Salmos 144 - DIOSPA QHELQACHISQ

1a

SALMO 144 Tata Diosmin waqaychawajniy

1a (1a) (Davidpa ruwasqan takiy)

¹ (1b) Jark'akuwaj Tata Dios yupaychasqa kachun. Payqa maqanakupi tinkunaypaj yachachiwan, amañachiwan ima.

² Paymin manchayta munakuwaj Diosneyqa, jark'awajniytaj, ancha sumaj pakakunay, librawajniy ima. Payqa jark'akuna escudoy jina, pakakunaytaj. Paymin tukuy runata makiyman churawan.

³ Tata Dios, imataj runa kasqa paymanta qhawarinaykipajri? Imataj runa kasqa cuentaman churanaykipajri?

⁴ Runaqa uj samay jinalla, kawsaynintaj chinkaj llanthu jinalla.

⁵ Tata Dios, janaj pachata kicharispa urayk'amuy. Orqokunata llankhariy q'oshñinankupaj.

⁶ Lliuj lliujkunata kacharispa, awqaykunata ch'eqerachiy. Arcowan flechaykita kacharispa, t'ustillata paykunata ruwaray.

⁷ Patamantapacha makiykita jaywarimuspa, ashkha yakupi jeq'eqanaymanta orqhoway, waj llajtayojkunaj makinkumantataj kacharichiway.

⁸ Paykuna llullakuspalla parlanku. Paña makinkuta oqharispa, pujllakuspa jinalla tilunku, manataj nisqankuta junt'ankuchu.

⁹ Diosníy, mosoj takiyta takipusqayki, arpawan qanpaj takipusqayki.

¹⁰ Qanqa kuraj kamachejkunata yanapanki atipanankupaj. Kamachiyki Davidtapis wañuchisqa kananmanta librarqanki.

¹¹ Noqatapis waj llajtayojkunaj makinkuman urmanaymanta libraway. Paykunaj siminkoqa llullallata parlan, paña makinkuta oqharispataj, pujllakuspa jinalla tilunku, manataj nisqankuta junt'ankuchu.

¹² Churiykukunaqa huertapi sach'a jina wiñachunku. Ususiykukunataj kamachina wasipi sumaj ch'eqosqa sayanta jina manchay k'achita kachunku.

¹³ Pirwaykoqa tukuy imaymana poqoywan junt'a kachun. Uywaykupis jallp'aykupi may chhikatapuni mirarichunku.

¹⁴ Bueyniykoqa llank'anapaj kallpayoj kachunku. Awqaykukunapis llajtaykuman manaña yaykumuchunkuñachu, llajtaykoj callenkunapitaj manaña pipis manchachikuspa qhaparichunchu.

¹⁵ Tukuy chaykunata tarej llajtayojkunaqa kusikuyniyoj kanqanku. Tata Dios, Diosninkupaj rejsikapusoj suyoqa kusikuyniyojllataj kanqanku.