Santiago 5 - DIOSPA QHELQACHISQ

Runata waqachej qhapajkunapaj k'amiy

¹ Qhapajkuna, kayta allinta uyariychej: Qhaparispa, sonqo nanayta waqaychej, qankunaman sinch'i llakiykuna chayamunanmanta.

² Kapuyniykichej ismuykapushan, sumaj p'achaykichejtataj thuta k'utuykushan.

³ Qoriykichej, qolqeykichejpis qorwariyasqa kashanku, chay qorwariyasqataj juicio p'unchaypi qankunaj contraykichejpi sayanqa, nina jinataj ruphaykusonqachej. Kay tiempo tukukapunanpajña kashajtinpis, qankuna qhapaj kapuyniykichejta tantashallankichejrajpuni.

⁴ Chantá qankuna chajraykichejta oqharejkunaman ch'awkiyaspa mana pagarqankichejchu, chay mana pagasqaykichej qolqetaj contraykichejta qhaparishan. Arí, chajraykichejta oqharejkunaj qhaparisqankoqa Tukuy Atiyniyoj Diospa ninrinkama chayan.

⁵ Qankunarí kay pachapi chhika patapi kawsarikushankichej, sonqoykichejpa tukuy munasqanta ruwaspa, manchayta kusirikuspataj. Qankuna ñak'ana p'unchaypaj waka jina manchayta wirayarishankichej.

⁶ Jinallataj qankunaqa mana juchayoj runakunata juchachaspa wañuchinkichej, paykunataj mana imatapis kutichikuyta atinkuchu.

Tukuyta Kamachej Jesús kutimunanta pacienciawan suyana

⁷ Qankuna wawqe panaykunarí, Tukuyta Kamachej Jesús jamunankama pacienciakuychej. Qhawaychej: Chajrata poqochej runaqa pacienciawan suyan tarpusqanpa poqosqanta oqharinanpaj. Jinallataj ñawpaj parata, qhepa paratapis pacienciawan suyallantaj.

⁸ Ajinata qankunapis pacienciakuychej. Chantá sinch'ita sayaychej, imaraykuchus Tukuyta Kamachej Jesuspa kutimunan p'unchay qayllapiña.

⁹ Wawqe panaykuna, ama ujkuna ujkuna qhawanakuspa thutuychejchu, ama Dios juzgasunaykichejpaj. Juezqa jamunanpajña kashan.

¹⁰ Munasqa wawqe panaykuna, Diospa sutinpi parlaj ñawpaj sut'inchajkunamanta yachakuychej. Yuyarikuychej paykuna ñak'arishaspapis imaynatachus pacienciakusqankuta.

¹¹ Noqanchejqa, pikunachus ñak'arishaspa pacienciawan sinch'ita sayanku, chaykunata mayta jatunchanchej. Qankuna uyarerqankichej Job imaynatachus ñak'arishaspa sinch'ita sayasqanmanta. Yachallankichejtaj Tukuyta Kamachej Diosqa qhepanejman payta mayta yanapasqanta, imaraykuchus Tukuyta Kamachej Diosqa jatun sonqoyoj, may khuyakuyniyojtaj.

¹² Munasqa wawqe panaykuna, tukuy imamanta astawanqa amapuni tiluychejchu, ni janaj pacharayku, nitaj kay pacharaykupis, nillataj waj imakunaraykupis. Maypachachus arí, nispa ninkichej chaypachaqa, ajina kachun. Maypachachus mana, nispa, ninkichej chaypacharí, ajinallataj kachun, ama juchachasqa kanaykichejpaj.

¹³ Qankunamanta mayqenpis phutisqachu kashan? Dios yanapananta mañakuchun. Pitajchus kusisqa kashan chayrí, Diosta jatunchaspa takichun.

¹⁴ Sichus qankuna ukhupi mayqellanpis onqosqa kashanman chayqa, iglesiamanta kurajkunata wajyachun. Chantá paykuna Tukuyta Kamachej Jesuspa sutinpi onqosqata aceitewan jawispa, Diosmanta paypaj mañapuchunku.

¹⁵ Paykuna tukuy sonqo mañapojtinkutaj, onqosqa runa qhaliyaponqa, Tukuyta Kamachej Diostaj payta sayarichenqa. Sitajchus juchallikorqa chayqa, Diosqa juchallisqanta pampachallanqataj.

¹⁶ Chayrayku, ujkuna ujkuna juchaykichejta rimarinakuychej, jinallataj ujkuna ujkunapaj Diosmanta mañapuychej, Tata Dios qhaliyachisunaykichejpaj. Cheqan runa tukuy sonqo Diosmanta mañakojtin, Dios uyarenqapuni.

¹⁷ Diosmanta ñawpa sut'inchaj Eliasqa noqanchej jina runalla kaspapis, mana parananta tukuy sonqo Diosmanta mañakorqa. Ajinaqa kinsa wata sojta killayojta mana pararqachu.

¹⁸ Chantá ujtawan Diosmanta mañakojtin, paramorqa, chaymantataj tukuy ima chajra poqorqa.

¹⁹ Munasqa wawqe panaykuna, pillapis qankunamanta cheqan ñanmanta karunchakojtin, sichus pipis chay karunchakojta allin ñanman kutirichin chayqa,

²⁰ kayta yachaychej: Pichus karunchakojta cheqan ñanman kutirichimojqa karunchakojta wañunanmanta qhespichenqa, tarenqataj Tata Dios chay karunchakojpa ashkha juchanta pampachananta.