Proverbios 4 - DIOSPA QHELQACHISQ

Allinta ruwaspa purina

¹ Wawaykuna, tataykichejpa yachachisusqayta uyariwaychej. Sumaj yuyayniyoj kanaykichejpaj allinta uyariwaychej.

² Noqaqa sumajta yachachiykichej. Ajinaqa yachachisqayta ama qonqayman churaychejchu.

³ Noqapis wawa kayta yachani, mamaypajqa may munasqa karqani.

⁴ Tatayqa kay jinata yachachiwaj: Yachachisqayta jap'ikuy, kamachisusqaytataj junt'ay, chaytaj kawsachisonqa.

⁵ Yachayniyoj kayta, yuyayniyoj kaytawan tariy. Nisqaykunamantaqa ama jayk'ajpis qonqapuychu, nitaj chaymanta t'aqakuychu.

⁶ Yachayniyoj kayta munakuy, amataj jayk'ajpis saqeychu, imaraykuchus chaymin tukuy ima mana allin kajmanta jark'asonqa.

⁷ Tukuy imamanta nisqaqa yachayniyoj kayta, allin yuyayniyoj kaytawan mask'ay.

⁸ Yachayniyoj kayta munakuy, chaytaj pataman oqharisonqa. Chayta jap'ikapusqaykirayku may uyarisqa kanki.

⁹ Yachayniyoj kayqa umaykita k'achanchasonqa, k'acha pillutataj umaykiman churasonqa.

¹⁰ Wawáy, parlapayasqayta uyariway, jap'ikuytaj. Chaytaj unayta kawsachisonqa.

¹¹ Noqa yachay ñanta pusasqayki, cheqan ñantataj purichisqayki.

¹² Chay ñanpeqa mana imapis pantachisoj kanqachu. Chay ñanta t'ijushajtiykipis, ni ima misk'achisonqachu.

¹³ Yachachisusqaymanta ch'ipakuy, amataj qonqayman churaychu. Chay nisqayman jina ruway, imaraykuchus chaymin kawsanaykeqa.

¹⁴ Ama mana allinta ruwajkunaj qhepankuta riychu, amataj millayta purejkunata qhatiychu.

¹⁵ Ama chay ñannejta riychu. Paykunamanta karunchakuspa, ñawpajman rillaypuni.

¹⁶ Paykunaqa mana puñunkuchu mana allin kajta mana ruwaspaqa. Sichus pitapis mana urmachinku chayqa, mana puñuypis jap'inchu.

¹⁷ Millayta ruwasqanku, kallpankuman atinisqa runamanta suwasqanku ima, paykunaj mikhuyninku jina, ujyayninku jinataj.

¹⁸ Cheqan runakunaj kawsayninkoqa inti llojsimushaj jina k'ancharin, p'unchayamusqanman jinarí astawan k'ancharirin.

¹⁹ Mana allinta purejkunaj ñanninkurí laqhalla, manataj yachankuchu imapichus misk'asqankuta.

²⁰ Wawáy, nisusqayta uyariy, imatachus parlapayasusqaytapis sumajta uyariy.

²¹ Ama yachachisusqayta qonqapuychu, sumajta sonqoykipi waqaychay.

²² Chaykunata tarejpajqa kawsay kashan. Chayqa tukuy ukhunpaj jampi jina.

²³ Tukuy imamanta astawanqa imatachus yuyasqaykiyta sumajta qhaway, imaraykuchus runaj tukuy ruwasqan chaymantamin jamun.

²⁴ Mana allinta parlanamanta ayqey, llullata parlanamantapis karunchakuy.

²⁵ Qhepanejman imachus kananmanta qhaway. Imachus ñawpaqeykipi kajtapis qhawallaytaj.

²⁶ Maymanchus chakiyki sarushan, chayta allinta qhawakuy. Jinaspa, allin ñanta purinki.

²⁷ Ñanniykimantaqa ni pañaman nitaj lloq'eman pantaykuychu. Mana allinta ruwaspa purinamantapis t'aqakuy.