Proverbios 29 - DIOSPA QHELQACHISQ

¹ Pichus k'amejtinku k'ullukuspa mana uyarikuyta munanchu, chay runaqa ujllata chinkachisqa kanqa, mana ujtawan sayarinanpaj jina.

² Cheqan runakuna kamachejtinku, llajtayojkuna mayta kusikunku. Millayta ruwaj runakuna kamachejtinkurí, llajtayojkuna llakikunku.

³ Yachayniyoj kayta munakojqa tatanta kusichin. Phisu warmikunawan purejrí kapuyninta tukuchin.

⁴ Kuraj kamachej cheqan justiciata ruwan chayqa, suyunta sumajta sayachin. Impuestollata orqhoj kamachejrí suyunta llakiy kawsayman apan.

⁵ Kawsaqenta llunk'upayajqa kawsaqen urmananpaj tojllata churashan.

⁶ Millayta ruwaj runaqa juchallanpitaj urman. Cheqanta ruwaj runarí kusisqalla kawsakun.

⁷ Cheqanta ruwaj runaqa wajcha runakunapaj justicia kananmanta qhawan. Millayta ruwaj runarí chaymanta mana yachayllatapis munanchu.

⁸ Alqorakoj runakunaqa runata ch'ajwanankupaj oqharichinku. Yachayniyojkunarí runakunaj phiñakuyninta thasnunku.

⁹ Yachayniyoj runachus wampu runawan quejanakonqa chayqa, mana imatapis allinchanqachu, imaraykuchus wampoqa asikonqa, phiñakonqa ima.

¹⁰ Runa wañuchejkunaqa cheqan runakunata chejnikunku, wañuchiytataj munanku.

¹¹ Wampu runaqa manchachikunapaj jina k'arajta phiñakun. Yachayniyoj runarí phiñakuyninwan mana atipachikunchu.

¹² Sichus uj kamachej llullata kasun chayqa, tukuy yanapajninkunapis millayta ruwajkunaman tukonqanku.

¹³ Wajchawan, ñak'arichejwanqa kaypi rijch'anakunku: Tata Dios iskayninkuman kawsayta qon.

¹⁴ Wajchakunapaj justiciata ruwaj kuraj kamachejqa unayta kamachenqa.

¹⁵ Wawata seq'ospa, k'amispa ima yachayniyojman tukuchinchej. Munayninta ruwajta saqesqa wawarí mamanta p'enqachin.

¹⁶ Mana allinta ruwajkuna kamachejtinkoqa, millayta ruwana astawan rikhurin. Cheqan runakunarí mana allinta ruwajkuna imapichus tukusqankuta rikonqanku.

¹⁷ Wawaykitaqa k'amiypuni, paytaj umaykita mana nanachisonqachu. Aswanpis pay anchatapuni kusichisonqa.

¹⁸ Sichus runakuna Diospa nisqanta mana jap'ikunkuchu chayqa, runaqa kacharparisqa jina imaynapis purillan. Diospa kamachisqanta junt'ajrí may kusikuyniyojmin.

¹⁹ Kamachi runaqa mana simillawanchu wanan. Uyarishaspapis, mana kasukunchu.

²⁰ Uj wampu runamantaraj imatapis suyayta atisunman, mana yuyaychakuspa parlajmanta nisqaqa.

²¹ Juch'uymantapacha lulusqa wata runaqa qhepanejman patronninpa umanta nanachenqa.

²² Usqhayllata phiñakoj runaqa ch'ajwata jatarichin. Runata maqanachin, anchata pantaspataj juchallin.

²³ Umata oqharej runataqa machu machu kaynin k'umuykuchenqa, llamp'u sonqoyojtajrí jatunchasqa kanqa.

²⁴ Suwata yanapajqa pay kikinta chejnikun. Kachi patapi tiluchishajtinkupis, manapuni imatapis rimarenqachu.

²⁵ Runa masita manchachikoyqa tojlla jina. Chaywanpis Tata Diospi atinikojrí mana ni imamanta manchachikuspa purenqa.

²⁶ Kamachej yanapananta ashkha mask'anku. Chaywanpis Tata Dioslla sapa runapaj justiciata ruwan.

²⁷ Cheqanta ruwajkunaqa millayta ruwaj runakunata mana rikuyta munankuchu. Kikillantaj millayta ruwajkunaqa cheqan runakunata mana rikuyta munankuchu.