Romanos 4 - DIOSPA QHELQACHISQ

Abrahamqa Diospi atinikusqanrayku cheqan runapaj qhawasqa

¹ Jina kajtenqa, ñawpa tatanchej Abraham cheqan runapaj qhawasqa kasqanmanta imatataj tarerqari?

² Sichus Abraham allin kajta ruwasqanrayku cheqan runapaj qhawasqa kanman karqa chayqa, jatunchakuyta atinman karqa. Diospa ñawpaqenpirí mana imamantapis jatunchakuyta aterqachu.

³ Diospa Qhelqachisqanpi ima nintajri? Nin: Abrahamqa Diospa nisqanta jap'ikorqa, chay jap'ikusqanraykutaj Diosqa cheqan runapaj payta qhawarqa, nispa.

⁴ Kayta nisunman: Pichus pitapis imata ruwapunanpaj mink'arikun chayqa, ruwapojman mana khuyaspachu pagapun, manachayqa manupis kanman jina pagapun.

⁵ Chaywanpis Diosqa juchasapata cheqan runapaj qhawan, cheqan runapaj qhawasqa kananpaj jina mana imatapis ruwasqanraykuchu. Manachayqa Dios pitapis cheqanpaj qhawan paypi atinikusqanraykulla, pichus juchasapaj juchanta pampachan, chaypi.

⁶ Davidpis nillantaj uj runa imayna kusisqachus kasqanta, maypachachus pay mana ima allintapis ruwajtin, Dios payta cheqan runapaj qhawan, chaypacha.

⁷ Pay nin: Kusisqamin kanku, millay ruwasqankuta Dios pampachajtin, juchankutapis qhataykojtin.

⁸ Kusisqamin runaqa, maypachachus Tukuyta Kamachej Dios tukuy millay ruwasqanta pampachan chaypacha, nispa.

⁹ Ajinaqa chay kusikuy circuncidasqa kajkunallapajchu, chayrí mana circuncidasqa kajkunapajwanchu? Ninchejña Abraham Diospi atinikusqanrayku Diosqa cheqan runapaj payta qhawasqanta, icharí?

¹⁰ Mayk'ajtaj Diosqa Abrahamta cheqan runapaj qhawarqari? Circuncidasqa kashajtinchu, chayrí manaraj circuncidasqa kashajtinchu? Manaraj Abraham circuncidasqa kashajtin, Dios payta cheqan runapaj qhawarqa.

¹¹ Abrahampa circuncidasqa kasqan señal karqa Diospi atinikusqanrayku cheqan runapajña qhawasqa kasqanmanta. Jinataj manaraj circuncidasqa kashajtin, Diosqa cheqan runa kasqanta nerqa. Chayrayku Abrahamqa Diospi tukuy atinikojkunaj tatanku, mana circuncidasqa kashajtinkupis. Diostaj paykunatapis cheqan runapaj qhawan paypi atinikusqankurayku.

¹² Jinallataj payqa circuncidasqakunajtapis tatallankutaj, mana circuncidasqa kasqankuraykuchu. Manachayqa tatanchej Abraham jina Diospi atinikusqankurayku paykunapis cheqanpaj qhawasqa kanku, imaynatachus pay Diospi atinikorqa manaraj circuncidasqa kashaspa, ajina.

Diospa qosaj nisqanta jap'inchej paypi atinikuspalla

¹³ Diosqa Abrahamta nerqa kay pachata payman, chantá mirayninmanpis chayaqenkupaj qonanta, mana Abraham kamachisqakunata junt'asqanraykuchu. Manachayqa Dios chayta nerqa, imaraykuchus Abraham Diospi atinikorqa cheqan runapaj qhawasqa kananpaj.

¹⁴ Kamachisqata junt'ajkunallachus chayaqeta jap'inkuman chayqa, Diospi atinikuna qhasillaña kanman. Diospa qosaj nisqanpis qhasi manakajllataj kanman.

¹⁵ Diospa kamachisqankunata pipis p'akejtin, Dios payta jasut'in. Kamachisqa mana kanmanchu chayrí, kamachisqata p'akisqanmanta mana pipis juchachasqa kanmanchu.

¹⁶ Chayrayku, Diospa qosaj nisqantaqa noqanchej paypi atinikuynejta jap'inchej, chayta mana jap'inanchejpaj jina kashajtinchejpis. Jinaqa Moisespa kamachisqanman jinapis kawsana chayrí amapis, yachanchej Diospa qosaj nisqanta jap'inanchejta, sichus Abraham jina Diospi atinikusun chayqa. Chayrayku Abrahamqa tatanchej, tukuy pikunachus Diospi atinikunchej, chaykunajta.

¹⁷ Diospa Qhelqachisqanpi nin: May ashkha runaj tatanku kanaykipaj churayki, nispa. Ajinataj karqa, imaraykuchus Abrahamqa Diospi atinikorqa, pichus wañusqakunaman kawsayta qon, jinallataj manakajmanta mosoj imakunata ruwan, chay Diospi.

¹⁸ Manaña ima allin kajtapis suyananpaj jina kashajtin, Abraham Diospa nisqanta jap'ikorqa. Chayraykutaj suyakullarqapuni ashkha runaj tatan kananpaj, Dios payta nisqanman jina: Mirayniykeqa mana yupay atina kanqa, nispa.

¹⁹ Dios chayta nishajtin, Abraham ancha machuña karqa, pachaj watayoj jinaña. Ajina machuña kasqanraykutaj manaña wawata yumananpaj jinachu karqa. Jinallataj warminpis manaña wawayoj kananpaj jinachu karqa. Chaywanpis Abrahamqa Diospi atinikullarqapuni.

²⁰ Abrahamqa mana ni tumpata iskayrayarqachu Dios qosaj nisqanta junt'ananmanta. Aswanpis Diospi astawan atinikorqa, jinamantataj Diosta tukuy sonqo jatuncharqa.

²¹ Abraham allinta yacharqa Dios atiyniyoj kasqanta, jinataj tukuy nisqantapis junt'ananta.

²² Chayrayku Abraham Diospi atinikusqanrayku Diosqa payta cheqan runapaj qhawarqa.

²³ Maypachachus Diospa Qhelqachisqanpi nin: Dios cheqan runapaj qhawarqa, nispa chaypacha, mana Abrahamllamantachu parlasharqa.

²⁴ Manachayqa noqanchejpajpis qhelqasqallataj karqa, imaraykuchus nin Dios noqanchejtapis cheqanpaj qhawanawanchejta, sichus Tukuyta Kamachej Jesucristota wañusqakunamanta kawsaricherqa, chay Diospi atinikusunchej chayqa.

²⁵ Jesucristomin juchanchejrayku wañunanpaj jaywaykusqa karqa, jinataj cheqan runapaj qhawasqa kananchejpaj kawsarichisqa karqa.