Proverbios 9 - DIOSPA QHELQACHISQ

Yachayniyoj kaywan, wampu kaywan

¹ Yachayniyoj kayqa warmipis kanman jina ujtawan parlan. Kay jinata nin: Yachayniyojqa wasinta ruwakun qanchis llajllasqa sayantakunayojta.

² Uywakunata ñak'acherqa jatun mikhuyta wayk'uchinanpaj, sumaj vinotataj wakicherqa, jinallataj mesatapis mast'arqa.

³ Chantá warmi kamachinkunata kacharqa, llajtaj loman patamanta qhaparinankupaj:

⁴ Jamuychej kayman, qankuna pisi yachayniyojkuna, nispa. Mana yuyayniyojkunatapis nillantaj:

⁵ Jamuspa, mikhunaymanta mikhuychej, wakichisqay vinotapis ujyallaychejtaj.

⁶ Wampu kayniykichejta saqeychej, kawsankichejtaj. Sumaj yuyayniyoj runakuna jina puriychej, nispa.

⁷ Pichus alqorakoj runata k'amejqa turiyachikuyllata tarenqa. Millayta ruwaj runata k'amejpis alqochachikuyllata tarikonqa.

⁸ Chayrayku alqorakoj runataqa ama k'amiychu, mana chejnichikuyta munaspaqa. Yachayniyoj runatarí k'amiy, paytaj q'ayachakusonqa.

⁹ Yachayniyojman yachachiy, paytaj astawan yachayniyoj kanqa. Cheqan runaman yachachiy, paytaj astawan yachanqa.

¹⁰ Yachayniyoj runa kanapajqa ñawpajta Tata Diosta jatun respetowan qhawana tiyan. May llimphu kaj Diosta rejseyqa runata yuyayniyojman tukuchin.

¹¹ Yachayniyoj kaspa, unayta kawsanki, kawsayniykimantaj ashkha watawan yapakonqa.

¹² Sichus yachayniyoj kanki chayqa, qanllapajtaj kanqa. Sichus mana kasukoj kanki chayrí, qanllataj ñak'arinki.

¹³ Mana yuyayniyoj kayqa simi apaj warmi jina. Payqa mana yuyayniyoj, mana ima yachajtaj.

¹⁴ Chay warmeqa wasin punkupi tiyakun, llajtapi astawan alto patanejpi tiyakun.

¹⁵ Chaynejta purejkunata, allin ñanta rishajkunata wajyan:

¹⁶ Mana yachayniyojkuna, jamuychej, nispa. Mana yuyayniyojkunamantaj kay jinata nin:

¹⁷ Suwasqa yakoqa astawan misk'i. Pakaypi mikhusqa t'antapis sumaj misk'i, nispa.

¹⁸ Chay runakunarí chaypi wañuna kasqanta mana yachankuchu. Wajyasqankuna jallp'aj sonqoman yaykusqanku.