Proverbios 28 - DIOSPA QHELQACHISQ

¹ Millayta ruwaj runaqa mana pi qhatiykachashajtillan ayqen. Cheqan runarí león jina ni imamanta manchachikuspa tiyakun.

² Sichus uj suyupi mana allin kajta ruway tiyan chayqa, ashkha kamachejkuna rikhurinku. Yachayniyoj kamachej kamachejtinrí, suyoqa allinta purin.

³ Wajcha runa wajcha masinmanta suwajqa chajrata chinkachej llojlla para jina.

⁴ Kamachisqakunata mana kasukojkunaqa millayta ruwaj runakunata jatunchanku. Kamachisqakunata kasukojkunarí millayta ruwajkunaj contrankupi sayaykunku.

⁵ Millayta ruwaj runakunaqa justiciamanta mana yachankuchu. Tata Diosta mask'ajkunarí chay tukuy imata allinta yachanku.

⁶ Pichus wajcha kashaspa cheqan sonqoyoj kajqa aswan allin, pichus qhapaj kaspa millayta ruwaspa purin, chay runamantaqa.

⁷ Diospa kamachisqanta junt'aj chureqa sumaj yuyayniyoj. Pichus millayta ruwajkunawan purejrí tatanta p'enqaypi rikhurichin.

⁸ Pichus ancha ashkha interesniyojta qolqeta manuspa qhapajyajqa, pichus wajchakunata khuyajllapaj tantanqa.

⁹ Sichus pipis Diospa kamachisqanta uyariyta mana munanchu chayqa, Diospis chay runaj mañakusqanta manallataj uyarenqachu.

¹⁰ Pichus cheqan runakunata mana allin ñanman pantaykuchejqa, pay kikin tojllallanmantaj urmaykonqa. Mana imamanta juchachana runakunarí aswan allin kajta jap'enqanku.

¹¹ Qhapaj runaqa may yachayniyoj kasqanta yuyakun. Allin yuyayniyoj wajcha runarí chay qhapaj runa mana yuyayniyoj kasqanta sut'inchan.

¹² Cheqan runakuna atipajtinkoqa, tukuy anchata kusikunku. Mana allinta ruwajkuna atipajtinkurí, tukuy pakakunku.

¹³ Pichus juchanta pakajtaqa mana allinchu renqa. Pichus juchanta rimarispa saqejpatarí, juchan pampachasqa kanqa.

¹⁴ Kusikuyniyojmin pichus Tata Diosta maypaj qhawan, chay. Sonqonta rumiyachejrí llakiy kawsayman chayanqa.

¹⁵ Wajcha runakunapaj millayta ruwaj kamachejqa qhaparej león jina, chayrí yarqhasqa oso jina.

¹⁶ Mana yuyayniyoj kamachejqa runa masinta anchata waqachin. Mana jinata ruwaspa kamachejrí unayta kawsanqa.

¹⁷ Runa masinta wañuchejqa jallp'aj sonqonman yaykunankama ayqeykachanqa. Ama pipis payta jark'akuchunchu chinkachisqa kananmanta.

¹⁸ Cheqanta ruwaspa purejqa llakiyta rikunanmanta kacharichisqa kanqa. Mana allinta ruwaspa purejrí llakiyman urmanqa.

¹⁹ Jallp'anta llank'ajqa ashkha mikhunayoj kanqa. Qhellakunawan purejrí wajchayaykaponqa.

²⁰ Nisqanta junt'aj runaqa jatunchasqa kanqa. Usqhayllata qhapajyayta munajrí jasut'isqapuni kanqa.

²¹ Wakillanman uyata orqhonaqa mana allinchu. Chaywanpis uj chhika qolqeraykulla wakinkuna mana allin kajta ruwanku.

²² Qolqemanta wañusqa runaqa usqhayllata qhapajyayta munan. Chaywanpis pay mana yachanchu patanman wajchayay chayamunanta.

²³ Pichus runata k'amejqa qhepaman aswan munasqa kanqa, pichus llunk'ukojmanta nisqaqa.

²⁴ Pipis tatanmanta, chayrí mamanmantapis suwaspa nin: Chayqa mana juchachu nispa, chay runaqa runata wañuchejpa kawsaqenman tukun.

²⁵ Tukuy imayoj kayta munajqa ch'ajwata sayarichin. Pichus Tata Diospi atinikojtarí tukuy imapi allin renqa.

²⁶ Pichus payllapi atinikojqa wampumin. Yachaywan imatapis ruwajrí allillanpipuni kanqa.

²⁷ Pichus wajcha runata yanapajqa tukuy imayoj kanqa. Wajchata mana yanapayta munajrí sinch'i maldicisqa kanqa.

²⁸ Mana allinta ruwaj runakuna atipajtinkoqa, runakuna pakakunku. Millayta ruwajkuna chinkarejtinkutajrí, cheqanta ruwajkuna ashkhayanku.