Santiago 2 - DIOSPA QHELQACHISQ

Runata mana qhawaranachu

¹ Munasqa wawqe panaykuna, may jatunchasqa Tukuyta Kamachej Jesucristopi atinikojkuna kaspa, amapuni ujkunallata allinpaj qhawaychejchu, wajkunatataj pisipaj.

² Nisunchej: Qankuna Diosta yupaychanapaj tantasqa kashajtiykichej, uj runa sumaj p'achallisqa, qori anilloyoj yaykumunman. Jinallataj thanta p'achayoj uj wajcha runapis chayman yaykumullanmantaj.

³ Jinapi qankuna sumaj p'achayoj runata jatunpaj qhawaspa, niwajchej: Kay aswan sumaj tiyanapi tiyarikuy, nispa. Wajcha kajtarí niwajchej: Qanqa jaqaynejllapi tiyakamuy, nispa, chayrí: Chay pampallapi chukukuy, nispa.

⁴ Manachu chayta ruwaspaqa, runata qhawarashankichej, millay yuyayniyoj juez jina?

⁵ Munasqa wawqe panaykuna, allinta uyariwaychej: Manachu Diosqa pikunachus kay pachapi wajcha kajkunata ajllakun, Diospi atinikuypi qhapaj kanankupaj? Manachu paykuna kamachiyninpi chayaqeyoj kanqanku, Dios payta munakojkunaman chayaqeta qonanta nisqanman jina?

⁶ Qankunatajrí wajchakunata k'umuykachachinkichej. Manachu qhapajkuna yawarniykichejta ch'onqasunkichej? Manachu paykunallataj juchachasqa kanaykichejpaj juezkunaman qhatatasunkichej?

⁷ Manachu qhapajkunaqa Jesucristopaj millayta rimanku, pejpa sumaj sutintachus qankuna apashankichej, chaypaj?

⁸ Diospa Qhelqachisqanpi kuraj kaj kamachisqa kay jinata nin: Runa masiykita munakuy qan kikiykita jina, nispa. Chaytachus tukuy sonqo junt'ankichej chayqa, allinta ruwankichej.

⁹ Sichus wakin runallata allinpaj qhawankichej chayrí, juchallinkichej, chayraykutaj Dios kamachisqanta p'akejkunata jina qhawasunkichej.

¹⁰ Sichus pillapis tukuynin kamachisqata kasushaspa, Diospa kamachisqanmanta ujnillantapis p'akinman chayqa, chay runaqa tukuynin kamachisqakunata p'akisqanmanta juchachasqa kanqa.

¹¹ Dios nerqa: Ama khuchichakunkichu, nispa, icharí? Payllataj nerqa: Ama runata wañuchinkichu, nispa. Kunanqa qhawariy: Qan amapis khuchichakuychu. Chaywanpis runata wañuchiwaj chayqa, Diospa kamachisqanta p'akinkiña.

¹² Qankunaqa kacharichej kamachisqanejta juzgasqa kankichej. Chayrayku chayman jina parlaychej, chayman jinallataj ruwaychej.

¹³ Pichus wajkunata mana khuyarikojqa juicio p'unchaypi Dios paymanta mana khuyarikullanqatajchu. Pichus khuyakuyta yachajtajrí, Dios juicio p'unchaypi paymanta khuyarikullanqataj.

Jesucristopi tukuy sonqo atinikusqanchejqa ruwasqanchejpi yachakun

¹⁴ Munasqa wawqe panaykuna, ima walejtaj kanman sichus pipis ninman Jesucristopi tukuy sonqo atinikoj kasqanta, manataj ruwasqanwan ajina kasqanta rikuchinman chayqa? Ajinata Jesucristopi atinikushajtin, Dios payta qhespichinmanchu?

¹⁵ Nisunman: Qankuna uj wawqeta, chayrí uj panata rikuwajchej mana p'achayojta, sapa p'unchaytaj mikhunamanta pisichikushajta.

¹⁶ Chantá ujniykichej chay wajchata ninman: Walejlla risuchun, chiri jawa ama onqonaykipaj sumajta qhatakunki, chantá allinta mikhukunki, nispa. Ajinata nishaspa, manataj imatapis pisichikojman jaywanmanchu chayqa, chay nisqallanqa ni imapi wajchata yanapanqachu, icharí?

¹⁷ Ajinallataj Jesucristopi atinikuywanpis kashan: Sichus pipis Jesucristopi tukuy sonqo atinikusqanta ruwasqanwan mana rikuchinchu chayqa, Jesucristopi atinikusqan wañusqa, qhasi manakajtaj.

¹⁸ Chaywanpis ichapis pipis ninman: Wakinkunaqa Diospi tukuy sonqo atinikunku, wakinkunatajrí allin kajta ruwanku, nispa. Noqatajrí niykichej: Manachus allin kajta ruwanki chayqa, imaynatataj Diospi tukuy sonqo atinikusqaykita rikuchiwankimanri? Noqatajrí Diospi tukuy sonqo atinikusqayta allin kajta ruwasqaywan rikuchisqayki, nispa.

¹⁹ Qanqa uj k'ata Dioslla kasqanta ninki, paypitaj tukuy sonqo atinikunki. Chayqa walej. Supaykunapis uj k'ata Dios kasqanta yachallankutaj, manchachikuspataj kharkatitinku.

²⁰ Mana yuyayniyoj runa, manachu reparanki Diospi tukuy sonqo atinikusqayki qhasi manakaj kasqanta, manachus allinta ruwaspa chaymanta yachayta qonki chayqa?

²¹ Manachu ñawpa tatanchej Abraham kasuspa ruwasqanrayku cheqan runapaj qhawasqa karqa, maypachachus churin Isaacta altar patapi jaywarqa chaypacha?

²² Yachanki jina, Abrahamqa Diosta kasuspa ruwasqannejta yachayta qorqa Diospi tukuy sonqo atinikusqanmanta. Chantá ajinata kasusqanrayku yachayta qollarqataj Diospi atinikusqan cheqapuni kasqanmanta.

²³ Ajinamanta Diospa Qhelqachisqanpi imatachus nisqan junt'akorqa: Abrahamqa Diospi atinikuspa nisqanmanta jap'ikorqa, chay jap'ikusqanraykutaj Diosqa Abrahamta cheqan runapaj qhawarqa, nispa. Ajinamanta Diosqa Abrahamta kawsaqenpaj rejsikaporqa.

²⁴ Ajinaqa yachankichej, runaqa cheqanpaj qhawasqa kasqanta ruwasqanrayku, manataj Diospi atinikusqanraykullachu.

²⁵ Ajinallatataj, manachu phisu warmi Rajabpis allinta ruwasqanrayku cheqanpaj qhawasqa karqa? Payqa Jericó llajtata qhawaj rejkunata wasinman wajyarikusqa, jinataj paykunata waj ñanta kachapuspa, yanapasqa.

²⁶ Kay nisqanchejta tukuychanapaj nisunman: Imaynatachus runaj ukhun manaña alman kajtin wañusqa, ajinallatataj Diospi atinikusqanchej wañusqa kashan, manachus allin kajta ruwaspa yachayta qonchej chayqa.