Santiago 4 - DIOSPA QHELQACHISQ

Diosllaman astawan qayllaykuna

¹ Imaraykutaj qankuna ukhupi ch'ajwa, maqanaku ima tiyanri? Chay tiyan, imaraykuchus mana allin kajta ruwayta munanaqa sonqoykichejpi sinch'ita maqanakuspa, atipayta munan.

² Qankuna imatapis munankichej, mana tariyta atispataj, runata wañuchinkichej. Envidiawan k'ajarinkichej, mana tariyta atispataj, qhechunaykichejpaj siminakunkichej, maqanakunkichej ima. Chaywanpis munasqaykichejta mana jap'iyta atinkichejchu, imaraykuchus Diosmanta mana mañakunkichejchu.

³ Mañakunkichej chaypis, Diosqa manapuni qosunkichejchu, imaraykuchus mana cheqan sonqowanchu mañakunkichej. Manachayqa mañakunkichej munallasqaykichejta ruwaspa Diospa qosqanta tukuchinaykichejpaj.

⁴ Uyariychej, Diosta wasanchajkuna: Manachu yachankichej Diosman mana kutirikojkunaj yuyasqankuman jina kawsajqa Diospa contran kasqanta? Pillapis Diosman mana kutirikojkunaj yuyasqankuman jina kawsanata munakojqa Diospa awqanman tukun.

⁵ Chayrayku Diospa Qhelqachisqanpi ajinata nin: Diospa qowasqanchej Espiritoqa sinch'ita munakuspa, celosakuwanchej, nispa.

⁶ Chaywanpis Dios qhasilla k'acha yanapayninwan yanapawanchej. Chayrayku Diospa Qhelqachisqanpi nillantaj: Diosqa jatunchakojkunaman sayaykun, k'umuykojkunatatajrí qhasilla k'acha yanapayninwan yanapan, nispa.

⁷ Chayrayku ari Diosman k'umuykuna sonqo kaychej. Chantá Kuraj Supaypa contranta sinch'ita sayaychej, paytaj qankunamanta ayqenqa.

⁸ Diosman qayllaykuychej, paypis qankunaman qayllamusonqachej. Juchasapakuna, makiykichejta mayllakuychej. Qankuna iskay sonqoyojkuna, sut'ita ninaykichej tiyan, Diostachus qhatikunaykichejta, chayrí juchallispachus purinaykichejta.

⁹ Jinallataj llakikuychej, phutikuychej, jik'un jik'untataj waqaychej. Asisqaykichej waqanaman tukuchun, kusikusqaykichejtaj phutikunaman.

¹⁰ Aswanpis Tukuyta Kamachej Diosman k'umuykuychej, paytaj jatunchasonqachej.

Ama Jesucristota qhatej masiykej contranta rimaychu

¹¹ Wawqe panaykuna, ama pipajpis mana allinta parlaychejchu. Sichus pipis Jesucristota qhatej masinpaj mana allinta riman, chayrí imamantapis juchachan chayqa, Diospa kamachisqanpa contranta riman, chantá Diospa kamachisqan mana allinchu kasqanta nin. Sitajchus Diospa kamachisqan mana allinchu kasqanta ninki chayqa, juez jina sayashanki. Chaywanpis qanpa ruwanaykeqa Diospa kamachisqanta kasunayki.

¹² Diosllamin kamachisqata qojqa, payllataj k'ata juez. Paylla juchayojta qhespichiyta atin, chayrí chinkachiytapis. Qanrí, wajpa contranta rimanaykipaj, pitaj kankiri?

Q'aya imachus kananmanta mana yachanchejchu

¹³ Allinta uyariwaychej, kay jinata nejkuna: Kunanchus, q'ayachus waj llajtaman risunchej. Chantá chaypi uj watata kamusunchej, qhatuspataj ashkha qolqeta ganakusunchej, nispa.

¹⁴ Jinapis qankuna q'aya imachus kananta mana yachankichejchu. Imataj kawsayniykichejri? Kawsayniykichejqa phuyu jinalla. Phuyoqa askamalla rikhurin, chantá chinkapunpacha.

¹⁵ Chayta ninaykichejtaqa, kay jinata ninaykichej: Sichus Tukuyta Kamachej Dios munanqa chayqa, kawsasunchej, ruwasunchejtaj kayta, chayrí jaqayta, nispa.

¹⁶ Qankunarí mayta wapuykachaspa, may kasqaykichejta yuyakunkichej. Chay jina wapuykachanaqa manamin walejchu.

¹⁷ Kayta yuyarikuychej: Pichus allin kajta ruwananta yachashaspa, mana ruwanchu chayqa, chay runa juchallinña.