Romanos 9 - DIOSPA QHELQACHISQ

Diosqa israelitakunata ajllakorqa

¹ Noqa Jesucristopi atinikusqayrayku cheqa kajta parlashani, manataj llullakushanichu. Sonqoypis Santo Espirituman jina nillantaj cheqanta parlasqayta.

² Noqaqa sinch'ita llakikuni, sonqoypitaj mana tukukoj nanay tiyan.

³ Noqa kikiy munayman maldicisqa kayta, Cristomanta t'aqasqa kayta ima, aylluyta munakuspa paykunata yanapanayrayku, pikunachus ayllu masiy kanku, chaykunata.

⁴ Paykuna israelitakuna kanku, pikunatachus Diosqa wawankunapaj rejsikaporqa, paykunamantaj jatun kayninta rikucherqa, chaykuna. Jinallataj paykunawan tratota ruwarqa, qollarqataj kamachisqankunata, jinallataj imaynatachus payta yupaychanata yachacherqa. Chantá ashkha imakunatapis qonanta nillarqataj.

⁵ Jinallataj paykuna ñawpa tataykukunaj mirayninmanta kanku, chay miraymantataj Cristo jamorqa. Payqa tukuy ima kaj chhikata kamachej Dios, chayraykutaj wiñay wiñaypaj yupaychasqa kachun. Ajina kachun.

⁶ Ajinata nispa, mana nishanichu Dios nisqanta mana junt'asqanta. Manachayqa pay wakin israelitakunawan nisqanta junt'an. Chaywanpis mana Israel miraymanta tukuy kajkunachu cheqapuni Diospa ayllunmanta kanku.

⁷ Abrahampa mirayninmantaqa mana tukuychu Abrahampa wawankunapaj qhawasqa karqanku. Aswanpis Diosqa Abrahamta nisqa: Mirayniykeqa Isaacnejllata kanqa, nispa.

⁸ Chay niyta munan Abrahampa mirayninmanta kajkuna mana tukuypunichu Diospa wawankuna kasqankuta. Manachayqa Abrahampa wawankuna kanku, pikunachus Diospa nisqanman jina paqarejkunalla.

⁹ Chayqa ajina, imajtinchus Dios nisqa: Kunanta jina kutimusaj, chaypachataj warmiyki qhari wawayoj kanqa, nispa.

¹⁰ Chay wawarí ñawpa tatanchej Isaac karqa. Chantá paypaj warmin Rebecaqa iskay wawayoj karqa.

^11-12 Chay wawakuna manaraj paqarishajtinku, manarajtaj allin kajtapis, chayrí mana allin kajtapis ruwashajtinku, Diosqa Rebecata nisqa: Kuraj kajqa sullk'a kajpa kamachisqanta ruwanqa, nispa. Ajina karqa Diospa wakichisqan junt'akunanpaj. Chaytaj mana runaj ruwasqanraykuchu karqa, aswanpis pichus wajyajpa munasqanrayku.

¹³ Diospa Qhelqachisqanpi ajinata nin: Jacobta munakorqani, Esautatajrí chejnerqani, nispa.

¹⁴ Chantá ajinata nisqanrayku, ima nisuntajri? Diosqa mana allintachu ruwan, nisunchu? Manapuni.

¹⁵ Chaymanta sut'inchaspa, Diosqa Moisesta nerqa: Pitachus noqa khuyakuyta munani, chaymanta khuyakusaj. Jinallataj khuyakuspa yanapasaj pitachus munasqayta, nispa.

¹⁶ Ajinaqa Dios runata ajllakun, mana chay runa ajllasqa kayta munasqanraykuchu, nitaj imata ruwasqanraykuchu, manachayqa Dios paymanta khuyarikusqanraykulla.

¹⁷ Diospa Qhelqachisqanpi nillantaj, Dios imatachus faraonta nisqanta: Noqa qanta kuraj kamachejta jina churarqayki, qannejta atiyniyoj kasqayta rikuchinaypaj, tukuy runataj noqa pichus kasqayta yachanankupaj, nispa.

