TAKIYKUNA 1 - DIOSPA QHELQACHISQ

¹ Salomonpa kay yarawi wakichisqanqa astawan k'achitu kashan waj yarawikunamanta nisqaqa.

Munasqa warmej takisqan

² Much'aykurinawaykita imata jina munashani, imaraykuchus munakuyniykeqa vinomantapis astawan misk'i.

³ Sumajta q'apashaj jawinaykeqa k'achituta q'aparin. Sutiykeqa sumajta q'apashaj jawina jich'asqa jina. Chayrayku sipaskuna mayta munakusunku.

⁴ Usqhayta pusarikuway ari. Kuraj kamachejníy, puñunaykiman pusakuway. Qanwan manchayta kusikusqayku. Munarikusqaykeqa vinomantapis astawan misk'i. Chayrayku sipaskunaqa mayta munakusunku.

Kawsaqekunaj takisqanku Munasqa warmej takisqan

⁵ Jerusalenmanta sipaskuna, noqaqa paruraw warmisita kani, jinapis k'achita. Paruraw warmisita kani, Cedarpa toldonkuna jina. K'achita kani, Salomonpa cortinan jina.

⁶ Ama paruraw warmisita kasqayta qhawawaychejchu, nitaj inti ruphayninwan paruyachiwasqanta. Kikin turaykuna noqapaj phiñakorqanku, jinataj uva huertata qhawajta saqewarqanku. Chayrayku noqa kikiymanta mana qhawarqanichu.

⁷ Willaway ari, munasqáy: Maypitaj ovejaykikunata michinkiri? Chawpi p'unchayta mayman qhatispataj llanthurichinkiri? Willariway ari, ama wajkunaj uywanku ukhupi mask'asunaypaj.

Kawsaqekunaj takisqanku

⁸ K'achita warmikunamanta aswan k'achita warmi, manachus maypi kasqanta yachanki chayqa, ovejakunaj lastronkuta qhawarispa rillay. Cabritaykikunata michimuy, michejkunaj ch'ujllanku, chaynejpi.

Munakoj qharej takisqan

⁹ Munasqetáy, qanqa noqajta kanki. Faraonpa carretanta aysaj k'achita yegua jina kanki.

¹⁰ Uyitaykeqa manchay k'achitu ninriykipi jaluchukuna chawpipi, walqayoj kunkaykipis k'achitallataj.

¹¹ Ninriykipaj jaluchukunata qorimanta ruwachipusqayki, qolqe metalwan chhitaykusqata.

Munasqa warmej takisqan

¹² Kuraj kamachej mikhunanpaj winkurejtin, nardomanta jawinaypa misk'i q'aparisqan junt'aykurin.

¹³ Munasqayqa noqapaj mirrayoj ch'uspa jina, ñuñuykunaj chawpinpi kashan.

¹⁴ Munasqayqa noqapaj Engadí uva huertamanta, uj q'api alheña t'ika jina.

Munakoj qharej takisqan

¹⁵ Qanqa k'achita kanki, munasqetáy, may k'achitapuni kanki. Ñawisituykeqa iskay urpi jina.

Munasqa warmej takisqan

¹⁶ Alajitu kanki, munasqáy, ima munana kanki. Puñunanchejqa q'omer qhora.

Munakoj qharej takisqan

¹⁷ Cedro sach'akunaqa wasinchejpa kurkun kanku, wasinchejpa qhatantaj pino sach'a kanku.