Santiago 3 - DIOSPA QHELQACHISQ

Allinta qhawarikuspa parlana

¹ Wawqe panaykuna, ama ashkhachu iglesiapi yachachejkuna kayta munaychej, imaraykuchus Diosqa yachachejkunata ujkunamanta nisqa astawanraj juzganqa.

² Tukuyninchej ashkha kutita pantanchej. Sichus siminchejta watarikuyta atisunman chayrí, mana pantaj runa jina kasunman, ukhunchejwantaj tukuy imapi kasuchikuyta atisunman.

³ Noqanchejqa caballoj siminman frenota churanchej, chaywan kasuchikunanchejpaj, chay frenollawantaj caballota munasqanchejman purichiyta atinchej.

⁴ Barcokunatapis qhawallaychejtaj: Chay jina jatuchaj kanankupajwan, sinch'i wayraj apaykachasqan kashajtinkupis, juch'uy timón nisqa k'aspillawan barcota purichejqa chay barcota q'ewin, maymanchus munasqanman purichispa.

⁵ Ajinallataj siminchejwanpis. Juch'uysitu kananpajwan, mayta wapuykachaspa parlan. Qhawaychej: Uj chhikan ninalla may jatun monteta ruphaykuyta atin.

⁶ Siminchejrí nina jina juch'uy kaspapis, mana allin kajta parlasqanwan tukuy ukhunchejta ch'ichichan. Tukuy kawsayninchejta ninawan jina ruphaykuyta atin, chay ninataj ukhu pachaj ninanwan jap'ichisqa kashan.

⁷ Runaqa tukuy imaymana k'ita animalkunata mansuyachiyta atin: K'ita animalkunata, p'isqokunata, qhatatakuspa purejkunata, yakupi kawsajkunata ima.

⁸ Runaj simintarí mana pipis mansuyachiyta atinchu, imaraykuchus chayqa sinch'i mana allin, chantá mana mansuyachiy atina, wañuchej venenowan junt'a ima.

⁹ Siminchejwan Tukuyta Kamachej Diosninchejta yupaychanchej, chayllawantaj runa masinchejta maldicinchej, pikunachus Diospa rijch'ayninman jina ruwasqa kanku, chaykunata.

¹⁰ Chay simillanchejwantaj Diosta yupaychanchej, runakunatapis maldicinchej. Wawqe panaykuna, chayqa mana allinchu.

¹¹ Uj juturillamanta misk'i yakuwan, k'ara yakuwan ima ujllapi llojsinmanchu?

¹² Munasqa wawqe panaykuna, atinmanchu higo sach'aqa aceitunata poqoyta, chayrí uva sach'apis higota poqoyta? Mana, icharí? Ajinallataj uj juturillamanta k'ara yakuwan, misk'i yakuwan ima mana llojsiyta atinmanchu.

Yachayniyoj kayqa Diospa qosqan

¹³ Sichus qankunamanta mayqellanpis yachayniyoj kanman chayqa, jinataj imatachus Dios munasqanta entiendenman chayqa, yachayniyoj kasqanta allinta purispa rikuchichun. Yachayniyoj kasqanrayku llamp'u sonqowan allin kajtapuni ruwachun.

¹⁴ Chaywanpis sichus qankuna envidiawan jaya sonqo kaspa, chayrí qhawanakuspa imatapis ruwankichej chayqa, chay jatunchakusqaykichejwan, llullakusqaykichejwan ima cheqa kajta q'ewishankichej.

¹⁵ Chay jina yachayqa mana Diosmantachu. Aswanpis chayqa Diosman mana kutirikojkunaj yuyasqankuman jina, chantá runaj yuyasqanman jina, Supaymanta ima.

¹⁶ Maypichá envidianaku tiyan, qhawanakupis, chaypi tukuy imaymana ch'ajwa tiyallantaj, chantá tukuy imaymana mana allin kajta ruwana ima.

¹⁷ Diosmanta yachayniyoj kayta jap'ejkunarí llimphu puriyniyoj kanku. Paykuna allinpi kawsakuyta mask'anku, Diosta kasukojkuna kanku, tukuywantaj k'acha. Jinallataj paykuna ñak'arejkunamanta khuyakuyta yachanku, chantá allin kajta ruwaspallapuni purinku. Paykunaqa mana runaj uyantachu qhawanku, jinataj Diosta tukuy sonqo qhatejkuna jina purinku.

¹⁸ Pikunachus runapura allin kawsayta mask'ajkunaqa chay allin kawsayta mujuta jina tarpunku, jinataj cheqan kawsayta poqoyta jina oqharenqanku.