noqatajrí kuticherqani: P'achayta lluch'ukuniña. Imaynatataj ujtawan p'achayta churakusajri? Chakiytapis yakuwan mayllakuniña. Imaynatataj ujtawan ch'ichichakusajri? nispa.

⁴ Munasqayqa punku k'ajllunta makinta jaywaykamorqa. Chaytajrí, sonqoyta tujtukiyacherqa, tukuy ukhuytaj kharkatitirerqa.

⁵ Noqa sayarerqani, munasqay yaykumunanpaj punkuta kicharej. Makiymanta, ruk'anaymantawan mirra jawikusqay punku wisq'anaman surusharqa.

⁶ Parlasqanta uyarejtiy, wañuy wañuy jap'iwarqa. Punkuta kicharerqani. Chaywanpis munasqayqa ripusqaña, mask'arqani nitaj tarikaporqanichu. Manaña chaypichu kashasqa. Wajyajtiypis, mana uyariwarqachu.

⁷ Llajtata qhawaj soldadokuna taripawaytawan, maqaykuwarqanku, k'iriykuwarqankutaj. Perqa patamanta qhawaj soldadokunataj kallpawan mantayta qhechuwarqanku.

⁸ Jerusalenmanta sipaskuna, ama jina kaspa, munasqaywan tinkunkichej chayqa, munakunawanmanta wañushasqayta willaripuwaychej.

Kawsaqekunaj takisqanku

⁹ Munasqayki qhari imapitaj ujkunamanta astawan allin kasqari? K'achita warmikunamanta aswan k'achita warmi, munasqayki imapitaj ujkunamanta astawan allin kasqari chay jinatapuni ninawaykupajri?

Munasqa warmej takisqan

¹⁰ Munasqayqa ima munay rijch'ayniyoj, puka uyita alajitutaj, chunka waranqa qharikuna chawpipi sut'i rejsinapaj jinalla.

¹¹ Rijch'aynenqa qori jina. Chujchanpis chhurku, suwintoj phurun jina yana.

¹² Ñawinkunaqa yaku kantupi iskay urpi jina kashanku, lechewan mayllasqa jina.

¹³ Uyitanqa ima munay q'aparishaj t'ikayoj huerta jina. Simisitonqa lirio t'ikamanta mirra sut'umushanman jina.

¹⁴ Makinkunaqa topacio rumiwan k'achanchasqa qori anillo jina. Ukhuntajrí safiro rumiwan, k'achanchasqa marfil jina.

¹⁵ Chakinkunapis qorimanta chukupi sayachisqa mármol rumi jina. Rijch'aynenqa Libanomanta pino sach'a jina.

¹⁶ Simenqa may misk'i, payqa mayta munakunapaj jina. Ajina ari noqaj munasqayqa. Jerusalenmanta sipaskuna, ajina ari munasqayqa.