Rut 4 - DIOSPA QHELQACHISQ

Boozqa Rutwan casarakun

¹ Chay qhepata Boozqa llajta yaykuna punkuman rispa, tiyaykukorqa, maypichus runakuna tantakoj kanku, chaypi. Chaypachapuni, pimantachus Boozqa Rutman parlasqa, chay ayllun chayninta pasasharqa. Booztaj nerqa: Yu, jamuriy má. Kaypi tiyarikuy, nispa. Chay runataj chimpaspa, tiyarikorqa.

² Chaypachallataj Boozqa chay llajtamanta chunka kuraj runakunata wajyaspa, paykunatawan khuska tiyaykucherqa, testigo jina chay runawan imatachus parlananta uyarinankupaj. Tiyaykojtinkukamataj,

³ Boozqa chay ayllunta nerqa: Moab suyumanta kutimpoj Noemiqa jallp'anta vendeshan, wañoj ayllunchej Elimelecpata karqa, chayta.

⁴ Munarqani qan chayta yachanaykita. Sichus rantiyta munanki chayqa, rantikapuy kay rikojkunaj ñawpaqenkupi, chantá llajtamanta kuraj runakunaj ñawpaqenkupi ima. Qanqa Elimelecpa aswan qaylla ayllun kanki, chayrayku qan chay jallp'ata rantikuyta atinki. Sichus mana rantinkichu chayrí, sut'ita willaway, imaraykuchus qhepaykitaqa noqa rantinay atikun, nispa. Chantá Boozpa chay ayllonqa kuticherqa: Rantisaj, nispa.

⁵ Chaypacha Booztajrí nillarqataj: Kaytapis yachanallaykitaj tiyan: Sichus Noemíj jallp'anta rantinki chayqa, Moab suyumanta warmisapa Rutwan casarakunallaykitaj tiyan, jinamanta chay jallp'aqa wañojpa sutillanpipuni kananpaj, nispa.

⁶ Chayta uyarispa, chay ayllonqa kuticherqa: Jina kajtenqa, mana rantiyta atiymanchu, jinamanta ama chayaqey chinkapunanpaj. Cuentaymanta qan rantikapuy ari, imaraykuchus noqaqa mana atiymanchu, nispa.

⁷ Chaypacha Israel suyupi kay jina usu karqa: Rantispa, chayrí vendespa, wajman jallp'ata qopuspa, imachus parlasqanku sut'i kananpaj kay jinata ruwaj kanku: Pichus qopoj, chayrí vendepojqa juk'utanta lluch'ukuspa, chay uj runaman jaywaj.

⁸ Chaypacha usuman jina, Boozpa ayllonqa juk'utanta orqhokuspa, Boozman jaywarqa, nerqataj: Qan rantikapuy ari, nispa.

⁹ Chantá Boozqa chaypi rikojkunata nerqa: Tukuy qankuna testigo kankichej wañoj Elimelecpa, Quelionpa, jinataj Majlonpa jallp'ankuta Noemimanta rantisqaymanta.

¹⁰ Jinallataj testigo kankichej Moab llajtayoj Rutwan casarakunaymanta. Chaywan chay jallp'aqa wañoj qosan Majlonpa sutillanpipuni kanqa. Jinallataj Majlonqa ayllun ukhupi, llajtanpi ima mana qonqasqachu kanqa. Kunan qankuna chaymanta testigo kankichej, nispa.

¹¹ Chantá tukuy chaypi kajkuna, kurajkuna ima kuticherqanku: Arí, testigo kayku. Piwanchus casarakunki, chay warmita Tata Dios yanapachun Raquel jina, Lea jinataj may ashkha mirayniyoj kananpaj. Tukuyninchej paykunaj mirayninku kanchej. Tata Diosqa munachun qanpis sumaj rejsisqa runa kay Efrata cheqapi kanaykita, jinallataj Belén llajtapipis.

¹² Tata Dios munallachuntaj kay warmiwan ashkha wawata rejsinaykita. Chantá may chhika aylluyojtaj kay, Tamarpa, chantá Judáj churin Fares jina, nispa. Ajinata chay kurajkuna Boozman kuticherqanku.

¹³ Ajinamanta Boozqa Rutwan casarakorqa. Boozqa Rutwan puñuykojtintaj, Tata Diosqa munarqa Rut wijsallikuspa, wawitayoj kananta.

¹⁴ Chaypacha wawata paqarikojtintaj, Noemijpa warmi masinkuna payta nerqanku: Tata Dios jatunchasqa kachun, imaraykuchus pay qosunkiña uj allchhita, pinejtachus qosaykej sutin mana chinkanqachu, chayta. Chay allchhiykeqa Israel suyupi sumaj uyarisqa runa kachun.

¹⁵ Pay kallpachasonqa, payaña kajtiykipis aysarisonqa, imaraykuchus payqa ñojch'aykej wawan. Payqa qanchis wawakunamantapis aswan sumaj. Mayta munakusonqa, jinataj may k'acha qanwan kanqa, nispa.

¹⁶ Chantá Noemiqa wawitata arphinpi jap'ispa, chaymantapacha allchhintaqa uywakorqa.

¹⁷ Wasi masin warmikunataj chayta rikuspa, nerqanku: Noemijtaqa wawitan kapun, nispa. Jinapi Boozwan Rutwan wawankuman Obed sutita churarqanku. Aswan qhepamantaj payqa Yeséj tatan, Davidpa jatun tatantaj karqa.

Kuraj kamachej Davidpa ñawpa tatankuna

¹⁸ Kaykuna kanku Farespa miraynin: Faresqa Jesronpa tatan karqa.

¹⁹ Jesronqa Rampa tatan karqa, Ramtaj Aminadabpa tatan.

²⁰ Aminadabqa Nasonpa tatan karqa, Nasontaj Salmonpa tatan.

²¹ Salmonqa Boozpa tatan karqa, Booztaj Obedpa tatan.

²² Obedqa Yeséj tatan karqa, Yesetaj Davidpa tatan.