Proverbios 7 - DIOSPA QHELQACHISQ

Khuchi warmi qharita inkitan

¹ Wawáy, nisusqayta kasuway, yuyayniykipi kamachisqayta waqaychay.

² Kamachisqayta, yachachisusqaytawan kasuy. Ñawi papaykita jina kay nisqayta waqaychay, chantá kawsanki.

³ Kamachisqayta qhelqaspa, ruk'anaykiman wataykuy, sonqoykipitaj sumajta qhelqaykuy.

⁴ Yachayniyoj kaytaqa panaykita jina qhaway, yuyayniyoj kaytataj warmiykita jina.

⁵ Chaykuna khuchi warmimanta jark'asonqanku, wajpa warmin sonqo suwajmanta waqaychasonqa.

⁶ Uj kuti noqa wasiy ventanamanta qhawasharqani.

⁷ Chantá manaraj yuyayniyoj waynakunata purishajta rikorqani. Chaykunamanta ujnintaj aswan wampu kasqanta repararqani.

⁸ Payqa ñanta rishaspa, uj esquinaman chayarqa, chantá chay warmej wasinnejman chimparqa.

⁹ Ñapis inti yaykuporqaña, laqhayaykusharqañataj.

¹⁰ Jinallamanta uj warmi payta taripaj llojsimorqapacha, phisu warmi jina k'achanchasqa, imatachus ruway munasqanta mana pakaspalla.

¹¹ Payqa qhalincha mana kasukoj warmi, wasinpi mana kakuyta atej karqa.

¹² Payqa ñankunapi, plazakunapi esquinakunapiwan ima inkitaspa purin.

¹³ Chay warmeqa chay waynata ojllaykuspa much'aykorqa. Mana p'enqarikuspataj, nerqa:

¹⁴ Noqa k'acha kawsakuy jaywanata Tata Diosman qonayta nerqani, chaytataj kunan p'unchay junt'aniña.

¹⁵ Chayrayku qanta taripasoj llojsimorqani, imaraykuchus rikusuyta munarqani. Kunantaj tariykiña.

¹⁶ Puñunayman Egiptomanta sumaj linomanta awasqa phulluta mast'aykorqani.

¹⁷ Chay phullutataj mirramanta, aloemanta, canelamanta ruwasqa ima munay q'apaj jawinawan ch'ajchorqani.

¹⁸ Jamuy, munanakuspa sajsakusun. Sut'iyamunankama munanakuspa, kusirikusun,

¹⁹ imaraykuchus qosayqa mana wasiypichu kashan. Payqa karu llajtaman rin.

²⁰ Payqa uj wayaqa qolqeta apakun, jinaqa kaymanta uj killamantaraj kutimonqa, nispa.

²¹ Ajinata k'acha simiwan inkitaykuspa, waynaj umanta muyurpayacherqa.

²² Waynataj chaypachapacha warmej qhepanta rerqa, imaynatachus uj toro ñak'anaman yaykun, ajinata, chayrí imaynatachus uj taruka tojllawan jap'ichikun, ajinata.

²³ Chaymantaqa uj flecha sonqonta t'ojsirparin, imaynatachus p'isqo sipitawan jap'ichikoj usqhayta rin, mana yachaspa chaypi wañunan kasqanta, ajinata.

²⁴ Wawáy, kunanqa uyariway. K'amisusqayta allinta uyariway.

²⁵ Ama chay warmiwan sonqoykita suwachikuychu. Amataj pantaykuychu paypa qhepanta rispa.

²⁶ Chay warmirayku mashkha qharikuna mana allin kawsayman chayanku, jinataj aswan kallpayojkunapis wañullankutaj.

²⁷ Chay warmej wasinman yaykojkunaqa cheqanta jallp'aj sonqonman yaykupunku.