Proverbios 31 - DIOSPA QHELQACHISQ

Lemuelpa nisqankuna

¹ Masa sutiyoj llajtaj kuraj kamachejnin Lemuelpa nisqankuna kay jina kanku. Kaykunata maman yachacherqa:

² Imatataj nisqayki, wawáy? Imatataj nisqayki, ukhuymanta llojsej wawáy? Diosmanta mañakusqay wawáy, ima nispataj yuyaychasqayki?

³ Ama kallpaykita warmikunawan purispa tukuchiychu. Chay jina warmikuna kuraj kamachejkunata llakiyman churanku.

⁴ Lemuelníy, mana allinchu kuraj kamachejkuna nitaj kurajkunapis vinota ujyananku, nillataj machachina ujyanawanpis machananku.

⁵ Anchata ujyaspaqa, kamachisqakunata qonqapunkuman, manataj wajchakunamanta qhawankumanchu.

⁶ Aqhata wañuy patapi kajkunaman jayway, vinotataj sonqonku jayayasqakunaman.

⁷ Machakuspa, wajcha kasqankuta qonqachunku, ñak'ariypi kasqankutapis amaña yuyarichunkuchu.

⁸ Mana parlarikuyta atejkunarayku parlay, wajchakunamantaj sayakuy.

⁹ Paykunarayku parlariy, justiciata ima ruway. Wajchakunaman kutikuy, jinallataj llamp'u sonqoyojmanpis.

Sumaj warmi

¹⁰ Sumaj warmita tareyqa mana tarina jinallachu. Payqa lliphipishaj k'achitu rumimantapis aswan valorniyojraj.

¹¹ Qosanqa warminpi tukuy sonqo atinikun, warminraykutaj tukuy imayoj kanqa.

¹² Chay warmeqa qosanpaj sapa p'unchay allin kajtapuni ruwan, manataj mana allin kajtaqa.

¹³ Chay warmeqa millmatawan, linotawan mask'an, kusisqataj k'uchi k'uchita phushkan.

¹⁴ Qhatuta apaspa, barco jina karumanta mikhunata apamun.

¹⁵ Chhapu chhaputa jatarispa, wawankunaman mikhunata jaywan. Jinallataj warmi kamachinkunamanpis imatachus ruwanankuta nin.

¹⁶ Jallp'ata allinta qhawarisparaj rantikun, makinwan ganasqanwantaj uva sach'akunata mallkin.

¹⁷ Sinch'ita kallpachakuspa, tukuy sonqowan llank'aj yaykun.

¹⁸ Qhatun allin rinamanta sumajta qhawan, tutakamataj ruwan.

¹⁹ Payqa kikin makinwan phushkantaj, k'antintaj.

²⁰ Jinallataj wajchakunata tukuy sonqo yanapan, pisichikojkunatapis.

²¹ Rit'imojtinpis, ayllunmanta mana llakikunchu, tukuyninku phatu p'achawan p'achallisqa kasqankurayku.

²² Pay kikin sumaj phullukunata awakun. Jinallataj puka yanaraw telamanta, chantá sumaj lino telamanta ruwasqa p'achawan p'achallikun.

²³ Qosanpis llajtanpi sumaj rejsisqa, chay llajtamanta kuraj runakunawan khuskataj tiyarikun.

²⁴ Chay warmeqa lino p'achakunata awaspa, chantá chumpikunatawan ruwaspa, ranqherokunaman venden.

²⁵ Payqa allin kallpayoj, allin respetasqataj, qhepanejman imachus kananmanta mana llakikunchu.

²⁶ Sumaj yachaywanpuni imatapis parlan, munakuywantaj imatapis yachachin.

²⁷ Payqa ayllun allinta purinanmanta qhawan, manataj jayk'ajpis mana ganasqanta mikhuykullanchu.

²⁸ Wawankunapis, qosanpis sayarispa, payta jatunchaspa, kay jinata ninku:

²⁹ Sumaj warmikuna ashkha kanku. Qanrí paykunamanta aswan sumajraj kanki, nispa.

³⁰ Warmej allin rijch'ayniyoj kaynenqa yanqhalla, k'achita kasqanpis qhasilla. Tata Diosta may jatun respetowan qhawaj warmirí jatunchasqa kanqa.

³¹ Tukuy ima ruwasqanta tukuy runakuna yachachunchu. Tukuy runaj uyarinantataj sumaj ruwasqanmanta payta jatunchaychej.