¹⁸ Ajinamanta yachanchej Diosqa pimantachus khuyakuyta munan, chaymanta khuyakusqanta. Jinallataj pejpa sonqontachá rumiyachiyta munan, chaypa sonqonta rumiyachin.

¹⁹ Jina kajtenqa, ichapis qan niwankiman: Ajina chayqa, imaraykutaj Dios runata juchachanman mana kasusqanmantari? Manachu paykunaqa Diospa munasqanta ruwasharqanku? nispa.

²⁰ Qanrí, runalla kaspa, pitaj kanki Dioswan churanakunaykipajri? T'uru mankaqa pichus ruwajta ninmanchu: Imapaj ajinata ruwawarqanki? nispa?

²¹ Chayrí, t'uru mankata ruwajqa manachu atinman chay t'urullamantataj mankata ruwayta jatun p'unchayllapi oqharinapaj, ujtataj sapa p'unchay oqharinapaj?

²² Ajinallatataj Diosqa phiñakuyninta, atiynintawan rikuchiyta atinman karqa. Chaywanpis pay pacienciakorqa, pikunaj patankumanchus phiñakuynin urmanan kasharqa chaykunawan, paykuna chinkachisqa kanankupaj churasqa kashajtinkupis.

²³ Ajinata ruwarqa jatun kayninpa qhapaj kayninta noqanchejnejta rikuchinanpaj. Pay khuyarikuwarqanchej, jinataj ñawpajmantapachaña churawarqanchej janaj pacha k'anchayninpi paywan kananchejpaj.

²⁴ Noqanchej chay ajllakusqan ukhumanta kashanchej, wakin judiokunamanta, wakintaj mana judío kajkuna ukhumanta.

²⁵ Diospis paymanta sut'inchaj Oseasnejta ajinata nillarqataj: Pikunachus mana aylluychu karqanku, chaykunata: Aylluy kankichej, nispa nisaj. Ñawpajta mana munakusqay ayllutapis munakusaj, nispa.

²⁶ May cheqapichus Dios paykunata nerqa: Qankunaqa mana aylluychu kankichej, nispa, chayllapitaj nenqa: Kunanqa wiñay kawsaj Diospa wawankuna kankichej, nispa.

²⁷ Israelitakunamanta parlaspa, Isaiaspis nillarqataj: Israelitakunaj mirayninchus mama qochapi t'iyu jina kanman chaypis, chaykunamanta pisilla qhespichisqa kanqanku.

²⁸ Chayqa ajina, imaraykuchus Tukuyta Kamachej Dios usqhayllata tukuy runata juzgaspa, ruwasqankuman jina jasut'enqa, nispa.

²⁹ Diosmanta sut'inchaj Isaías waj kutipi nillarqataj: Manachus Tukuy Atiyniyoj Tukuyta Kamachej Dios mirayninchejmanta wakillantapis saqewasunmanchu karqa chayqa, noqanchej Sodoma, chantá Gomorra llajtayojkuna jina tukuchisqa kasunman karqa, nispa.

Israelitakuna Diospa nisqanta mana jap'ikorqankuchu

³⁰ Jinaqa, ima nisuntajri? Mana judío kajkuna Diospa kamachisqanta mana ruwarqankuchu chaypis, cheqan runapaj qhawasqa kayta tarerqanku. Chaytaj ajina karqa Jesucristopi atinikusqankurayku.

³¹ Israelitakunaqa kamachisqata junt'anankupaj atisqankuta ruwarqanku, Diospa ñawpaqenpi cheqan runapaj qhawasqa kanankupaj. Chaywanpis manapuni cheqanpaj qhawasqa kayta tarerqankuchu.

³² Imarayku? Imaraykuchus paykuna ruwasqankunejta cheqanpaj qhawasqa kayta mask'arqanku, manataj Diospi atinikusqankuraykuchu. Chayrayku Cristoqa paykunapaj misk'ana rumi jina karqa.

³³ Diospa Qhelqachisqanpi nin: Noqaqa Sionpi uj rumita churani, chaypi misk'aspa urmanankupaj. Chaywanpis tukuy pichus paypi atinikojqa mana ch'awkiyasqachu kanqa, nispa.