Sofonías 2 - DIOSPA QHELQACHISQ

¹ Tukuyniykichej tantaykukuychej, mana p'enqakuyniyoj runakuna,

² manaraj uj p'unchayllapi wayrachisqa paja jina chinkachisqa kashajtiykichej, manaraj Tata Diospa sinch'i phiñakuynin pataykichejman urmashajtin. Wakichikuychej, manaraj Tata Diospa k'araj phiñakuyninpa p'unchaynin chayamushajtin.

³ Qankunarí, kay pachapi pisi tiyapuyniyojkuna, Diospa kamachisqanta junt'ajkuna, tukuyniykichej Tata Diosta mask'aychej. Jinallataj cheqan kajta ruwaychej, k'umuykuychejtaj. Ajinamanta ichapis Tata Diospa phiñakuyninpa p'unchayninpi waqaychasqa kankichej.

Waj suyukuna jasut'isqa kanqanku

⁴ Gaza llajtaqa ch'in pampaman tukuchisqa kanqa, Ascalontaj ch'inpacha saqesqa kanqa. Asdodpi tiyakojkuna chawpi p'unchayta llajtankumanta wijch'usqa kanqanku. Ecronpi kajkunataj saphinmantapacha t'irasqa kanqanku.

⁵ Ay, qankunamanta, Cretapi kajkuna, qocha kantupi tiyakojkuna. Tata Diosqa contraykichejpi ajinata nin: Canaán suyu, filisteokunaj jap'iynin, noqa chinkarparichisqaykichej, mana uj runayojta saqenaykama.

⁶ Chaypachaqa mama qocha kantupi kaj suyukuna uywa michinaman tukuchisqa kanqanku, maypichus michejkuna tantakuspa, oveja wisq'ana kanchakunata wakichinku, chayman.

⁷ Judá suyumanta puchojkunaqa chay llajtayojkunaj suyunkuta jap'ikaponqanku, imaraykuchus Tata Diosninku paykunata yanapaj jamonqa. Chantá paykunata waj suyuman apasqa kasqankumanta kutichimonqa. Jaqaypitaj Judamanta kajkuna ovejankuta michenqanku. Tutantaj Ascalonpi kaj wasikunapi samarikonqanku.

⁸ Tukuy Atiyniyoj Tata Dios, pichus Israelpa Diosnin kay jinata nin: Uyarini Moab llajtayojkuna asikuspa imatachus mana allinta parlasqankuta, Amón llajtayojkunaj alqochakusqankuta ima. Paykunaqa aylluypaj millayta parlarqanku, aylluypa jallp'anwantaj qhapajyarqanku.

⁹ Chayrayku noqa, Israelpa Tukuy Atiyniyoj Tata Diosnin kawsayniyrayku tiluspa, nini: Moab suyu Sodoma jina chinkachisqa kanqa, Amonpi tiyakojkunataj Gomorrapi tiyakojkuna jina tukukonqanku. Jallp'ankukunapis khishka pampaman tukonqa, kachi orqhona qhoya jinataj ch'in pampa kanqa. Aylluymanta puchojkunataj chay suyukunaj kapuyninkuta qhechuranqanku, jallp'ankutapis jap'ikaponqanku, nispa.

¹⁰ Moab suyumanta kajkuna chay jina pagota jap'enqanku, jinallataj Amón suyupi tiyakojkunapis, Tata Diospa ayllunmanta alqochakusqankurayku, Tukuy Atiyniyoj Tata Diospa ayllunnejta qhapajyasqankurayku ima.

¹¹ Kay pachapi tukuynin lantikunata chinkachispa, Tata Dios chay runakunata manchayta mancharichenqa. Chaymantataj tukuynejpi paylla yupaychasqa kanqa. Mama qocha churukunapi tiyakojkunapis payta yupaychanqanku.

¹² Ajinallataj qankunapis, Etiopiamanta kajkuna, Tata Diospa espadanwan wañuchisqa kankichej.

¹³ Payqa wichaynejpi Asiria suyuta chinkarparichenqa. Nínive llajtatapis ch'inpachata saqerparenqa, ch'in t'ajra pampamantaj tukuchenqa.

¹⁴ Wasinkumanta kurkukuna sik'irasqa kanqa, laqayanpitaj oveja tropa puñonqanku. Jinallataj tukuy imaymana k'ita animalkunapis chay laqayapi wasicharikonqanku. Jukuwan, ch'useqawanqa punku patapi puñonqanku. Suwintukunataj ventananpi, umbralninkunapiwan ch'ajwarenqanku.

¹⁵ Ajina kanqa jatunchakoj llajtapaj, pikunachus ni imamanta llakikuspa kawsakojkunapaj. Chaypi tiyakojkuna sonqonkupi nerqanku: Llajtanchej jina tukuy kay pachapi mana waj llajta kanchu, nispa. Kunantajrí ch'inpacha, k'ita animalkunaj puñunallanña kashan. Chayninta tukuy purejkunataj umankuta khiwirispa, asikunku.