Proverbios 5 - DIOSPA QHELQACHISQ

Mana khuchichakuspa purinapaj yuyaychaykuna

¹ Wawáy, yachachisusqayta uyariy, yuyaychasqaytapis jap'ikuy.

² Ajinamanta yuyaychasqayman jina purinki, chantá astawan yachaywan parlanki.

³ Qosanta wasanchaj warmeqa misk'ita parlan, parlasqantaj aceitemantapis astawan llamp'uraj.

⁴ Chaywanpis, qhepanejman sunch'umantapis aswan jaya kanqa. Puraj lado filochasqa espadamantapis astawan khuchonqa.

⁵ Pichus wasanchaj warmiwan purejqa wañonqa, chay warmej thaskisqantaj jallp'aj sonqonman cheqanta pusan.

⁶ Chay warmi mana phutikunchu kawsayman pusaj ñanpi mana purisqanmanta, nitaj maymanchus thaskisqanta qhawakunchu.

⁷ Chayrayku wawáy, uyariway, amapuni yachachisusqayta pisipaj qhawaychu.

⁸ Chay wajpa warminmanta karunchakuy. Ama wasin punkullamanpis qayllaychu.

⁹ Ajinata ruwaspa, kallpaykita mana usuchinkichu, nitaj kawsayniykimanta aswan sumaj kajta millayta ruwaj runakunaman qonkichu.

¹⁰ Pajtataj, wajkunalla tiyapususqanmanta jatunmanta mikhuspa tukuykunkuman, jump'i suruyta llank'asqaykipis waj runallata qhapajyachinman.

¹¹ Manachus uyarinki chayqa, chay qhepata waqashanki, kallpayki pisimanta pisi tukukapojtin.

¹² Chantataj qan nishawaj: Imajtintaj yuyaychawasqankuta qhesacharqaniri? Imaraykutaj k'amiwasqankutapis mana jap'ikorqanichuri?

¹³ Yachachiwajkunata mana uyariyta munarqanichu, yuyaychawajkunatapis manallataj kasorqanichu.

¹⁴ Tumpamantawanqa p'enqay llakiyman chayayman karqa, tukuy llajta masiykuna rikunanta, nispa.

¹⁵ Ama warmiykita wasanchaychu. Payllata munakuspa kawsakuy.

¹⁶ Munakuyniykeqa payllapaj kachun, amataj wajpa warminta qhawaychu.

¹⁷ Qhari warmi jina ima munayta kawsakunaykitaqa ama ni piwan qhechuchikuychu.

¹⁸ Chayrayku warmiykiwan kusikuy. Wayna kashaspa casarakusqayki warmiwan sonqo junt'asqa kawsakuy.

¹⁹ Payqa k'acha taruka jina. Paypa munarikusqanwan kusikullaypuni. Munakususqantaj sonqoykita suwallachunpuni.

²⁰ Wawáy, imaraykutaj wajpa warminwan sonqoykita suwachikuwajri? Imaraykutaj wajpa warminwan ojllaykuchikuwajri?

²¹ Tata Diosqa runaj imayna kawsasqanta qhawashallan, mayta purisqantapis rikushallantaj.

²² Millayta ruwaj runataqa kikin ruwasqallantaj jap'iykun, kikin juchallantaj waskha jina wataykun.

²³ Pichus mana kasukojqa wañonqa, wampu kaynintaj payta chinkachenqa.