TAKIYKUNA 3 - DIOSPA QHELQACHISQ

¹ Tutan puñunaypi sonqoypa munasqanta mask'arqani, nitaj tarikaporqanichu.

² Chantá jatarikuspa, tukuynin llajtata mask'aspa purerqani. Tukuy ñankunanejta, plazakunanejta sonqoypa munasqanta mask'arqani, nitaj tarikaporqanichu.

³ Llajtata qhawaspa, muyoj soldadokuna taripawajtinku, paykunata tapurikorqani: Manachu munasqayta rikorqankichej? nispa.

⁴ Paykunamanta uj chhikanta karunchakuytawantaj, munasqaywan tinkukorqani. Makinmanta jap'iykuspataj, manaña kacharerqanichu. Chantá mamaypa wasinman pusaykorqani, maypichus paqarikorqani, chayman.

Munakoj qharej takisqan

⁵ Jerusalenmanta sipaskuna, tiluwaychej, campopi tarukarayku, uña tarukarayku ima. Munasqetayta ama rijch'arichipuwaychejchu, puñukojta saqepullawaychej, payllamanta rijch'arinankama.

Kawsaqekunaj takisqanku

⁶ Imataj jaqayri, ch'innejmanta q'oshñi jina rikhurimushan chayri? Imataj mirrawan, inciensowan, tukuy ima sumaj q'apaykunawan q'aparishaj jamushanri?

⁷ Qhawariychej, chayqa Salomonpa wantunan. Payqa sojta chunka sumaj wapu Israelpa soldadonkuna chawpillankuta jamushan.

⁸ Tukuyninku espadayoj kanku, sapa ujninkutaj sumajta maqanakuyta yachanku. Sapa ujninku espadankuta chumpinkuman sat'ikunku, tutan imapis kajtin, wakichisqa kanankupaj.

⁹ Kuraj kamachej Salomón uj wantunata ruwachikorqa Libanopi sumaj sach'amanta.

¹⁰ Chay wantunaj sayantanqa qolqe metalmanta ruwasqa karqa, wasan atikunantaj qorimanta ruwasqa karqa. Tiyananqa yana kulliraw telamanta sirasqa karqa. Ukhuntataj Jerusalenmanta sipaskuna munakuywan, pallayniyoj awasqankuwan t'ikancharqanku.

¹¹ Sión llajtamanta sipaskuna, llojsimuychej kuraj kamachej Salomonta qhawaj. Payqa umanpi k'acha pilluwan kashan. Chay pilluta maman casarakunanpaj ruwaporqa, tukuy kawsayninpi manchayta kusikunan p'unchaypaj.