Romanos 2 - DIOSPA QHELQACHISQ

Judiokunapis Diosnejta juchachasqa kallanqankutaj

¹ Chayrayku, qanqa judío kashaspapis, mana ni imata kutichikuyta atinkichu, imaraykuchus wajkunata juchachaspaqa, qan kikillaykitataj juchachakushanki. Qan wajkunata juzgashaspapis, kikillantataj ruwanki.

² Aswanpis yachanchej Diospa juicionqa millayta ruwajkunaj contranpi cheqa kajman jina kananta.

³ Qanrí, chay jinata ruwajkunata juchachashaspa, qanpis kikillantataj ruwanki. Ajina chayqa, yuyankichu Diospa juicionmanta llusp'inaykita?

⁴ Ajinata ruwaspa, qanqa Diospa qhapaj khuyakuyninta qhesachashanki, paciencianta, jatun munakuyninta ima. Manachu yachanki munakuynenqa Diosman kutirikunaykipaj qanta pusashasusqanta?

⁵ Qanrí mana uyarikuyta munasqaykirayku, Diosman mana kutirikuyta munankichu. Chayrayku qan kikiykipaj k'araj phiñakuyta tantakushanki k'araj phiñakuy p'unchaypaj, maypachachus Diospa cheqan kaj juicion sut'inchasqa kanqa, chaypaj.

⁶ Chaypacha Dios sapa ujman ruwasqanman jina qoponqa.

⁷ Allinta ruwaspa mana sayk'ojkunaman Dios wiñay kawsayta qonqa, pikunachus Diospa ñawpaqenpi jatunpaj qhawasqa kayta mask'anku, mana jayk'aj wañuyta ima, chaykunaman.

⁸ Churanakojkunata, cheqan kajta mana kasojkunata, millay kajta ruwajkunata imarí, Diosqa k'araj phiñakuyninwan jasut'enqa.

⁹ Jinallataj tukuy millay kajta ruwajkunapaj ñak'ariy, llakiytaj kanqa, ñawpajta judío kajkunapaj, qhepantataj mana judío kajkunapaj.

¹⁰ Allin kajta ruwajkunapajrí kanqa Diospa ñawpaqenpi jatunpaj qhawasqa kay, sonqo tiyaykusqa kay ima, ñawpajta judío kajkunapajraj, chaymantataj mana judío kajkunapajpis.

¹¹ Chayqa ajina, imajtinchus Diosqa runata mana uyanta qhawaspachu juzgan.

¹² Mana judío kajkunaqa Moisespa kamachisqanmanta mana yachaspa juchallerqanku. Paykunataj chayman jina jasut'isqa kanqanku. Judío kajkunarí Moisespa kamachisqanmanta yachashaspapis juchallinku, paykunataj chay kikin kamachisqanejta juzgasqa kanqanku.

¹³ Chayqa jina, imaraykuchus mana kamachisqata uyarejkunallachu Diospa ñawpaqenpi cheqan runapaj qhawasqa kanqanku. Aswanpis kamachisqaj nisqanta kasojkunamin cheqan runapaj qhawasqa kanqanku.

¹⁴ Mana judío kajkuna Diospa kamachisqanta mana rejsishaspapis, chay kamachisqata yachasqankuta yachayta qonku sonqonkoj nisqanta kasuspa, amapis ni jayk'aj Moisespa kamachisqanmanta uyarinkumanchu karqa.

¹⁵ Ajinamanta paykuna imaynatachus purisqankuwan yachayta qonku, Diospa kamachisqan sonqonkupi qhelqasqa kasqanta, imaraykuchus kikin sonqonku paykunaman nin ruwasqanku allinchus kasqanta, chayrí juchachanapaj jinachus kasqanta.

¹⁶ Chay jinaqa Jesucristomanta sumaj willayta willasqay yachachin Diospa juzganan p'unchay qayllamushasqanta. Chaypachataj Diosqa tukuy runakuna pakaypi ruwasqankuta Jesucristonejta juzganqa.

Judío kajkuna Diospa kamachisqanta mana kasusqankuchu

¹⁷ Qanrí, judío kani, nispa jatunchakunki, jinataj kamachisqakunapi atinikunki, Dioswan kawsakusqaykimantataj runaykachanki.

¹⁸ Jinallataj Diospa munaynin imachus kasqanta yachanki. Chantá aswan allin kajta ajllakuytapis yachallankitaj, kamachisqanejta yachachisqa kaspa.

¹⁹ Qan ñawsa jina kajkunata makinkumanta jap'ispa, pusayta yuyanki, jinallataj laqhapi chinkasqa kajkunata k'anchayta atisqaykita ima.

²⁰ Yuyallankitaj mana yachayniyojkunata, jinataj wawa jinallaraj kajkunata ima yachachiyta atisqaykita. Qanqa ajinata yuyanki Diospa kamachisqannejta sumaj junt'asqa yachayta, jinataj cheqa kajta tarisqaykirayku.

²¹ Ajinaqa, sichus qan wajkunaman yachachinki chayqa, manachu qan kikiykita yachachikunki? Wajkunaman mana suwakunamanta parlashaspa, qanrí, imaraykutaj suwankiri?

²² Wajkunata ninki mana khuchichakunata. Qanrí, imaraykutaj khuchichakunkiri? Jinallataj lantikunata chejnikunki. Chaywanpis qanqa lantikunaj templonkumanta suwanki.

²³ Qanqa Diospa kamachisqankunata yachasqaykimanta runaykachanki. Chaywanpis Diospa kamachisqanta mana kasuspa, payta p'enqaypi rikhurichinki.

²⁴ Chayrayku Diospa Qhelqachisqanpi nin: Qankunarayku mana judío kajkuna Diospaj millayta rimanku, nispa.

²⁵ Uyariway, ujta nisqayki: Moisespa kamachisqanta kasojtiyki, circuncisionqa allinpaj kasunki. Jinapis sichus kamachisqata p'akinki chayqa, circuncidasqa kasqaykeqa qhasi manakajlla.

²⁶ Chayrayku sichus mana circuncidasqa runa Diospa kamachisqanman jina ruwan chayqa, Diospa qhawayninpi pay circuncidasqapis kanman jina kanqa, amapis circuncidasqachu kachun.

²⁷ Chay jinaqa, pichus ukhunpi mana circuncidasqa kashaspa kamachisqata kasojqa qanta juchachasonqa, imaraykuchus qan kamachisqakunata yachashaspa, chantá circuncidasqa ima kashaspapis, Moisespa kamachisqanta p'akinki.

²⁸ Chantá pitaj cheqapuni judiori? Mana pejpatachus tatan maman judío kanku chayllachu, nillataj ukhun circuncidasqa kajllachu.

²⁹ Cheqapuni judioqa sonqon ukhumantapacha judío. Cheqapuni circuncidasqa kajtaj Santo Espiritunejta sonqonpi circuncidasqa kaj, manataj qhelqasqa kamachisqanejtachu. Chay jina judiotaqa Diosmin allinpaj qhawan, amapis runa allinpaj qhawachunchu.